جهاد اوجنګ

فضل الله مخبت

هرمجاهد بايد د پورتنيو کلماتو په فرق او يو له بل څخه په تفکيک باندې پوه شي ـ اسلامي شريعت د جهاد لپاره يو لړ خاص قواعد او قوانين وضع کړي دي ،چې د دغه قواعدو د نه مراعاتولو په صورت کې  بيا جهاد خپله اصلي بڼه د لاسه ورکوي او د نورو عاميانه او مروجو ،عنعنوي ،قومي او ملي خپلمنځي جګړو شکل غوره کوي او مجاهد هم په دغه وخت کې د يو جنګيالي پرته بل هېڅ امتياز نه لري البته عندالله يعني د الله په نزد

دا چې دغه اصول او قواعد څه دي او د جهاد او جنګ تفکيک او فرق په څه کې دى ؟

هيله ده دا سلسله راسره تعقيب کړئ! .

دفي سبيل اللّه جهاد شرائط : د في سبيل الله جهاد څخه مطلب او مقصد يوازې او يوازې په خپل سر د وينو تويول ، وژل ،ورانول او نا آرامي جوړول نه دي ، بلکه دا يوه أصولي مبارزه  ده چې د اسلامي شريعت د سپېڅلو أصولو له مخې د ځانګړو شرائطو له مخې ترتيب او اداره کېږي ، کوم چې د دغه شرائطو په مراعاتولو او د شريعت په لارښوونو باندې د پل اخستلو په صورت کې جهاد کما حقه او څنګه چې شريعت ته مطلوب دى (يعني څنګه چې د شريعت غوښتنه ده) اصلي شرعي جهاد ګرځي کوم چې الله رب العزت يې د مرستې ، نصرت او بريا ذمه اخيستې ده ـ

د دغه د شرائطو په لړ کې تر ټولو لمړني شرط باندې پيل کوو ـ

(1):- لمړى شرط ايمان : دا هغه ځواک دى چې د عصري نړۍ هېڅ أټومي قدرت د هغه د تصميم او ارادې مخه نشي نيولاى ، اللّه جل جلاله په قرآن کريم کې د مٶمنانو په صفت بيانولو کې د هغوى د اعمالو تر مخ هر وخت د ايمان وصف مقدم کړى دى لکه

 و الذين أمنوا وعملوا الصالحات أولئك أصحاب الجنة هم فيها خالدون  (الاية 82 البقرة)

الَّذِينَ يُؤْمِنُونَ بِالْغَيْبِ وَيُقِيمُونَ الصَّلَاةَ وَمِمَّا رَزَقْنَاهُمْ يُنفِقُونَ (الاية 3البقرة)

او ـ ـ ـ ـ

د ايمان د شرط د نه موجوديت په صورت کې هر څومره نيک او لوى اعمال د الله تعالى په دربار کې د منلو وړ نه دي او نسياً منسيا دي

مجاهد تر هر څه د مخه بايد يو سوچه مٶمن وي ، د الله تعالى په وحدانيت ، حشر ، محاسبې او د اعمالو  جزاء ، اللهي قضا او قدر ، ټولو مٶمن به شيانو او غيبي أمورو پوره باور او يقين ولري ؛ دالله تعالى هره فيصله ورته په سر سترګو قبوله  او منظوره وي او ورته تسليم وي، او د اللهي امتحاناتو په مقابل کې د بې  صبرۍ او سرکشۍ څخه کار وانخلي ـ

مجاهد بايد په دې پوره باور او يقين ولري چې هر څه د الله تعالى جل جلاله د ارادې له مخې تر سره کېږي ، او همدغه ذات دى چې د فتحې او ناکامۍ فيصلې کوي ؛ په دې بايد پوره يقين ولري چې ماتې او برى د الله تعالى د تقدير له مخې دي  نه د دښمن د مادي تاثيراتو له مخې ـ

مجاهد بايد په دې باندې هم پوره باور او يقين ولري چې د اللهي قضا او قدر له مخې د هر چا لپاره د مرګ او مړينې يوه معلومه ورځ ټاکل شوې ده چې راتګ يې د يوې لحظې په اندازه نه شاته کېدلاى شي او نه وړاندې کېږي،

او د مرګ دغه ورځ د جهاد په سنګر ، د جنګ په شدت او مشقتونو پورې اړه نه لري

په دې هم بايد پوره باوري وي چې د الله تعالى په وړاندې د هر تکليف او مشقت په اندازه او په څو چنده زيات اجر او پاداش شته دى نو ځکه بايد د جهاد په سپېڅلې لار کې د بل هر ملګري څخه په خير او نېکۍکولو کې  د سبقت هڅې او کوښښونه وکړي تر څو د الله تعالى په وړاندې يې درجې لوړې او د اخرت د سختيو څخه د نجات او د کاميابۍسبب يې شي .

معلومه شوه چې د في سبيل الله جهاد لپاره د ايمان شرط يو لازمي او ضروي شرط دى او د مجاهد لپاره لازمه ده چې د ايمان د لرلو سره سره د ايمان په ټولو مقتضاوو باندې حتى الامکان او په پوره توان سره عمل وکړي.

مګر د في سبيل الله جهاد پرته د نور تعصبي ،عنعنوي او خپل سري جګړو لپاره نه يوازې ايمان لرل او د ايمان په مقتضاوو عمل کول شرط نه دي بلکه اصلاً دا جګړې د مٶمنانو کار نه وي او نه ورسره ښايي او که داسې جګړې د مسلمانانو تر مينځ يا د مسلمانانو له خوا څخه وي بيا هم مردودې او د سختې سزا وړ دي ـ

نور بيا ـ ـ ـ

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close