انټي وایروس پخپله وایروس ګرځیدلی

ډاکټر آصف

د کومې ورځې نه چې اشرف غني خپل انتخاباتي کمپاین پیل کړ، له همغې ورځې نه تر دې دمه یې د فساد پر ضد شعارونه ورکول او ځان یې نړیوالو ته انټي فساد معرفي کړ.

خلکو هم ګمان کاوه چې رښتیا هم د افغانستان د حکومتي نظام نه د فساد د ریښو ویستو لپاره پرښته پیدا شوه، په همدې تمه او امید ځینې مشرانو د هغه په کمپاینونو کې پر ځان شپه او ورځ یوه کړه، بې سارې منډې ترړې یې ووهلې او د عامو خلکو ذهنیتونو باندې یې دومره کار وکړ چې د افغانستان اکثریت خلک یې دې ته وادار کړل چې باید دغه په نوم انټي فسادته  رایه ورکړي څو که خدای کول د فساد ټغر به د افغانستان له حکومتدارۍ نه ورټول کړي.

همدا سې وشول خلکو رایې ورکړې، انټي فساد انتخابات وګټل، خلک له دې نه غافل وو چې دغه انټي فساد یو ډیر کمزوری، ډارن، وعده خلاف، درواغجن، او غلام کرکټر لري. خلکو ښه په نره رایه ورکړه او دې یې نړۍ ته ښه په نره وځلاوه؛ خو نن خلکو په خپلو سترګو ولیدل چې انټي فساد پخپله یو ډیر کمزوری ډارن، فاسد او درواغجن شخصیت دی.

لومړی فساد یې دا و چې د شر او فساد مور ډاکټر عبدالله بې بنسټه ادعاو ته یې سر ټیټ کړ، نه یواځې دا چې په قدرت کې یې له ځانه سره د اساسي قانون خلاف شریک کړ بلکې د خپلې درواغجنې ادعا ثبوت یې خپل ملت ته وړاندې کړ او د هغه څه پر خلاف یې قدم کیښود چې ویلي یې وو. له خپلې حکومتدارۍ نه به سهامي شرکت نه جوړوي، خلکو ولیدل چې نه یواځې دا چې له حکومتدارۍ نه يې یو فاسد سهامي شرکت جوړ کړ، بلکې هر څه یې ورسره هم نیم په نیمه ومنل او برسیره پر دې یې د شر او فساد مور ته یې دومره واک او صلاحیت ورکړ چې نن سبا په ټول افغانستان کې اصلي واکمنان د شر او فساد پلویان دي.

کابل ښار خو یې داسې دی لکه د بچه سقاو نه چې ورته په میراث پاتې وي. په پروان کې یې اوس هم هغه ستره لوحه نصب او ولاړه ده چې د ډاکټر عبدالله لوی انځور پرې هم لګیدلی دی او په ډیر وقاحت سره پرې لیکل شوي دي چې: د افغانستان منتخب جمهور رئیس ډاکټر عبدالله !!!

خو د انټي فساد یا اشرف غني پلویان او نه یې حکومت تر ننه هم نشي کولای چې دغه لوحه ښکته کړي. دا لا څه کوې وایي چې کله اشرف غني انتخابات وګټل، په ارګ کې یې لومړۍ غونډه جوړه کړه، ټول هغه مشران چې ده ته یې انتخاباتي کمپاینونه کړې وو، هم دې غونډې ته ورغوښتي وو، هغوی بیچاره ګان ټول په دې تمه وو چې د خپل فعالیت مکافات به وینی او ګوندې چې پر لوړو چوکیو به یې ونازوي او که مکافات نه وي نو یو خیریوسي خو به د اشرف غني له خولې ترلاسه کړي؛ خو انګیرنه یې د توقع پر خلاف وه، اشرف غني په خپله وینا کې ورته وویل چې: کور مو ودان چې ماته مو کمپاین وکړ، ناوې مو راسره تر ارګه راوسته، نور مو په مخه ښه! ځینو ورنه د خپل سرنوشت په اړه پوښتنې او غوښتنې وکړې، اشرف غني ورته په ځواب کې وویل:تاسې له ماسره ناوې تر ارګه راوسته آیا اوس ناوې راسره شریکوئ که څنګه؟؟؟!!!

د اشرف غني اوسني حالت ته هم که لږ ځیر شو نو تل یې د فساد پر ضد د اقداماتو شعارونه ورکړي دي. نور ډیری فسادونه به یې اوس پریږدو یواځې د هغه اپډیټ فساد په اړه به وغږیږو او هغه دا چې پدې وروستیو کې یې پارلمان ته امر وکړ چې وزیران استیضاح کړي، چې که هر یوه خپله بودیجه نه وي مصرف کړي سلب صلاحیت دې کړل شي؛ خو ومو لیدل چې کله پارلمان پر دغه کار پیل وکړ نو په لومړي سر کې یې د شر او فساد د ستر علمبردار ځوی ستر مفسد زاده سلب صلاحیت کړ.

خو دا چې له ېوې خوا د مفسد زاده تر شاه غټ وایرس ډاکټر عبدالله موجود دی چې اشرف غني ورڅخه ویره لري او له بلې خوا انټی وایرس اشرف غني یو کمزوری او ډارن کرکټر لري نو هغه د ډانګ او پړانګ تر مینځ را ګیر شو. نو ومو لیدل چې په ډیر وقاحت سره یې د ولس د استازیو په سترګو کې د خاورو اچولو په موخه لومړی هغوی ته خپله مکارانه وینا وکړه څو له خپل دغه فساد ضدو کړنو نه لاس په سر شي خو چې ونه شوه نو یې سلب صلاحیت شویو وزیرانو ته په ډیرې سپین سترګۍ سره سپارښتنه وکړه چې خپلو دندو ته دوام ورکړي.

اوس ووایاست چې آیا اشرف غني انټي فساد دی او که په خپل د فساد زیږوونکی او ملاتړی ؟؟؟

نو انټي ویروس پخپله ویروس ګرځیدلی.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close