امريکايي مجله: د افغانستان په زياته خاوره طالبان واکمن دي او فيصلې پکې کوي

سټار انډ سټرايپس: د افغانستان ډيره برخه نفوس د طالبانو تر حاکميت لاندې سيمو کې ژوند کوي

(کابل ټکی کام، ۱۳۹۷، لیندۍ ۱۲)

د سټار انډ سټرايپس په نوم يوې امریکايي مجلې ليکي، چې دا مهال د افغانستان زياته برخه خاوره د طالبانو تر حاکميت لاندې ده او تر نيمايي زيات نفوس د هغوی تر واکمنۍ لاندې سيمو کې ژوند کوي.

یادې مجلې په يوه مقاله کې ليکلي، طالبانو د نورو کلونو په پرتله سږ کال خپلې جګړې تيزې کړي او نه يواځې دا چې د ولسواليو پر مرکزونو يې بريدونو ته زور ورکړی بلکې وخت ناوخت پر لويو ښارونو هم بريدونه کړي او د ځينو ولايتونو مرکزونه يې تر سختو تهديدونو لاندې نيولي او په نږدې سيمو کې يې عمليات ترسره کړي دي.

د سرچينې په وينا، طالبانو خپلې جګړې شديدې کړي، د دغه هېواد ډيره برخه خاوره يې تر خپل کنترل لاندې راوستې او اوس مهال د افغانستان زياته برخه نفوس د طالبانو تر واک لاندې سيمو کې ژوند کوي چې هغوی يې فيصلې کوي.

د سټار انډ سټرايپس مقاله کې راغلي، طالبانو د افغانستان په ټولو ولايتونو کې محکمې لري، د خلکو لانجمې فيصلې حل کوي او هره ورځ د نوې جګړې لپاره امادګي نيسي.

مجلې د غزني وروستيو جګړو ته په اشارې ويلي، چې طالبانو په تر ټولو امن ولسواليو (جاغوري- مالستان) هم بريدونه وکړل چې له کبله زرګونه کسان بې ځايه شول.

لیکوال په افغان حکومت او نړيوالې ټولنې غږ کړی چې افغانستان کې د خلکو ستونزې په پام کې ونیسي او روانې جګړې ختمولو ته د حل لاره ولټوي.

که څه هم افغان او امريکايي چارواکي دا نه مني چې طالبان دې د افغانستان تر نيمايي پر زياتې سيمې حاکميت ولري خو د روان ۲۰۱۸م کال په لومړيو کې بي بي سي په يوه څيړنيز راپور کې ويلي و چې طالبان د افغانستان پر اويا سلنه خاوره کې فعال دي او حکومت يواځې په دېرش سلنه خاوره حاکميت لري.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close