ترکمنستان: افغانستان به له ټاپي نل ليکې هرکال يو ميليارد ډالر  ترلاسه کوي

(کابل ټکی کام ۱۳۹۵ليندۍ ۱۸) الماس خدرخېل

د ترکمنستان ولسمشر قبان قلي بردي محمدوف په تازه څرګندونو کې ويلي، چې افغانستان به هر کال د ټاپي ګازو پروژې له نل ليکې د ټرانزيټ يو ميليارد ډالر ترلاسه کوي.

نوموړي دغه څرګندونې د ترکمنستان رسنيو ته په خپلې تازه مرکه کې کړي دي.

ښاغلی قربان قلي وايي، چې یاده نل ليکه کې به ۱۲۰۰۰ افغانانو ته د کار زمينې د برابرولو تر څنګ د افغانستان يو شمير سيمې د ګازو له کارونې هم برخمنې شي.

هغه وايي، چې د دوی هېواد په پام کې لري ترڅو په افغانستان کې د ورته نورې پراختيايي پروژې هم پلې کړي.

د هغه په وینا ترکمنستان هڅه کوي، چې ګاونډی هېواد یې «افغانستان» اقتصادي وده وکړي او تر څنګ یې یو پیاوړی او د ښه اقتصاد لرونکی افغانستان په پښو ودريږي.
د يادونې ده، چې د افغانستان او ترکمنستان ترمنځ يوه اونۍ وړاندې د رېل پلټۍ پرانسته هم وشوه.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close