ترکيه: جمال خاشقجي د سعودي کونسلګرۍ کې دننه وژل شوی

(کابل ټکی کام، ۱۳۹۷، تله ۱۵)

د سعودي خبريال او ليکوال جمال خاشقجي د تيرې سې شنبې په ورځ وروسته له هغې تری تم شو کله چې په ترکيه کې د سعودي کونسلګرۍته دننه شو او بيرته ترې راونوت.

د خاشجقي ترکۍ ميرمن خديجه وايي، له هغه سره د سعودي کونسلګرۍ ته تللې وه خو د شپې تر يوې بجې يې ورته انتظار وکړ چې راونوت سبا چهارشنبه يې د کونسلګرۍ له مسوولينو د هغه پوښتنه وکړه خو هغوی ورته وويل چې میړه يې له کونسلګرۍ بيرته تللی دی.

هغه وايي، ميړه يې کونسلګرۍ ته د شخصي اسنادو د اجرا لپاره ورغلی و.

د ترکيې پوليسو ويلي، چې دوی په دې باور دي چې سعودي خبريال جمال خاشقجي په استانبول کې د سعودي په کونسلګرۍ کې دننه وژل شوی دی.

د ترکيې لويې څارنوالۍ او پوليسو د نوموړي د لادرکه کېدو په اړه څېړنې پيل کړي خو تر اوسه يې دا شواهد نه دي پيدا کړي چې نوموړی دې په کونسلګرۍ کې وژل شوی وي، واشنګټن پوسټ د ترکي سرچينو له قوله ليکلي چې دوی په دې باوري دي چې نوموړی په کونسلګرۍ کې د ننه وژل شوی خو رويټرز ته بیا ځينو ترکي سرچينو ويلي چې د هغه د قتل جرم له مخکې پلان شوی و او مړی يې هم له کونسلګرۍ ايستل شوی دی.

تر اوسه سعودي چارواکو په رسمي ډول په دې اړه کوم غبرګون نه دی ښودلی خو تر دې مخکې د سعودي پاچا له بلومبيرګ سره په يوه مرکه کې وويل چې د ترکي چارواکو له لوري د کونسلګرۍ د پلټنو هرکلی کوي.

شهزاده محمد بن سلمان بلومبیرګ خبري اژانس ته ویلي: “خاشقجي سعودی وګړی دی او موږ لېوال یو چې د پېښې په جزییاتو خبر شو او له ترکي حکومت سره به تل اړیکه کې یې یو چې جمال څه شو”.

د تيرې چهارشنبې په ورځ د ترکيې د بهرنيو چارو وزارت د سعودي سفير ورغوښتی و او د خاشقي د لادرکه کېدو په اړه يې ترې پوښتنې کړې دي.

له بله پلوه په ترکيه کې د عرب خبريالانو ټولنې ويلي، د کونسلګرۍ د ساتلو مسؤولو ترکي پوليسو د څارنې کامرې کتلي چې د خاشقجي د تګ په اړه پکې انځور نه ښکاري خو زياتوي په ويډيو کې ښکاري چې د کونسلګرۍ د چارواکو موټر دننه او بهر تګ راتګ کوي.

وروسته له هغې چې د جمال خاشقجي د لادرکه کېدو راپورونه ورکول شول ايکانوميسټ مجلې په خپل یوه راپور کې وويل، چې د نړۍ په هېڅ ځای کې د سعودي نظام سياسي مخالفين خوندي ځای نه لري، هر يو يې هڅه کوي، چې له سعودي وتښتي او د حکومتي چارواکو د ظلم له لاسه ځان خوندي کړي، خو نه پوهيږي، چې د ده لپاره په نړۍ کې خوندي ځای کوم دی؟

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close