ازادو رسنيو د ملاتړ اداره وايي ۲۰۱۶ د افغان خبريالانو لپاره خونړی کال و

 (الماس خدرخیل ۱۳۹۵مرغومی ۵) الماس خدرخیل

د افغانستان د ازادو رسنیو د ملاتړه اداره «نی» وايي، چې ۲۰۱۶ کال د افغان خبریالانو لپاره تر ټولو خونړی کال و.

د يادې ادارې اجرائيوي رئیس مجيب الله خلوتګر ازادۍ راډيو ته وويل، چې په ۲۰۱۶م میلادي کال کې د خبریالانو پر وړاندې د زورزیاتي پېښې د تېرو کلونو په پرتله زیاتې شوې دي.

د نوموړي په باور په روان کال کې د خبریالانو پر وړاندې د زورزیاتي ۴۲۰ قضیې ثبت شوې دي، چې د خبریالانو او د رسنیو د کارکوونکو د وژلو ۱۴ پېښې پکې شاملې دي.

هغه همداراز وويل، چې : “له بده مرغه ۲۰۱۶م میلادي کال، چې په وروستیو اونیو کې یې یو، په وروستیو ۱۵ کلونو کې د افغان خبریالانو لپاره خطرناک او خونړی کال و.”

که څه هم د خبریالانو ملاتړي بنسټونه د وضعیت د خرابوالي او د دوی د خوندیتوب په اړه اندېښنې لري، خو د ولسمشر د ویاند مرستیال شاه حسین مرتضوي د شنبې په ورځ ازادي راډیو ته وویل، حکومت د خبریالانو د خوندیتوب لپاره لازم اقدامات کړي دي.

بل پلو د خبریالانو ملاتړي بنسټونه د خبریالانو پر وړاندې د زورزیاتي د پېښو ډېرېدو ته په کتو سره وايي، چې حکومت د خبریالانو د وضعیت د ښه کولو لپاره لازم ګامونه نه دي پورته کړي.

په افغانستان کې د جنګونو او جګړو له امله ډیری وخت خبريالان هدف ګرزي او خپل ژوند له لاسه ورکوي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close