بې له انګاره سړی سوځي

شفاعت ریحان

په خپلو سترګو مې د زړونو لمبه هم وليده

 ما د شهيدو پرهرونو لمبه هم وليده

 د بېلتانه اور دي را وسوځل ايره ايره شول

 ما مې د سوو ارمانونو لمبه هم وليده

زما نظر خو په انګار کې پر اغزو ولګيد

رشتيا يو چا د ګلابونو لمبه هم وليده؟

 ما له فراق مخکې لمبې د يادو نه منلې

 نن مې جانانه د يادونو لمبه هم وليده

نړۍ يو چا باندې د ظلم سپرغي وشيندله

 نړۍ يې بيا د فريادونو لمبه هم وليده

 تا به ليدې زموږ د کلي شهيداني پېغلې؟

 تا پر ګودر د چنارونو لمبه هم وليده؟

بېله انګاره سړی سوځي شفاعت ريحانه!

 ما د يو چا د هجرانونو لمبه‎ هم ولیده

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close