دجال څوک دی؟

لیکوال:ــ یارمحمد معصوم

دجال یا زموږ او ستاسي دسیمو په لهجه خرجداد دحضرت ادم علیه السلام له اولاد څخه دی،په خټه یهودي دی؛
سور رنګی ځوان دی،لنډه ونه،ګوړګوتي ویښتان،پلن یعنې اوږد تندی او پلن غټ ورمیږ لري؛
په ښی سترګه ړوند دی،پر تندي یې کفر لیکل شوی دی،چې هر یو مسلمان لوستونکی او نه لوستونکی به یې لوستلای شي،هغه به شنډ وي یعنې اولاد به یې نه کیږي…
په اړه یې امام بخاري رحمة الله علیه له حضرت عبدالله ابن عمر رضي الله عنه څخه روایت را نقل کړی هغه فرمایي:چې پیغمبر صلی الله علیه وسلم فرمایلي دي:په داسي حال کې چې زه بیده وم خوب مې ولید چې له کعبي څخه طواف کوم،ناڅاپه مې یو سور غټ سړی په نظر راغی ګوړګوتي ویښتان یې وو،ښی سترګه یې ړنده وه،سترګه یې د راپورته شوي انګور په څیر وه،ماپوښتنه وکړه چې دغه څوک دی؟
هغو ځواب کوونکو وویل چې دغه دجال دی،هغه ته ډیر ورته په خلګو کې دقطن زوی دی.
دلته به تاسي ته هرومرو پوښتنې پیدا شي چې دجال ته ولي مسیح دجال وایې او څه وخت به راوزي؟
نو دلمړی پوښتنې جواب دادی:
دجال ته مسیح دجال ځکه وایې: چې سترګه یې مسخ شوې ده او دجال ځکه ورته وایې: چې هغه به باطل دحق په نوم او شکل کې خلګو ته وړاندې کوي؛
یعنې دجل عربي لفظ دی او معنا یې په ظاهره یو شی او په باطن کې بل شي ته وایې.
په دې اړه پیغمبر صلی الله علیه وسلم فرمایلي دي:چې ددجال له اور څخه مه بیریږئ هغه دوکه کوونکی دی،حق یې په درواغو او باطل سره پټ کړی دی،که دهغه اور مو ولید نو پوه شه چې په تحقیق سره هغه سړې،خوږې او پاکې اوبه دي.
ددوهمي پوښتنې جواب دادی:دجال به هغه وخت راوزي کله چې لمونځ پریښودل شي،په امانت کې خیانت وشي،په شریعت حکم کول کمزوری شي،ظلم او تیری فخر وګرځیږي،واکمنان بدکرداره بدسلوکه خلګ شي،قاریان فاسقان شي،زنا او بدکارې عامه شي،سود کول عام شي،خپلولي له منځه ولاړه شي،سندرغاړي او نڅا کوونکې ښځې را څرګندې شي،شراب چیښل،درواغ ویل او رشوت اخیستل پیل شي،دوینو تویدل بې پروا شي،دین په دنیا خرڅ کړل شي،ښځه له میړه سره یو ځای سوداګرې پیل کړي،نارینه له ښځو سره او ښځې له نارینو سره یو شانته والی غوره کړي،زړونه له مروت او میړاني څخه خالي شي،معروف منکر او منکر معروف شي…
نو هله به دجال راووزي او په نړۍ کې به فتني خپري کړي دهغه له فتنو څخه به یوه داهم وي،چې یوه کوچي ته به ووایې چې که زه ستا مور او پلار را ژوندي کړم نو بیا ته ما په خدایې سره مني؟نو هغه به ورته ووایې چې هو،نو شیطان به دهغه دمور او پلار په شکل کې ورته راپورته شي،او ورته وبه وایې :چې آی ګرانه زویه دهغه تابعداري وکړه هغه ستا رب دی.
او ددجال له فتنو څخه بله داده: چې اسمان ته به امر وکړي چې اورښت وکړه نو هغه به اورښت وکړي؛
ځمکې ته به امر وکړي چې زرغونول وکړه هغه به زرغونول وکړي…
نو ګرانو وروڼو که هر څوک هره جمعه سورة الکهف تلاوت کړي نو له هغې فتنې څخه به په امن کې وي چې ددغې او بلې جمعې تر منځ راځي،او که ددجال فتنه هم په کې وي،الله تعالی به یې ترینه وساتي.

ــ نو الله تعالی دي ټول مسلمانان وروڼه او خویندې هغه که په هرځای کې استوګن وي ددجال او نورو فتنو څخه وساتي. امین ثم امین

معصوم زابلی

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close