کابل ټکی کام (شنبه، ۲۳ وږی ، ۱۳۹۸ل)
راتلونکو ولسمشریزو ټاکنو ته نوماند او دحزب اسلامي مشر ګلبدین حکمتیار له ګډ حکومت او امریکا غوښتي چې په حیا او پرده کې له دې هېواده ووځي.
حکمتیار وایي، افغانستان کې د دایمي سولې راتګ لپاره ترټولو اړین اقدام دادی چې بهرني ځواکونه له افغانستانه په حیا او عزت کې ووځي.
نوموړي دطلوع نیوز خبري شبکې سره په یوه ځانګړې مرکه کې وویل، د وتلو په صورت کې بهرنیان باید اوسنی تپل شوی حکومت هم له ځان سره انتقال کړي.
ښاغلي حکمتیار پرته له دې چې د چا نوم واخلي وویل، اوسني مشران بهرني پاسپورټونه او ګرین کارډونه لري، اولادونه یې بهر دي، نو سخته به نه وي چې له افغانستانه ولاړ شي.
د امریکایانو او طالبانو ترمنځ د سولې د خبرو د ختمېدو په اړه ښاغلي حکمتیار زیاته کړه، د خبرو درولو په اړه د امریکا پرېکړه ناڅاپي وه او د طالبانو په ګډون هېڅوک یې هم په دلیل پوه نشول.
حکمتیار پر امریکا اوطالبانو غږ وکړ چې بغیر له سیاسي لارو داقضیه دحل وړ نده باید دواړه خواوې یو ځل بیا سره کښیني، ترڅو داپروسه نهایي کړي.
حکمتیار دیوې پوښتنې په ځواب کې وویل چې مسعود او امان الله دملي اتلانو په حیث نه پیژني، ځکه چې دوی هیڅ داسې کړنې ندي کړی چې داملت پرې ویاړ وکړي.
ددې خبرو په دوران کې دهیواد مشهورې سندرغاړې نغمې له حکمتیار وپوښتل، که ولسمشر شي، اجازه به ورکړي تر څو دکابل غازي لوبغالي کې مینوالو ته کنسرت اوسندرې ووایي؟
حکمتیار دنغمې په ځواب کې زیاته کړه، که اسلامي نظام راشي، نه به ددې جرئت اونه شوق وکړي، بلکه دجګړې لومړیو کرښو ته به تلل وغواړي تر څو ویاړلی تاریخ جوړ کړي.
