نی: د کرزي د دورې په پرتله په گډحکومت کې د بیان ازادي له منځه تللې

34

(کابل ټکی کام ۱۳۹۶تله ۱۷):د رسنیو څخه د ملاتړ اداره «نی» وايي، د کرزي د واکمنۍ په پرتله د گډ حکومت په راتگ د بیان ازادي له منځه تللې او دغه ازادي ورځ تر بلې د منځه تگ په حال کې ده.

دغې ادارې په تازه ټولپوښتنه کې ویلي، چې د خبریالانو سره په تېرو درې کلونو کې ۴۳۱ د تاوتریخوالي پېښې شوي، چې د کرزي په ۱۳کلنه دوره کې دغه شمېره نیمايي هم نه وه.

نی وايي، د بیان ازادي، د رسنیو تړل او ازاد خبریالان د حکومت د امنیتي اورگانونو له لوري گواښل کېږي او د دندې پرېښودو ته اړکېږي.

د رسنیو د ملاتړ ادارې نی وايي، په تېرو درې کلونو کې ځینې رسنۍ وتړل شوې، ځینې سیاسي مبصرین بندیان شول، په رسنیو کې د سانسور کلتور دود شو، خبریالانو ته معلومات نه ورکول کېږي او ځینې خبریالان ان هېواد پرېښودو ته هم اړ شوي.

د نی په خبره، په تېرو درې کلونو کې د خبریالانو او رسنیو له کارکوونکو سره د تاوتریخوالي ۶۲۰ پېښې یې ثبت کړي، چې دغه شمېره له ۲۰۰۱ نه تر ۲۰۱۴ پورې ان سلو نه وه اوښتې.

د رسنیو څخه د ملاتړ ادارې په دغه ټولپوښتنه کې ویلي، گډ حکومت په تېرو درې کلونو کې د ټولنیزو رسنیو ځینې فعالان هم گواښلي او هغو خلکو ته یې بېلابېلې ستونزې راولاړې کړي، چې د حکومت په ځینو ناسمو پالیسو نیوکې کوي او خپل غږ پورته کوي.

نی وايي، د افغان حکومت په امنیتي ادارو کې ډېری خبریالان د ملي امنیت له لوري گواښل شوي، وهل شوي، بندیان شوي او ان ځینو ته د مرگ گواښ هم شوی. په داسې حال کې چې د کرزي د حکومت پرمهال ډېری کارپوهانو خپل نظر په ازاد ډول بیانولی شو؛ خو اوس یې نه‌شي بیانولی.

د نی په خبره، په تېرو درې کلونو کې پنځه سوه خبریالانو هېواد پرېښی او ۱۱۲ رسنۍ تړل شوې، چې د کرزي په وخت کې هېڅ رسنۍ نه وه تړل شوې.

نی د گډ حکومت له لوري د رسنیو او د رسنیو له کارکوونکو سره د ناسم چلن په اړه په داسې وخت کې راپور خپروي، چې د هېواد په زیاتو ولایتونو کې خبریالان د دولتي ویاندویانو د معلوماتو د نه ورکولو له امله شکایتونه کوي.

د گډ حکومت په راتگ په پلازمېنه کابل کې د رسنیو د سیاسي بحثونو خپرونو ته هغه خلک بلل کېږي، چې ارگ ور په گوته کړي او د هغوی پرته نور ازاد کارپوهان بحثونو ته نه بلل کېږي.

په تېرو درې کلونو کې گډ حکومت د حکومت د ناسمو پالیسیو پرضد چلېدونکي وېبپاڼې هم په انټرنېټي بروزرونو کې بندې کړي او دټولنیزو رسنیو ځینو فعالانو ته گواښونه شوي دي.

شریکول

ځواب پريږدي

مهربانی وکړي خپله تبصره وليکئ!
خپل نوم وليکئ