تازه مطالب
کور / اسلام پوهنه / هذا بیان للناس (دوهمه برخه)
قران كريم، اسلامیات

هذا بیان للناس (دوهمه برخه)

د سورة البقرې فضیلتونه

لیکنه: حسین احمد قطب

سورت البقره مدنی سورت ده ٬دوه سوه شپږ اتیا (۲۸۶)ایاتونه ٬شپږزره دوه سوه یو ویشت (۶۲۲۱) کلیمی او د پنځه ویشت زره پنځه سوه (۲۵۵۰۰) حروفو لرونکی دی (تفسیر ابن کثیر)
دا سورت د قران کریم د سورتونو د ترتیب په لحاظ دوهم او د نزول په لحاظ سره اووه اتیا ام (۸۷) سورت دی د دغه سورت فضایل ډیر زیات دی چی ځینی یې په لاندې ډول دی

(۱) سورة البقره سنام القران ده:

سنام د اوښ کوب ته وایي (د اوښ د بدن تر ټولو لوړه برخه) دا سورت هم همداسی د لوړ او اوچت مقام خاوند دی رسول الله صلی الله علیه وسلم فرمایي:لکل شیء سناما و إن سنام القرأن البقرة (ترمذی باب فضایل القران)
ترجمه:د هر څه لپاره یو اوچتوالی وی او د قران اوچتوالی سورة البقره ده او همدارنګه له سهیل بن سعد رضی الله عنه څخه روایت دی چی رسول الله صلی الله علیه وسلم فرمایلي:د هر شي لپاره یو اوچتوالی وی د قران اوچتوالی سورة البقره ده څوک چی دا سورت د شپی ولولی دری (۳) شپې به هغه کور ته شیطان نشی داخلیدئ او څوک یی چی د سهار ولولي نو دری ورځې به هغه کورته شیطان داخل نشی

(۲) کوم کور کې چې سورة البقره لوستل کیږی هغه کورته شیطان نشي داخیلیدئ :

ﻻﺗﺠﻌﻠﻮا ﺑﻴﻮتکم ﻗﺒﻮرا ﻓﺎن البیت الذی تقرأ فیه سورة البقرة لا یدخله الشیطان (مسند احمد٬مسلم٬ترمذی او السنایی)
ترجمه: رسول الله صلی الله علیه وسلم فرمایي له خپلو کورونو قبرونه مه جوړوئ په کوم کور کې چې سورة البقره ولوستل شی هغه ته شیطان نه شي داخیلیدئ
مسلم شریف د ابوهریرة رضی الله عنه په حواله یو حدیث راوړی چی رسول الله صلی الله علیه وسلم فرمایې:له خپلو کورونو قبرونه مه جوړوئ په کوم کور کې چې سورة البقره ولوستل شی له هغه کوره شیطان “تښتي”

(۳) سورة البقره د خپل اهل لپاره شفاعت کونکي ده:

رسول الله صلی الله علیه وسلم فرمايي: قران لولئ ځکه دا به د قیامت په روځ خپل اهل لره (هغه څوک چی دا سورت یی لولي او عمل یي پرې کوي) شفاعت کوي٬ همدارنګه فرمايی: زهراین (سورة البقره او العمران) لولئ ځکه دا به د قیامت په ورځ په داسی ډول راځی ته به وایی چی دا خو د نوراني وریځو دوه ټوټې او یا دوه چتره دی او یا به وایی چی دا خو د وزر خلاصو (خلاص وزره)مرغانو ږله (ټولۍ) ده هغه وخت به دا سورتونه له خپل اهل (لوستونکو)څخه دفاع کوی او د هغوی په سر به سیوری جوړوی (مرقاة المفاتیح شرح مشکاة المصابیح٬ و صحیح المسلم)

(۴) د سورة البقرې لوستل برکت او پریښودل یې حسرت دی:

رسول الله صلی الله علیه وسلم فرمایي:اقرأوا سورة البقره فان اخذها برکة او ترکها حسرة ولا تستطیها البطلة (صحیح المسلم)
سورة البقره لولئ د دې لوستل برکت او پریښودل یی حسرت دی او د دې طاقت باطل کیدونکی نده یعنی د دې په لوستونکی باندی ساحران سحر نشی کولی او یا دا چی ساحران دا سورت هیڅ نشی حفظ کولی

(۵) د سورة البقری په وجه کوچنی ماشوم د لښکر مشر وټاکل شو:

یو ځل رسول الله صلی الله علیه وسلم یو ځای ته لښکر لیږه چی د هغه مشري یی یو داسی چاته ورکړه چی هغه د سورة البقری حافظ وه او په ټولو کی د کم عمر خاوند وه(مسند احمد)

(۶) د سورة البقرې د هر ایت سره اتیا زره پرښتې را کوزې شوي:

له حضرت معقل بن یسار څخه روایت دی چی رسول الله صلی الله علیه وسلم وفرمایل:سورة البقره د قرانکریم کوب او اوچتوالی ده ځکه خو د دغه سورت له هر یوه ایت سره اتیا زره پریښتي راښکته کیدې٬ایة الکرسی د عرش د لاندې نه نازله شوې ده او بیا له دغه سورت سره یو ځای شوې ده٬ او سورة الیاسین د قران زړه ده څوک چی دا د الله د رضا او د اخرت لپاره ولولي نو الله به ورته بښه وکړی پس دا خپلو مړو ته لولئ (امام احمد ۲۶/۵)

نوټ: د (هذا بیان للناس) لړۍ ان شاءالله دوام لري نو له تاسو محترمو هیله کیږي چی تعقیب یی کړئ

تبصره پريږدئ

ستاسو برېښناليک به نه خپريږي. غوښتل شوي تش ځايونه ډک کړئ، *

*