ترکمنستان ته تښتېدونکي لسګونه سرحدي پولیس طالبانو ته تسلیم شول

کابل ټکی کام(یک شنبه،۲۶کب، ۱۳۹۷ل):

د بادغیس د ولایتي شورا رئیس عبدالعزیز بیک وايي، هغه لسګونه سرحدي پولیس چې تیره ورځ د طالبانو د بریدونو له ویرې د ترکمنستان پولې ته تښتېدلي وو او غوښتل یې چې ترکمنستان ته لاړشي، د ترکمن چارواکو له انکار وروسته طالبانو ته تسلیم شوي دي.

عبدالعزیز بیک زیاتوي، د افغانستان د بهرنیو چارو وزارت له لارې د ترکمنستان سفارت څخه غوښتل شوي وو چې تښتېدلو افغان پولیسو ته د ترکمنستان خاورې ته د داخلېدو اجازه ورکړي؛ خو بیاهم ترکمن چارواکو د افغانستان د بهرنیو چارو وزرات غوښتنلیک ته منفي ځواب ویلی وو.

ښاغلي بیک سلام وطندار راډیو ته ویلي، چې له ۱۰۰ زیاتو سرحدي پولیسو غوښتل ترکمنستان ته پناه یوسي؛ خو د ترکمن چارواکو له انکار وروسته ګڼ شمېر سرتیري مجبوره شوي، چې طالبانو ته تسلیم شي.

د بادغیس د ولایتي شورا رئیس وايي، د بالامرغاب ولسوالۍ موریچاق سیمه کې د سرحدي پولیسو د محاصرې موضوع یې ولسمشر، غني اجرائیه رئیس عبدالله او ټولو امنیتي چارواکو سره شریکه کړې وه؛ لیکن هغوی تر اوسه نه دي توانېدلي چې دغه سرتیري د طالبانو له کلابندۍ خلاص کړي.

په همدې مهال د بادغیس د امنیه قومندانۍ د امنیت آمر شیرآغا الکوزي هم د بالامرغاب ولسوالۍ په موریچاق سیمه کې ترکمنستان ته د سرحدي پولیسو د تېښتې موضوع تاییدوي؛ خو زیاتوي چې سیمې ته یې تازه دمي سرتیري استولي، ترڅو تښتېدونکي سرحدي پولیس بیرته خپل هېواد ته را وګرځوي.

وسله والو طالبانو هم د بالامرغاب ولسوالۍ په موریچاق سیمه کې د ۴۰ تنو سرحدي پولیسو د تسلیمۍ خبره مني او زیاتوي چې ۲۰۰ تنه نور لاهم محاصره دي.

دا په داسې حال کې ده، چې د بادغیس ولایت بالامرغاب ولسوالۍ مرکز او موریچاق سیمه کې د ملي اردو او سرحدي پولیسو کنډکونه د طالبانو لخوا سخت کلابند دي او تر اوسه په لسګونو پولیس طالبانو ته تسلیم شوي دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close