تازه مطالب
کور / سرمقاله / د جدي شپږمه د افغانستان په تاریخ کې توره ورځ
جدي ۶

د جدي شپږمه د افغانستان په تاریخ کې توره ورځ

 سرلیکنه

هر کال چې افغانان په داخل او که په بهر هېوادونو کې وي د جدي شپږمه د یوې نه هیریدونکې تورې ورځې په نامه غندي. دا ورځ د افغانستان په پاک حریم د سرو وحشي روسي پوځونو د یرغل ورځ ده.

دا ورځ په افغانستان کې د تباهیو، بې کوریو، د ملي ارښتونو د پښو لاندې کولو، د وینو د توییدو او تر نن ورځې پورې د ټولو  بدبختیو د پیلامې ورځ ده.

د جدي په شپږمه سرو وحشي ۱۲۰ زرو پوځونو چې هوايي مرګونو الوتکو او د افغانستان د تباه کوونکو شوبلو کتارونه یې په مخ کې وو، د افغانستان په پاکه خاوره یې پلید قدمونه کیښودل.

روسانو چې کله د جدي په شپږم ماښام د افغانستان سرحدونه تر پښولاندی کول دا د هغوی خپل تیری نه و، بلکې په افغانستان کې یو شمیر هغه تور مخوکمونستانو یې بدرګه کوله، چې دکریملین په اخور را لوی شوي په  و‌طن خاوره، حیا، ناموس، دین، افغانی غیرت او  د هر څه په  سودا یې کریملین ته  دخپلې غلامۍ ثبوت ورکړ.

د۱۳۵۸ه ش کال د جدي شپږمه چې د افغانستان په تاریخ کې د تورې او کرغیړنې ورځې په نامه یادیږي، دا ورځ خپله توره نه ده، بلکې په دې ورځ چې روسانو  پر افغانستان یرغل وکړ، د افغانستان د مظلوم ولس سر او  مال یې دواړه په خطرکې واچول. ددې ورځې اعمال د غندلو  وړ دي او په راتونکي  کې به هم غندل کیږي.

په دې ورځ چې څه وشول هغه د افغانستان په تاریخ کې یو تور باب دی، ځکه ورته خلک توره ورځ وایي، ټولې ورځې خپل خدای ج ته د عبادت ورځې دي، ددې ورځې له غندلو غرض هغه اعمال دي چې په دې ماښام سر ته رسیدلي دي.

د تورمخو کمونستانو په مستقیمه لار ښونه، چې همدا اوس هم په موجوده اداره کې په لوړو پوستونوکارکوي، روسانو ته یې پر خپله خاوره د تیري زمینه برابره کړه، افغانستان ته روسان همدې بې دینه تورمخو کمونستانو راوستل. له کومي ورځې چې کمونستانو د کمونیزم سور بیرغ د افغانستان په پاکه خاوره پورته کړ، د ثور د اوومې کودتا یې وکړه، له همغې ورځې د افغان ولس د بربادیو او  وینو بهیدل پیل شوي دي، تر نن ورځې پورې چې په افغانستان کې څومره وینې توییږي او څومره ورانۍ وشوې او لا کیږي پیل یې له غلامو کمونستانو لخوا شوی دی.

په توپونو او ټانکونو سنبال ۱۲۰زره روسي سرې لښکرې چې افغانستان ته را داخلې شوې، نړې یې حیرانه کړه او آن غربي بلاک سره یې د خپل ځان او هیوادونو خطر پیداکړ؛ خو په سوونو الوتکو او زرګونو ټانکونو سورو روسانو سره چې تش لاسو افغانانو مقابله پیل کړه او د خپل ایمان په قوت یې د هغوی لښکرې تار مار کړې، نړیوال د افغان مجاهد ولس شهامت او عظمت ته ګوته په غاښ پاتې شول.

کله چې هم د جدي شپږمه غندل کیږي، د نورو  ولایاتو د شهیدانو ترڅنګ د سرو وحشي روسانو ډله ییزې وژنې، چې د کونړ ولایت په کیراړ کې یې په یوه ورځ تر زرو زیات ولسي وګړي په شهاد ت ورسول، د سرکاڼو شهیدان چې په خپلو وینو کې یې په ډله ییزه توګه ولمبول او د څرخي پله زندانیان چې د هغوی د ګل غوندې ځوانۍ یې تر خاورو لاندې کړې دا مرګونې پیښې د هر افغان سترګو ته ودریږي.

په ۱۳۵۸ه ش کال دجدي شپږمه د افغانستان په تاریخ کې یوه نه هیریدونکې پیښه ده. که د هیواد پاکو شهیدانو ته نظر وکړو په کومه بې رحمۍ سره چې تورمخو کمونستانو او د هغوی بادارانو روسانو افغانان شهیدان کړي دي باید هر کمونست په نن  ورځ چې په هر ځای کې وي په دار وځړول شي، چې په افغانستان کې د وینو تویولو اصلي بنسټګر کمونستان دي.

هو! هو روسانو د افغانستان په پاکه خاوره یرغل وکړ؛ خو له نیکه مرغه په تش لاس خو د ایمان او افغاني غیرت په قوت سمبال افغان مجاهد ولس یې دومره په میړانه مقابله وکړه، چې د هغه نوښت د شوري اتحاد ټوله امپراطوري یې ور ړنګه کړه.

دابه هم ومنو چې د روسانو په تښتولو کې به د بهرنیو هیوادونو وسلو او ګاونډیو هیوادونو اخلاقي مرسته لاس کړي وي؛ خو یواځې وسلې هم څه نه شي کولای ترڅو د ایمان قوت موجود نه وي.

 روسانو ته افغانانو په خپله میړانه ماتې ورکړې ده. روسانو په وسلو او مادیاتو او افغان مجاهد ولس په خپل ایمان او عقیده باور درلود، چې د کمونستانو  په اصطلاح نه ماتې تیدونکې امپراطوري یې ورته دړې وړې کړه.

روسانو چې په افغانستان کې خپله ماته درک کړه، نو د خپلو غلامانو په بدلو ن یې پیل وکړ، ترکې بې په امین او امین یې په کارمل وواژه.

روسانو په افغانستان کې د زمرو زړو مجاهدینو د مقابلې توان نه درلود او سرماتي او غاښ ماتي له افغانستانه وتښتیدل، که خدای کول د افغان ولس ایماني قوت به موجوده امریکایي او ورسره اشرباڼي یرغلګر هم کاملا په تیښته کړي او بشپړه ازادي به د افغان ولس په برخه شي. ان شاء الله .

تبصره پريږدئ

ستاسو برېښناليک به نه خپريږي. غوښتل شوي تش ځايونه ډک کړئ، *

*