امریکايي پوځ نیم کال کې پر افغانستان ۲۹۱۱ بمونه غورځولي

(کابل ټکی کام ۱۳۹۷ چنګاښ ۲۹)

د امریکا پوځ د روان کال په لومړیو شپږ میاشتو کې پر افغانستان د بمونو غورځولو ریکارډ جوړ کړی دی.

د امریکايي سټارز اینډ سټرایپیس ورځپاڼې د خبر له مخې، د امریکا د هوايي ځواکونو له لوري خپرې شوې شمېرې ښيي چې د ۲۰۱۸ز کال تر نیمايي پورې نږدې ۲۹۱۱ بمونه او توغندي د افغانستان پر خاوره غورځول شوي دي.

که د بمونو غورځول په همدې توګه دوام ولري، د ۲۰۱۸ز کال تر پایه به د غورځول شویو بمونو شمېر تر ۵۰۰۰ هم پورته شي.

تېره جون میاشت کې، د حکومت او طالبانو تر منځ د اوربند له رامنځته کېدو سره سره، چې د جون له ۱۲مې تر ۲۹مې یې دوام درلود، د افغانستان پر خاوره ۵۷۲ بمونه غورځول شوي دي.

امریکايي ځواکونه وايي چې د اوربند په ورځو کې امریکايي ځواکونو د طالبانو پر ضد هوايي بریدونه ودرول، خو د داعش جنګیالیو پر ضد یې خپلو بریدونو ته دوام ورکړی و. د امریکايي پوځ په خبره، ”د اوربند پر مهال پر داعش جنګیالیو ۸۰ هوايي بریدونه ترسره شوي دي.“

د ټرمپ هوايي جګړه.. ۲۰۱۷ز د بمبارونو له امله ملکي وګړو ته خونړی کال و

د امریکا هوايي ځواکونو په خپل رپورټ کې ویلي چې پر طالبانو به له افغان حکومت سره خبرو ته تر کښېنستو پورې هوايي بریدونه روان وي.

د غورځول شویو بمونو دا شمېر یوازې هغه دی چې امریکايي ځواکونو غورځولي دي، د افغان هوايي ځواکونو له لوري د غورځول شویو بمونو شمېر نه اعلانېږي.

امریکا په افغانستان کې هوايي بریدونه د تېر کال په اګست میاشت کې د ډونلډ ټرمپ د جنګي سټراټيژۍ تر اعلان وروسته زیات کړل.

د کندز بمبار: بهرني ځواکونه د یوه ملکي وګړي وژل هم نه مني

د نوې سټراټيژۍ په اعلان سره، بهرنیو ځواکونو د بمبار کولو پراخ واکونه ترلاسه کړل او د هوايي بریدونو په شمېر کې یې زیاتوالی راوست. د دې ټول زور موخه له افغان حکومت سره د خبرو مېز ته د طالبانو کښېنول دي.

د امریکا ولسمشر، ډونلډ ټرمپ، په افغانستان کې د امریکا د تر ټولو اوږدې جګړې د روان ساتلو مخالف و، خو د خپلو سلاکارانو په هڅونه د دې جګړې اوږدولو ته تیار شو.

د هوايي بریدونو له زیاتوالي سره سره، امریکا له طالبانو سره د بنبست په ماتولو نه ده بریالۍ شوې. د سټارز اینډ سټرایپس په خبره، د امریکايي پوځ معلومات ښيي چې افغان حکومت اوس هم یوازې د هېواد پر ۵۶٪ خاوره واک یا نفوذ لري.

په افغانستان کې د خپلې سټراټيژۍ د مطلوبو پایلو په نه لیدلو او د پرمختګ د نه شتون له امله، ولسمشر ډونلډ ټرمپ امریکايي چارواکو ته امر کړی چې د افغانستان او سیمې لپاره د نوموړي سټراټيژي وارزوي.

د امریکا د مرکزي قومندانۍ قومندان، جنرال جوزف ووټل، تېره ورځ (پنجشنبه، ۱۹ جولای) یوه کنفرانس کې وویل چې دا به یوه ”عادي“ ارزونه وي او په سټراټيژۍ کې به د کوم ستر بدلون راوستلو لامل نه شي.

ملګرو ملتونو په یوه وروستي رپورټ کې د جګړې له امله د افغان ولسي وګړو د مرګ ژوبلې په اړه اندېښنه څرګنده کړې ده.

په دې رپورټ کې، چې د ۲۰۱۸ز کال لومړۍ شپږ میاشتې په بر کې نیسي، ویل شوي چې د روان کال په نیمايي کې ۱۶۹۲ ملکي وګړي وژل شوي او ۳۴۳۰ نور ټپیان شوي دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close