اشرف غني د قانون ناقض او که پلي کوونکی؟/ هېواد ریان

قانون تر ټولو لوړ دی او له ولسمشره نیولې، وزیر، لوی څارنوال، د سترې محکمې رئیس، د ولسي جرگې رئیس، مشاورین او تر عادي چارواکو ټول قانون منلو ته مجبوره دي. له قانون به نه یوه ذره وروسته کېږي او نه به ترې یو قدم مخکې اړوي. په هر هېواد کې د ولسمشر او لومړي وزیر څوکۍ تر نورو پورته دي، خو دوی هم قانون ته باید درناوی ولري او هم پر نورو خلکو او هم یې پر ځان پلی کړي.

خو زموږ د هېواد یوه بدمرغي نه ده، چې پرې وژاړو. دلته د یوې ولسوالۍ امنیه قومندان نیول کېږي، خو ورسره هم‌مهاله پنځه ولایتونه د سقوط تر درشله رسېږي. دلته وزیران، رئیسان، والیان او د ولسمشر مېرمن پر فساد تورنه کېږي، خو محاکمه کول، پوښتنه او گروېږنه ترې هسې یو خیال دی او په داسې یو فاسد نظام کې دغه چاره هېڅکله نه ترسره کېږي.

ولسمشریزو ټاکنو ته یوازې څو میاشتې پاتې دي. ولسمشر غني نږدې یوه میاشت مخکې وویل، چې غواړي خپل نابشپړ شوي کارونه په راتلونکې دوره کې ترسره کړي. لومړی باید له غني پوښتنه وشي، چې تا کوم کارونه کړي او کوم درنه پاتې دي.؟ تا خو یوازې ژمنې ورکړي او هوايي دهلېزونه دې پرانیستي، چې له گټې یې ډېر زیان افغان سوداگرو او حکومت کړی دی. ستا په څلور نیم کلنه واکمنۍ کې خلک داسې شول، چې اوس د یوې گولې ډوډۍ ته حیران دي. ایا غواړي راتلونکې دوره کې دغه ملت د لوږې سلنه نوره هم لوړه کړې او دغسې گډوډ نظام بیا پر خلکو وویني؟

ولسمشریزو ټاکنو ته د احتمالي نوماندانو کمپاین سر له اوسه پیل شوی. د ملي امنیت شورا پخواني مشر حنیف اتمر خپل کار په اعلامیو پیل کړ. د څوکۍ له پرېښودو وروسته یې سم لاسي په کاپیسا کې د امریکایانو بمبار وغانده. خو همدغه اتمر له امریکا سره امنیتي تړون لاسلیک کړ او د امریکا په هره بمبارۍ کې باید له ده هم پوښتنه وشي؛ ځکه لاسلیک په کې دده هم وو.

عمر زاخېلوال، عمر داودزی، عطاء محمد نور او عبدالله عبدالله د راتلونکو ولسمشریزو ټاکنو احتمالي نوماندان دي، خو تر ټولو ډېر کمپیایني کس ولسمشر غني دی. ولسمشر غني نږدې هره اوونۍ یو ولایت ته سفر کوي. په ځانگړي ډول ډېر سفرونه یې هزاره مېشتو ولایتونو او سیمو ته دي. روانه اوونۍ یې دایکندي ته په سفر کې هزاره گانو ته وویل، چې سرور دانش به یې بیا دویم مرستیال وي او د جاغوري ولسوالي به ولایت کړي. دی بیا غواړي هزاره گان او ازبک په خپل لاس کې واخلي او رایه له پښتنو وغواړي. خو پښتون بیا به همداسې در په دره وي، لکه د ده په واکمنۍ کې چې وو. دی شینډنډ، شینواري، غوربند او نورې پراخه سیمې ولایتونه کوي نه، خو یوه وړه ولسوالۍ په ولایت بدلوي.

د اشرف غني اوسني سفرونه ټول کمپایني او د قانون خلاف کار دی. ولسمشر غني د ملت په پیسو د ځان په گټه کارونه کوي او د ملت په پیسو خپلې شخصي چارې مخته وړي. سیاسي گوندونه، پر ټاکنو د څار بنسټونه، عدلي او قضايي ارگانونه او د ټاکنو کمېسیون باید پر دغه چاره نیوکه وکړي او د بندولو خبره هم وکړي. ځکه ولسمشر غني برحاله واکمن دی او نه باید له خپل موقف څخه ناوړه گټه پورته کړي.

که امریکایان ووتل او طالبان راغلل، نو د غني او نورو احتمالي نوماندانو خوبونه یوازې خوبونه پاتې کېږي او د طالبانو په موجودیت کې دوی بیا هېڅکله داسې له قانون سرغړونه نه شي کولی او کېدای شي د امریکا پاتې شوني هم له امریکایانو سره بېرته یو ځای ولاړ شي. دوی د واک وږي دي او طالبان بیا داسې مفسدو، غلو، غاصیبنو او غلامانو ته په خپله واکمنۍ کې ځای نه لري.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close