اذربایجان افغان جګړې ته اضافي عسکر رالېږلي

(کابل ټکی کام، ۱۳۹۷، چنګاښ ۲۰) اذربایجان افغانستان ته د جګړې لپاره د اضافي عسکرو يوه ډله رالېږلې ده.

رسنيو د اذربايجان د دفاع وزارت له قوله ويلي، چې دغه عسکر به د غوڅ ملاتړ ماموريت په چوکاټ کې په افغانستان کې دنده پر مخ وړي.

سرچينې ويلي، د اذربایجان هېواد ځواکونو يوه ډله چې شمير يې نه دی په ډاګه شوی نن سهار افغانستان ته استول شوي دي.

د روان ۲۰۱۸م کال په اپريل مياشت کې د اذربایجان دفاع وزارت افغانستان ته د ۵۲ اضافي عسکرو د لېږلو ژمنه کړې وه.

د معلوماتو له مخې، اذربایجان دا مهال په په افغانستان کې ۱۲۰ عسکر لري او د نويو ځواکونو په راتللو سره به يې شمير نږدې دوه سوه ته پورته شي.

اذربایجان له ۲۰۰۲م کال راهيسې په افغانستان کې خپل پوځيان ديره کړي چې افغان ځواکونو، د هغو د ملاتړ تر څنګ په ځينو عملياتو کې هم برخه اخلي.

ويل کېږي، افغانستان ته د ناټو ځواکونو څلوېښت سلنه اکمالات د اذربایجان له لارې ترسره کېږي.

څه موده مخکې امريکا د ناټو هېوادونو له غړو غوښتي و چې افغانستان ته اضافي سرتيري ولېږي.

په عين حال کې د برتانيا لومړۍ وزير تېرېزامې ويلي چې افغانستان ته به ۴۴۰ اضافي عسکر واستوي چې ورسره به د برتانيانيي ځواکونو شمير ۱۰۹۰ عسکرو ته پورته شي.

د امريکا د ملي امنيت يوه چارواکي ويلي، په بروکسل کې د ناټو په غونډه کې به امريکا ډير تمرکز په دې وي چې څنګه متحدين دېته وهڅوي چې افغاستان ته اضافي عسکر ولېږي.

د شنونکو په باور، افغان جګړه د بهرنيو عسکرو په ډېرېدلو سره نه شي ختمېدلی بلکې د يادې جګړې د پای ته رسېدو لپاره اساسي لارې لټول پکار دي، ځکه طالبان وايي ترڅو چې په هېواد بهرني ځواکونه ميشت وي دوی به خپلې جګړې ته دوام ورکوي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close