امریکا له طالبانو سره مخامخ خبرو ته چمتو ده – نیکولسن

په افغانستان کې د مېشتو بهرنیو ځواکونو قومندان جنرال جان نیکولسن ویلي چې امریکا د افغانستان د اوولس کلنې جګړې د پای ته رسېدو لپاره له طالبانو سره په مخامخ خبرو کې ګډون ته چمتو ده.

نوموړي دا څرګندونې نن (دوشنبه، ۲۵ چنګاښ) کندهار ته د سفر پر مهال، چې د د دفاع وزیر طارق شاه بهرامي او د یو شمېر هېوادونو سفیرانو یې ملتیا کوله، وکړې.

جنرال جان نیکولسن زیاته کړې، ”زموږ د بهرنیو چارو وزیر، ښاغلي مایک پامپیو، ویلي چې موږ، د امریکا متحده ایالات، له طالبانو سره مخامخ مذاکراتو او د بهرنیو ځواکونو [د شتون] په هکله خبرو اترو ته چمتو یو.“

بل خوا، په قطر کې د طالبانو د سیاسي دفتر ویاند، سهیل شاهین، رویټرز خبري اژانس ته ویلي چې دوی د امریکا له لوري د مخامخ خبرو د وروستیو اوازو تایید ته انتظار دي. نوموړي ویلي، ”له امریکا سره مخامخ خبرو ته کښېناستل او له افغانستانه د بهرنیو ځواکونو وتل هغه څه دي چې موږ غوښتل او ورته انتظار و.“

سهیل شاهین ویلي چې د دوی د لومړي ګام په توګه د ملګرو ملتونو له تور لیسته د طالبانو د مشرانو د نومونو د ایستل کېدو هیله لري څو د طالبانو مشران په اسانۍ سره سفرونه وکړای شي.

د یادونې وړ ده، نن امریکايۍ نیویارک ټایمز ورځپاڼې خبر ورکړ چې د ډونلډ ټرمپ ادارې خپلو ډیپلوماټانو ته امر کړی چې له طالبانو سره د مخامخ خبرو پیلولو هڅه وکړي.

نیویارک ټایمز لیکلي امریکايي چارواکي دې پایلې ته رسېدلي چې له طالبانو سره له مخامخ خبرو پرته بله چاره نشته، ځکه طالبانو تل ټینګار کړی چې یوازې له امریکا سره مخامخ خبرو ته چمتو دي.

طالبان ټینګار کوي چې یوازې ”د جګړې له اصلي اړخ“ امریکا سره مخامخ خبرې کوي، ځکه د دوی په خبره، افغان حکومت ”بې واکه“ دی.

یادې رسنۍ زیاته کړې له طالبانو سره د مخامخ خبرو کولو پرېکړه تېره میاشت ډونلډ ټرمپ کړې ده څو په دې توګه مذاکرات بېرته راژوندي کړي او د افغانستان بنبست مات کړي.

ولسمشرۍ ماڼۍ ارګ وایي، په دې اړه د امریکا رسمي اعلان ته په تمه دي او طالبان بیا وایي، تراوسه ورسره اړيکه نه ده نیول شوې.

په دې وروستیو کې، د امریکا د بهرنیو چارو د وزیر، مایک پامپیو او د افغانستان لپاره د امریکا لوړپوړې او ځانګړې ډیپلوماټې، الیس ویلز، د خبرو د پیلولو په موخه کابل ته سفرونه هم کړي دي.

امریکا پخوا له افغان حکومت سره د طالبانو پر خبرو ټینګار کاوه، خو دا دریځ یې، د کارپوهانو په خبره، وروسته له هغه بدل کړ کله چې د افغانستان لپاره د امریکا د ولسمشر ډونلډ ټرمپ سټراټیژي تر یو کال تېرېدو وروسته بیا هم خپلې مطلوبې پایلې ترلاسه نه کړې.

ډونلډ ټرمپ د تېر کال د اګست په میاشت کې، د افغانستان لپاره خپله سټراټيژي اعلان کړه، چې د زور او فشارونو له لارې د طالبانو پر ماتولو او د خبرو مېز ته په کښېنولو راڅرخېده.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close