افغان او پاکستاني ځواکونو په تورخم کې له نښتو وروسته، په سیمه کې د خپلو پوځيانو شمېر زیات کړی

کابل ټکی کام ۲۶غبرګولي/۱۳۹۵، احمدالله مهاجر
افغان او پاکستاني ځواکونو په تورخم کې له څو ورځينۍ جګړې وروسته، په سیمه کې د خپلو پوځيانو په شمېر کې زیاتوالی راوستی دی.
تورخم چې وخت نا وخت پکې د افغان او پاکستاني ځواکونو ترمنځ جګړه وي، نن درېیمه ورځ هم په تورخم کې د دروزاې جوړولو پر سر شخړه روانه وه.
نننۍ جګړه ماښام رامنځته شوې ده، چې تراوسه پورې یې د مرګ ژوبلې په اړه معلومات نشته.
افغان دولتي چارواکو ویلي دي، چې په تورخم کې نن ماښام یو ځل بیا د پاکستاني ځواکونو له خوا پر افغان خاوره بریدونه وشول، چې د افغان ځواکونو له سخت مقاومت سره مخ شول.
د افغان او پاکستاني ځواکونو ترمنځ لومړی نښته د تېرې یکشنبې په ورځ رامنځته شوه.
دغه نښته هغه مهال رامنځته شوې وه، کله چې پاکستاني ځواکونو په تورخم کې د دروازې د لګولو هڅه کوله.
دا مهال د افغان سرحدي ځواکونو قومندان ویلي دي، چې د پاکستاني ځواکونو سره تر نښتو وروسته یې ګڼ شمېر سرحدي پولیس تورخم کې ځای پر ځای کړي دي.
د پاکستان امنیتي ځواکونو هم رویټرز خبري اژانس ته ویلي دي، چې تورخم ته نږدې یې نور پوځيان او درندې وسلې ځای پر ځای کړي دي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close