توده تبلیغاتي جګړه

محمد الفاتح

په افغانستان کې د طالبانو ، بهرنیو ځواکونو او د دوی د افغاني دوستانو تر منځ د نظامي جګړې میدان ډیر ګرم شوی دی او د هرې ورځې په تیریدو لا ګرمیږي او دا په داسې حال کې ده چې ټولې خواوې د مخکې په نسبت سولې ته زیات میلان څرګندوي ، په سیمه او نړۍ کې هم د افغانستان د سولې په اړه ډیپلوماسي توده شوې ده.

خو له بلې خوا د تبلیغاتي جګړې میدان هم ډير ګرم او تود دی ، د جګړې هر لوری پدې هڅه کې دی چې د خپلو افرادو روحیه لوړه وساتي ، د افغانانو ملاتړ تر لاسه کړي ، په سیمه او نړۍ کې د خپلې جګړه ییزې انګیزې لپاره مشروعیت تر ګوتو کړي.

امریکایانو او افغاني دوستانو يې د دولتي ملایانو غونډې جوړې کړې ، د طالبانو په خلاف يې فتواګانې ورکړې ، د مسجد الحرم د امامانو له قوله يې دطالبانو د مبارزې په اړه ډول ـ ډول انتقادي څرګندونې نقل کړې ، د سولې طرحې يې وړاندې کړې ، د خپلو وژل شوو جنګي قوماندانانو او نورو شخصیتونو د درناوي لپاره يې پراخه تشریفاتي مراسم ترسره کړل ، د دوی په پيژندګلوي کې يې ډير زیات له مبالغې ډک رسنیز فعالیت وکړ…

خو له بل پلوه طالبان هم کرار ندي ناست ، د خپلو دښمنانو د دولتي ملایانو فتواګانې يې سختې وننګولې دا يې خپل ولس او نړیوالو ته وښودله چې د مسجد حرم امامان یو ډول یرغمل شوي دي او کومې څرګندونې چې کوي د یو لړ فشارونو له وجې يې کوي ، د ګډ حکومت د سولې طرحه يې یوه تېرایستنه تلقي کړه او پر ځای پخپل لاس کې د سولې ابتکار د جګړې له اصلي لوري سره واخیست چې دوی ته يې تر اوسه یو څه مثبتې پایلې هم درلودلې دي او تر څنګ يې خپلو رسنیزو فعالیتونو ته هم زور ورکړی دی ، له ولسي افغانانو سره د ګډو ځواکونو ظلم او وحشت په ډيره ښه او مستنده توګه منعکسوي ، په جګړه کې د خپلو بریاؤ ويډیويي راپورونه خپروي ، کوم کارپوهان چې د بهرنیانو او ګډ حکومت په اړه انتقادي څرګندونې کوي هغه ډیر په بیړه له سره ايډيټ کوي او په ټولنیزو شبکو کې يې خپروي ، په ټولنیزو شبکو کې يې فعالان ډير زیات فعال دي او تر څنګ يې د خپلو سرتیرو بریدونو په اړه مستند فلمونه خپروي ، په دغو فلمونو کې دوی د خپلو سرتیرو بریدګرو معرفت وړاندې کوي ، ډير يې ستايي ، د خپلې داعيې د حقانیت په اړه ډيرې مدللې خبرې وړاندې کوي ، د خپلو  سرتیرو بریدګرو له پوځي روزنې څخه اخیستل شوو ژوندیو انځورونو ته ځانګړې توجه کوي او د خپلو ترسره شوو سرتیرو بریدونو په ډير عالي کیفیت جوړ شوي موډلونه او له بریدونو څخه اخیستل شوې حیرانوونکې ويډیوګانې وړاندې کوي.

د (۲۰۱۸) کال په (اګست) میاشت کې طالبانو د (الهجره) له ټلویزوني کانال څخه د فاتح کاروان (۱۲) په نامه یو (۷۳) دقیقه يي فلم خپور کړ چې په ټولنیزو شبکو کې د دوی د کاربرانو له لوري ډير زیات استقبال شو ،پوځي مانورې يې سرته رسولې وې او د سرتیرو بریدونو اخیستل شوې ژوندۍ ويډیوګانې وړاندې کړې وې او اوس يې د روان میلادي کال د نوومبر په (۲۷)د بدري لښکر (۷) په نامه یو ډیر جالب فلم خپور کړ ، دا () دقیقه يي فلم په عالي کیفیت جوړ شوی دی ، سرتیرو بریدګرو پدې فلم کې ډير اغیزناک پیغامونه ورکړي دي دا فلم د پکتیا ولایت په امنیه قومندانۍ په هغه مشهور سرتیري برید جوړ شوی چې بهرنیان او د دوی داخلي دوستان يې سخت ولړزول او د پکتیا د امنیه قومندان(توریالي عبدیاني) په شمول ډير زیات شمیر دولتي ځواکونه پکې ټپیان او ووژل شول ، ویل کیږي دا برید له هغه هاموې ټانګ څخه په استفادې ترسره شوی ؤ کوم چې طالبانو د پکتیا ولایت د جانې خیلو ولسوالۍ د نیولو پر مهال له دولتي ځواکونو څخه نیولی ؤ.

پدې فلم نړیوالو مشهورو کارپوهانو هم تبصرې کړې دي ، داسې ښکاري چې دا فلم د کابل د حکومت په اوسنیو او پخوانیو چارواکو هم ډير دروند تمام شوی دی ، دوی د دې فلم د پیکه کولو په موخه په ټولنیزو شبکو کې د خپلو حسابونو پر مخ هڅه کړې ده  له نورو لورو سره تړاو ورکړي ؛ خو د خپلې ادعا لپاره يې هیڅ ثبوت ندی وړاندې کړی .

د طالبانو دغه ډول فلمونه ډير زیات اغیزمنونکي دي ، د دوی افرادو ته زیاته روحیه ورکوي او د مقابل لوري افراد چې دغه فلمونه ګوري زیات مایوسه کیږي ؛ ځکه طالبان خپل وژل شوي افراد ستایي خو له بل پلوه بیا داسې راپورونه ورکول کیږي چې د وژل شوو عسکرو مړي له زیاتو خرابیدو وروسته خپلو کورنیو ته سپارل کیږي ، د جنازو مراسم يې هم ډير کمرنګه وي او حکومتي چارواکي يې هم د یاد لپاره کوم پروګرام نلري.

د چارو د شننوکو له انده د اوس لپاره داسې ښکاري چې طالبان د نظامي ډګر په څېر په تبلیغاتي میدان کې له بهرنیانو او د دوی له افغاني دوستانو څخه څو ګامه  وړاندې دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close