دا زما کلی زما قام دی ـ یار

غزل

جانان خدرخېل

دا زما کلی زما قام دی ـ یار

دلته مئین سړی بدنام دی ـ یار

دا زما سترګې، ستا د پښو خاورې

د محبت دغه انجام دی ـ یار

زړه تر حرمه هم سپېڅلی وي

دا عاشقي داسې مقام دی ـ یار

نن چا یو ځلي را کتلي دي

نن مې دا زړه یو څه آرام دی ـ یار

زوی یې د کوز کلي ډمتوب کوي

پلار یې د بر کلي امام دی ـ یار

دومره ډاډه مې خوا ته مه راځه

زړه مې نری دی او ماښام دی ـ یار

نوي ساقي ته خو دې پام دی یار !؟

نن د زاهد په لاس کې جام دی ـ یار

د “خدرخېل” به شاعري څه وي

خو ستا له سترګو نه الهام دی ـ یار

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close