دسولې په اړه بايد دوه اصلي اړخونه؛  طالبان اوامريکامذاکرات وکړي

د ملګروملتونو د امنيت شورا چې  دا وخت زيات شمېر هېوادونه دکورنيو جګړو او بهرنيو بريدونوسره  مخ دي،  بيړنۍ غونډې کوي، چې داپه  جګړه کې ښکیل هېوادونه  دجګړې له اوره  راوباسي . ديمن  په اړه غونډه چې موقتي  اوربندپکې په نظر کې نيول شوی  و، دعراق اوسوريې په اړه غونډه چې په سوريه کې دبشرالاسدپرخلاف اوملاتړو هېوادونوپه اړه پکې بحثونه وشول.  د افغانستان په اړه  دتېرې اونۍ  غونډه چې  دافغانستان لپاره ځانګړې شوې وه، د افغانستان دسولې په په اړه پکې بحث وشو، چې  دافغانستان په روانو حالاتو امنيتي اندېښنه  زياته شوه .

دامهال عراقي پوځونه  د داعش ډلې سره د رمادي ښار دنيولو  لپاره په جګړه بوخت دي.  او افغان پوځونه  د طالبانوسره په هلمندکې جګړه کوي،  چې دځنې راپورونو پر اساس هلمند ته دنورو مرستوپه نه رسيدو طالبانو دسنګين ولسوالي له دولتي ځواکونونه نيولې . که څه هم هلمندي چارواکي يې  نه تسليموي خو دا اعتراف کېږي چي نورې قواوې  ورته تردې دمه  نه دي رسيدلي.  لکه څرنګه چې موجوده اداره  په جګړه کې  پرطالبانو بریا نشي ترلاسه کولی او بيا دناټو هوايي ځواکونه جګړې ته داخل شي دارنګه دسولې په اړه هم هېڅ نشي کولای. دجګړې ميدان،  دسيمې نيول اودلاسه ورکول امريکايي ځواکونواوطالب وسله والوته پاتې شي؛  نوپکارده چې د سولې په اړه مذاکرات هم دوه اصلي لوري امريکا او طالبان وکړي ،ځکه  جګړه  همدې دوو خوا وو  پورې تړلې ده . دطالب وسلوالو سره چې دجګړې وروستۍ فيصله امریکا کوي بايد سوله هم دامریکا او طالبانو ترمنځ وشي په روانو حالاتو کې دهېواد په نهو ولاياتو کې سختې جګړې روانې دي که امريکايي پوځونه دافغان ځواکونو مرسته ونکړي دا نهه ولايته ددولت  له  لاسه وتلو په  حال کې دي.

دا چې وروسته پرېکړه بيا امريکا ته پاتې کېږي دولتي چارواکي له امريکايي مشرانو دطالبانوسره دسولې په اړه مشورې اخلي نو ددې دواړو لوريو امريکا او طالبانو ترمنځ مذاکرات نتيجه ورکولای شی . بين الافغاني مذاکرات هغه وخت نتيجه ورکولای شي چې واک ولري. دطالبانو ددې پاليسۍ او دريځ ځواب چې ټول بهرني پوځونه دي له افغانستان ووځي بيا به مذاکرات دکاميابۍ بڼه غوره کړي، افغان مذاکراتي پلاوي يې نشي ورکولای ځکه افغان پلاوي په مذاکراتو کې دطالبانو سره دپرېکړې اختيارنلري او نه دا ډاډ طالب  مذاکراتي پلاوي ته ورکولای شي ، چې ټول بهرني پوځونه به دټاکلې نيټې پورې له افغانستانه وځي خو امريکا بيا دا کولای شي چې په مذاکراتو کې دطالب مذاکراتي پلاوي سره همدا ډول ژمنه او پرېکړه وکړي . زمونږ چاوراکي او په ځانګړې توګه ولسمشر اشرف غني په وار  وار  ويلي چې ګاونډيان او په طالبانو اثر لرونکی پاکستان ورسره دسولې په اړه ژمنې کړي دي؛ خو يوه يې هم عملي کړې نده. مونږدامنو چې په ځينو طالب مشرانو به دپاکستان اثر وي خو اثر او کنترول توپير لري . پاکستان بيابيا دسولې وعده کړې خوکه پرطالب مشرانو يې واک درلودلی ، دخپل دريځ نه به يې اړولي وای. پاکستان خپله وسه کړې خو داچې طالبان يې تراوسه دخپل دريځ نه نه دي اړولي نه پرې کنترول لري او نه دومره اثر پرې لري چې سوله پرې ومني البته ديوه ګاونډي په  حیث مذاکراتو ته  د کېناستلو په  اړه به مرسته وکړي ؛ خو بيا هم دا مذاکرات بايد دجګړې د اصلي دوو خواوو ؛  امريکا او طالبانو ترمنځ وي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close