خليلزاد له افغان چارواکو سره تر کتنې وروسته نن پاکستان ته ولاړ

(کابل ټکی کام، ۱۳۹۷، تله ۱۷)

د افغانستان د سولې په چارو کې د امریکا ځانګړی استازی زلمی خلیلزاد نن وروسته له هغې اسلام اباد ته ورسېد چې تيره ورځ يې د افغان حکومتي چارواکو او مشرانو سره د افغان سولې په تړاو خبرې کړي.

د امريکا د بهرنيو چارو وزارت ځانګړي استازي زلمي خلیلزاد پرون، د ولسمشر غني، اجرائيه مشر ډاکټر عبدالله سربيره له حامدکرزي، استاد سياف او نورو لوړپوړو دولتي چارواکو سره هم ليده کاته کړي دي.

په هغه کتنه کې چې د حامد کرزي په دفتر کې جوړه شوې وه په کابل کې د امريکا سفير هم برخه لرله او له ټولو چارواکو سره د افغان سولې په تړاو بحثونه او خبرې شوي دي.

تازه راپورونه وايي، چې زلمی خليلزاد د افغان سولې په تړاو نن سهار اسلام اباد ته رسېدلی څو په دې برخه کې له هغه هېواد څخه مرسته وغواړي.

خليلزاد د پاکستان د بهرنيو چارو وزارت له مرستيالې تهمينه جنجوعه سره کتلي او د دغه وزارت وياند ډاکټر فيصل ويلي چې په دغه ليدنه کې د دواړو خواوو پوځي، امنيتي او ديپلوماتيکو چارواکو ګډون درلود.

د امریکا له خوا خليلزاد ته د سولې بهير له سپارلو وروسته د نوموړي دا لومړی سفر دی چې افغانستان او پاکستان ته يې کوي.

په عين حال کې په کابل کې د امریکا سفارت په يوه بيان کې ويلي چې ښايي نوموړی د افغان سولې په تړاو متحده عربي اماراتو، قطر او سعودي عربستان ته هم سفر وکړي.

د امريکا د سولې استازي که له یوې خوا د سولې هڅې پيل کړي خو له بله پلوه د امریکا او ناټو ځواکونو لوی قوماندان په عين حال کې وايي چې افغانستان کې به جګړه تر ډيرو کلونو دوام وکړي او د دوی ماموريت به هم دوام کوي.

د شنونکو په باور، د امريکا د سولې په تړاو هڅې او د امريکايي ځواکونو او افغان چارواکو وروستۍ څرګندونې هغه څه دي چې امريکا لا هم په افغانستان کې ريښتينې سوله نه غواړي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close