اشرف غني جګړه په نارینه وو، سوله په ښځو کوي

 سرلیکنه

په افغانستان کې چې کله پر بهرنیو او افغان پوځونو د طالبانو بریدونه زیات شي، اشرف غني له یوې خوا له طالبانو سره د جګړې لپاره پر ځوان نسل غږ وکړي چې د ”هېواد ساتنه ستاسې مسئولیت او فرض دی“ او بلې خوا ته په افغانستان کې د بهرنیو پوځونو له قوماندانه وغواړي چې له افغانستانه تللي پوځیان بیا راوغواړي.

اشرف غني ځکه له نیکولسن څخه د بهرنیو پوځونو د بېرته راغوښتلو غوښته کوي چې له طالبانو سره د جګړې په میدان کې د مقابلې څه چې، پر افغان پوځيانو د ارګ د ساتلو باور هم نه لري.

د کابل پروسې له غونډې وروسته، چې د زیات شمېر هېوادونو نماینده ګانو پکې برخه واخیسته، اشرف غني له سي ان ان ټلوېزون سره په مرکه کې وویل، له طالبانو سره د سولې په پروسه کې باید ښځې هم ونډه ولري او افغان مېرمني خپل استازیتوب کولای شي.

اشرف غني د امریکا په امر کله کله پر طالبانو د سولې غږ کوي، خو د ارګ ساتلو لپاره یې د نړیوالو پارټنرانو پوځونو ته سترګې نیولې وي، ځکه د طالبانو په مقابل کې افغان پوځونه د جګړې توان نه لري او اشرف غني له طالبانو سره د سولې واک نه لري، ځکه خو د ۱۷ کلونو په تېرېدو سره جګړه له یوې ورځې بلې ته سختېږي او د سولې غونډې کلنۍ کېږي.

طالبانو که له یوې خوا د بهرنیو او افغان پوځونو په مقابل کې په پوره مقاومت جګړه کړې ده، تر څنګ یې تل د سولې په اړه په پوره خپلواکۍ سره هم غږ پوته کړی دی. له دې دا څرګنده شوه چې طالبان په نارینتوب جګړه او سوله دواړه کوي، خو اشرف غني جګړه په نرانو او سوله په ښځو کوي.

طالبانو تراوسه پورې تر یو لک د زیاتو امریکايي او درې لکو پورې افغان پوځ سره له مقابلې مخ نه دی اړولی، په هره جګړه کې یې افغان او بهرني پوځونه له تیښتې سره مخ کړي دي. په۲۰۱۵ز کال کې، د کندز ښار په نیولو د طالبانو مقاومت او د افغان پوځ تېښته له افغانانو علاوه نړیوالو هم ولیده، او اوس چې امریکا له خپلې ناکامیو وروسته د سولې غږ وکړ، طالبان سولې ته هم چمتووالی لري.

څه وخت چې بهرني پوځونه په بشپړه توګه، د افغان پوځ په ملګرتیا، له طالبانو سره په جګړه بوخت وو او طالبانوچې کومې سیمې له حکومتي ځواکونو نیولې، تراوسه پورې د طالبانو په واک کې دي. بې۲۵ بم غورځوونکو او بلېک هاک څرخي الوتکو خپل وروستی زور پر طالبانو وازمایه خو ترې ویې نه نیولې.

افغان حکومت ته اوس دوه لارې پاتې دي، یا به استعفا ورکوي او یا به له طالبانو سره د سولې په نوم ځان پخلا کوي، چې په دواړو لارو کې هره یوه غوره کوي په ګټه ورته تمامېږي، ځکه چې طالبان هم جګړه کوي او هم سوله، د جګړې او سولې دواړو میدانونو کې طالبانو په یوه دریځ کامیابي ترلاسه کړې ده.

دا مهال د افغان حکومت پر اوږو دروند بار پروت دی، نه جګړه کې کامیابي ترلاسه کولای شي  او نه له طالبانو نیول شوې سیمې بېرته نیولای شي. نارینه چې  جګړه ونه ګټي، ښځې یې هیڅ وخت په سوله کامیابي نه شي ترلاسه کولای.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close