امریکایۍ رسنۍ: ټرمپ د افغان لانجې سخت بې حوصلې کړی دی

واحد فقیري

ورځني سیاسي نوټونه (۱۴۴):

ټرمپ د افغان لانجې سخت بې حوصلې کړی دئ!

د ډیلي مېل ورځپانه د جولای پر ۳۰ باندي لیکي چي جمهورریس ټرمپ د افغان د جګړې په اړه بې حوصلې سوی دئ، او د دې امکان سته چي په یو اړخېزه توګه له افغانستان څخه امریکايي عسکر راوباسي. اخبار لیکي چي امریکايي دپلوماتان سخت وارخطا دي چي هسي نه چي ښاغلی ټرمپ دونه بې حوصلې سي چي د طالبانو سره مخامخ خبرو ته معطل نه سي، او د امریکايي عسکرو د راایستلو امر وکړي.

د متحده ایالاتو یوه پخواني عالي رتبه مامور د این بي سي نیوز ته ویلي دي،«دا چي ټرمپ په تېر اګسټ کي د افغان پالیسي تصویب کړه، دا د دې مانا نه لري چي هغه به تر آخره پوري همدې پالیسي ته وفاداره او متعهد پاته سي.»

د ډیلي مېل ورځپاڼه لیکي چي طالبانو او امریکايي عالي رتبه دپلوماتانو په قطر کي سره لیدلي دي، خو دا معلومه نه ده چي د هغوی تر مینځ به بله غونډه چیري او څه وخت وسي.

اخبار لیکي طالبان غواړي چي د امریکایانو سره د افغان کشاله د خبرو له لاري فیصله کړي، او امریکايي اشغال ختم کړي. طالبان دغه راز ټینګار کوي چي د کابل رژیم د سولي او جنګ صلاحیت نه لري، او د واشنګټن له امره پرته عمل نه سي کولای.

ورځپاڼه لیکي چي طالبان باور لري چي هغوی مجبوره دي چي له امریکا سره یوې روغي جوړي ته ورسېږي، ځکه د امریکا له موافقې پرته به طالبان هیڅکله په افغانستان کي پر آرامه پاته نه سي.

وال سټریټ ژورنال د جولای پر ۲۸ باندي لیکي چي په افغانستان کي د ښاغلي ټرمپ یوه کلنه ستراتیژي چندان مثبت نتایج نه لري. د افغان فوج له طالبانو څخه سیمي نه دي نیولي. د ملکي کسانو تلفاتو پخوانی ریکارډ مات کړی دئ. د مخدره موادو قاچاق او کاروبار په خرپ روان دئ. د متحده ایالاتو استخبارات وايي چي د ټرمپ ستراتیژي د طالبانو پرمختګ نه دئ سټاپ کړئ.

وال سټریټ ژورنال لیکي که څه هم په نظامي ساحه کئ پرمختګ نه دئ سوئ، خو د سولي لپاره تاریخي فرصتونه ایجاد سوي دي. د اختر د ورځو اور بند زیاته خوشبیني ایجاده کړې ده.

اخبار کاږي سولي ته رسېدل به اسانه کار نه وي، ځکه افغان او امریکايي چارواکو څو ځله د طالبانو سره د سولي د مذاکراتو هڅه کړې ده، خو هر کرت ناکامه سوي دي. یو وار په ۲۰۱۳ کي، د سولي لپاره زیات پرمختګ وسو،‌ خو پر یو جزيي شي -د طالبانو د بېرغ پر جګولو – باندي خبري خرابي سوې.

ـــــــــ

واحد فقیري په کال ۱۹۶۲ کي په کندهار کي زېږېدلی دی. په کال ۱۹۸۰ کې د کندهار د احمد شاه بابا له لېسې څخه فارغ شوی دی. عالي تحصیلات یې په متحده ایالاتو کي کړي دي، او د امریکن پوهنتون او جورج مېسن پوهنتون څخه په سیاسي علومو کي درې ډیګرۍ لري. څو کاله یې د امریکا ږغ سره د خبریال په توګه کار کړی دی. څو کاله یې د پښتو د ژبي په برخه کي استادي کړې ده. درې کتابونه یې په پښتو ترجمه کړي دي. اوس د څو راډیوګانو او تیلویزیونو سره د سیاسي مبصر په توګه همکاري کوي. او وخت نا وخت یې سیاسي تبصرې د افغانانو په مختلفو ویب سایټونو کي خپرېږي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close