امريکايي رسنۍ: امريکا تر پخوا ډيره ويشلې او شلېدلې ده، ښايي کورنۍ جګړې پکې پيل شي

(کابل ټکی کام، ۱۳۹۷، لړم ۸)

له امريکا څخه خپرېدونکې سنډي ټایمز ورځپاڼې په يوه مقاله کې د متحده ايالاتو وروستيو بدلونونو ته پام ليکلي چې امريکا تر بر هروخت د پاشلو او ويشل کېدو پر خوا روانه ده چې له کبله يې ښايي د يوې کورنۍ جګړې پر لورې ولاړه شي.

د لیکوال نيال فيرګسون په وينا، امريکا دا مهال هغه خونړۍ ټولوژنې ته نږدې شوې چې په پايله کې يې اتحادي ځواکونو په ۱۸۶۱ کال کې پر کارولينا برید کړی و.

د لیکوال په خبره، په امريکا کې پر ولسمشر ټرمپ نيوکه کوونکو ته چاودېدونکي توکي لېږل او په پيټسپرګ کې د يهودو پر عبادتځای د وړمې ورځې بريد په ډاګه کوي چې په امریکا کې دوهمه کورنۍ جګړه ژر پېلېدونکې ده.

د سنډي ټايمز مقاله کې راغلي، په امريکا کې د ښي اړخو او چپیانو سياسي تاوتريخوالی او د يو بل پرضد ترخې خبرې هم د کورنۍ جګړې او تاوتريخوالي پېښو د ډيريدو امکان زياتوي.

لیکوال زياتوي، که امریکا کې څوک د کورنۍ جګړې د بيا پيلېدو په اړه خبرې وکړي ښايي خلک يې د ويرې خپرولو هڅه وبولي خو په وينا يې د ويکټورډيوېس هانسون په څېر تاريخپوه د کورنۍ جګړې خبرداری باید بې پامه ونه غورځول شي چې ويلي يې دي:”په متحده ايالاتو کې د سياسي بې ‌ثباتۍ ډېرې نښې نښانې شته، په ځانګړي ډول د مساوات نه شتون، د ۲۰۲۰ په رارسېدو به دا نښې تر ټولو لوړې کچې ته پورته شي او هېواد به له يوې ترخې کودتا سره مخ کړي”.

په مقاله کې د امريکا لومړۍ کورنۍ جګړې ته اشاره شوې چې امريکايان د ۱۹مې پېړۍ په نيمايي کې د مرييتانې د قضيې په سر وېشل شوي وو او دغه بېلتون په ۱۸۶۰ کې ولسمشرۍ ته د ابراهام لينکولن له رسېدو سره سم د دې لامل شو چې ۷ لويديځ ايالتونه جلا شي او لومړۍ کورنۍ جګړه پيل شي.

د مقاله په وروستۍ برخه کې راغلي چې امريکايان دا مهال پر ګڼو مسائلو سره اختلافات لري او که راتلونکو ټاکنو ته لوی ګوندونه بيلابيل نوماندان وټاکي او ټرمپ د بيا ځل ولسمشر کيدو هڅه وکړي نو ښايي په امريکا کې به د ۱۸۶۰ کال په څېر وضعيت رامنځته او کورنۍ جګړې پيل شي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close