حماس د اسراییلي سرتېرو د ټلفونونو جاسوسي کوي

اسراییلي استخبارات وايي د فلسطین جهادي غورځنګ حماس د اسراییلي ځواکونو د موبایلونو په جاسوسي کولو توانېدلي، خو د زیات زیان تر رامنځته کولو وړاندې استخبارات د حماس په چل پوهېدلي دي.

اسراییلي ځواکونه (IDF) وايي، د حماس غورځنګ اوړند یوې شبکې په خواله رسنیو کې د جذابو ځوانانو او ښځو په جعلي حسابونو جوړولو سره، اسراییلي سرتېري په خپل جال کې رانیول، او په دې توګه یې هغوی د ځینو اپلیکېشنونو انسټالولو ته هڅول څو د هغوی د موبایلونو جاسوسي وکړای شي.

اسراییلۍ یروشلم پوسټ ورځپاڼې د لوړپوړو استخباراتي چارواکو له خولې لیکلي، شکمنو کسانو د خواله رسنیو او د پیغام لېږونکي سرویس واټساپ له لارې له نږدې ۵۰۰ سرتېرو سره اړیکه نیولې. دې کسانو اسراییلۍ ټیلیفوني شمېرې کارولې او سرتېري یې له ګوګل پلې سټوره د ځانګړو اپلیکېشنونو راکښته کولو ته هڅول.

استخباراتي چارواکو یروشلم پوسټ ته ویلي، حماس د WinkChat ، GlanceLove او د روسیې د فوټبال د نړیوال جام د مینه والو د ښکار لپاره د Cup-GoldenCup په نوم پیغام لېږونکي اپلیکشنونه کارول څو د اسراییلي ځواکونو ټلفونونه هېک کړي او د هغوی په اړه معلومات راټول کړي.

د حماس له لوري جوړ شوی GlanceLove اپلیکېشن
د حماس له لوري جوړ شوی GlanceLove اپلیکېشن

دې اپلیکېشنونو د اسراییلي ځواکونو په موبایلونو کې د ټروجان (Trojan) وایرسونه خپرول، چې په دې سره حماس کولای شول د دوی موقعیت، ټلفون کې شته انځورونو، پیغامونو او ټلفوني شمېرو ته لاسرسی ولري.

دې اپلیکېشنونو همداراز د حماس د هېکرانو شبکې ته د دې توان ورکاوه چې د سرتېرو د ټلفونونو کېمرې او مایکروفون ته لاسرسی ولري او په دې توګه د دوی له پوهېدو پرته انځورونه واخلي او خبرې یې ثبت کړي.

”د زړه ماتوونکي“ په نوم د استخباراتي عملیاتو په پایله کې، چې په تېره مارچ میاشت کې پیل شول، یوولس کسان ونیول شول چې د دې وایروسونو په خپرولو کې یې لاس درلود.

د حماس له لوري جوړ شوي اپلیکېشنونو اوس له ګوګل پلې سټوره لیرې کړل شوي دي.

Image result for israeli soldiers hacker

یو استخباراتي چارواکی وايي په دې عملیاتو سره د پام وړ زیان د منځته راتګ مخه ونیول شوه، خو بیا هم ”له شکه پرته کورني امنیت ته جدي ګواښونه متوجه دي“.

اسراییلي چارواکي یروشلم پوسټ ورځپانې ته ویلي، حماس په دې ډګر کې ”زیاته وړتیا لري“، او دا ځل یې جوړ شوي اپلیکېشنونه د پخوانیو هغو په پرتله اسراییلي سرتېرو ته زیات د باور وړ و. یوه بل چارواکي د GoldenCup اپلیکېشن په اړه ویلي، ”دا رښتیا هم ډېر غوره و.“

خو بیا هم، د هېکرانو دې شبکې د عبراني ژبې په لیکلو او ګرامر کې ګڼې ستونزې درلودې، چې اسراییلي ځواکونه یې شکمن کړي وو.

استخباراتي چارواکو همداراز ویلي چې زیات سرتېري د حماس په دام کې نه دي ګیر شوي او د شکمنو کسانو تر اړیکو نیولو وروسته یې خپلو قومندانانو ته خبر ورکړی و. د چارواکو په خبره، یواځې نږدې ۱۰۰ سرتېرو د دې ۳ اپلیکېشنونو له ډلې یو خپلو ټلفونونو ته کښته کړی و.

اسراییلي سرچینې وايي شکمنو کسانو له نارینه او ښځینه پوځیان دواړو سره اړیکې نیولې، چې زیاتره وخت به یې رومانټیکه بڼه درلوده، خو ښځینه عسکرو به د نارینه وو په نسبت ژر اړیکې ورسره پرې کولې.

اسراییلي ځواکونو خپلو عسکرو ته لارښوونه کړې چې په خواله رسنیو کې یوازې د هغو کسانو بلنې ومني چې دوی یې مخامخ پېژني، پټ معلومات له خپلو حسابونو خپاره نه کړي او سافټوېرونه، د تړوني له لارې د راکښته کولو پر ځای، یوازې له خپلو رسمي ځایونو راکښته کړي.

د یادونې وړ ده، تېر کال هم داسې راپورونه خپاره شوي وو چې حماس غورځنګ د اسراییلي سرتېرو د موبایلونو څارنه کوي او له دې لارې د هغوی په اړه استخباراتي معلومات راټولوي.

سرچینه
یروشلم پوسټ
ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close