افغانستان کې وژل شوی امریکایی سرتېری د سي آی اې د عملیاتو غړی و

د امریکا د ځانګړو ځواکونو ۳ پخوانیو افسرانو ویلي د امریکايي پوځ د رینجر ځواکونو هغه غړی چې د روانې جولای میاشتې په لومړیو کې له طالبانو سره په مخامخ جګړه کې تر ټپي کېدو وروسته ووژل شو د سي آی اې د یوه پټ پروګرام غړی و.

دوه دېرش کلن کریسټوفر انډریو سلیز د جولای په ۱۲مه د هغو ټپونو له امله مړ شو چې د پکتیا په زرمت ولسوالۍ کې له طالبانو سره د جګړې پر مهال ورته رسېدلي وو. یوه امریکايي سرتېري ویلي چې کریسټوفر سیلیز په عملیاتو کې د یوه ټپي شوي افغان کمانډو، چې وروسته ووژل شو، د ژغورنې هڅه کوله چې په مرمۍ ولګېد.

کریسټوفر انډریو سلیز
کریسټوفر انډریو سلیز

امریکايۍ پولیټیکو رسنۍ د جولای په ۲۴مه د امریکا د ځانګړو عملیاتو د ۳ پخوانیو افسرانو له خولې لیکلي چې نوموړی د پوځي رینجر ځواکونو د هغه ټیم غړی و چې د امریکا له استخباراتي ادارې سي آی اې سره د طالبانو د لوړپوړو کسانو په نیولو او وژلو کې کومک کوي.

پولیټیکو وايي، د طالب مشرانو د نیولو او وژلو دا پروګرام چې وړاندې د Omega په کوډ نوم پېژندل کېده اوس د ANSOF نوم ورکول شوی دی.

پولیټیکو په خپل راپور کې زیاته کړې چې سي آی اې په دې اړه له څه ویلو ډده کړې او امریکايی پوځ  سي آی اې ته د خپل پرسونل سپارل رسمآ نه مني.

د امریکايي پوځ د ځانګړو عملیاتو د قومندانۍ یوه ویاند، رابرټ باکهولټ، پولیټیکو ته ویلي، ”ځیني داسې معلوم او یقیني پرسونل او ټولي شته چې موږ یې، د محرموالي له امله، له چا سره په اړه خبرې نه کوو.“

د پولیټیکو رسنۍ په خبره، CIA په کابل او ځينو ”سرحدي ولایتونو“ کې له خپلو مرکزي دفترونو په ګټه اخیستنې سره تل له پوځه بېل عملیات ترسره کوي، او د افغان جګړې له لومړیو میاشتو راپدېخوا د امریکا پوځ دې ادارې ته د ”اومیګا“ پروګرام لپاره د ځانګړو عملیاتو لږ شمېر سرتېري ورکړي دي.

پولیټیکو زیاتوي، رینجر ځواکونو، چې په افغانستان کې د امریکايي پوځ ”د تروریزم ضد“ عملیاتو د ډلې مشري کوي، له څو کلونو راهیسې خپل ځینې باتجربه پرسونل سي آی اې ته ورکړي، چې د چورلکو، بې پیلوټه الوتکو او طبي ژغورنې مرسته ورسره وکړي.

یوه بل امریکايي افسر د نوم نه ښودلو په شرط پولیټیکو ته ویلي چې سي آی اې په هدفي لیست کې شامل کسان د خپلو افغان جاسوسانو په لاس وژني او نیسي. د نوموړي په خبره، ”د سي آی اې افغان ملګري د برید، وژلو او بندي کولو دنده ترسره کوي، خو امریکايي رینجر ځواکونه هم ورسره وي“.

له دې پروګرامه یوه خبر او د امریکايي پوځ یوه بل افسر ویلي، له افغان ځواکونو سره د مرستې د دې ماموریت لپاره غوره کېدونکي د رینجر ځواکونو اړوند سرتېري باتجربه او د خپلو نورو ملګرو په پرتله ماهر وي.

نوموړی وايي چې رینجر ځواکونو د سي آی اې له ټیمونو سره د روغتیا (طب) او په جګړه کې د ډزو مرسته کوي.

له تېر کال راهیسې، سي آی اې د ټرمپ د سټراټيژۍ له امله په افغانستان کې، د طالب مشرانو د په نښه کولو د هڅو په ګډون، خپل فعالیتونه پراخ او چټک کړي دي.

د امریکا دفاع وزارت (پنټاګان) وايي چې په افغانستان کې اوس مهال ۱۵۰۰۰ امریکايي پوځیان مېشت دي – د دې پوځونو یوه برخه افغان ځواکونو ته روزنه، سلا او کومک ورکوي او بله برخه یې ”د تروریزم پر ضد“ عملیات ترسره کوي.

د یادونې وړ ده، وژل شوي امریکايي سرتېري، کریسټوفر سیلیز، درې مډالونه ترلاسه کړي وو. د رینجر ځواکونو د ۷۵یم کنډک قومندان، برانډن ټیګتمییر نوموړی ”ملي خزانه“ بللی و. هېره دې نه وي چې سیلیز یهودی و.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close