دوه ماڼیو امریکا ونړوله

نعمان لطیف

په نن ورځ د امریکا په نیویارک ښار کې له دؤو اسمانڅکو ماڼیو سرې لمبې پورته شوه؛ داسې ژبغړانده لمبې چې سپېره او تور بدمرغه دودونه یې کابو په ټوله نړۍ خپاره شوه او دنړۍ چاپېریال یې داسې ګنده کړ چې آن دنړۍ جغرافیه یې دتغیر تر بریده رسولې ده
که څه هم په نړیوال تجارتي مرکز دبریدګرو دهویت په اړه د پېښو نړیوال څېړونکي لا تر اوسه یؤه خوله نه دي او ښکاري هم داسې چې دیاد برید اصلي عاملین تر ډېره څرګند هم نشي. البته هغه څه چې څرګند دي هغه دا دي چې د تجارتي ماڼیو تر نړېدلو دوې میاشتې وروسته، په مادي او پوځي لحاظ دنړۍ تر ټولو غښتلي هېواد، دنړۍ د تر ټولو په نستمن، وروسته پاتې او کمزوري هېواد دتوغندیو او بمونو باران پیل کړ

دسپتمبر تر خونړۍ پېښې را وروسته د امریکا خارجه وزیر کولن پاول په یؤه قهرجنه وینا کې وویل:《هغه خلک په ناسم پوهاوي کې ښکېل دي چې د ودانیو په نړولو او دخلکو په وژلو، دسیاسي موخو ترلاسه کولو په سوچ کې دي》 خو په افغانستان کې امریکایان دخپل قول او فعل سره په ستر ټکر کې واقع شول، ددوی په وینا دترهګرو د له منځه وړلو او دخلکو دخوښې پراخ بنسټه نظام (ډېموکراسي) دقائمولو په پلمه یې داسې نامرده او خونړۍ وژنې او نړؤنې وکړې چې د امریکا او په ټوله کې دهمکارۍ له نومه خلکو ته استفراق ورتله
تر دې چې دسختو وژنو، نړؤنو او بمبارونو له امله د امریکا له لورې د کښېنول شوي لاسپوڅي واکمن حامد کرزي غونی ځیګ شو او له امریکایانو یې وغوښتل چې نور بمبارونه بند کړئ خو د کبر په نشه خمار امریکایانو داسې ستوغ ځواب ورکړ: موږ دخپلو کارونو لپاره خپل مهالوېش لرو

دلته امریکایانو بسته کلي ونړؤل، په یوه کلي کې ۹۳ نفر دسخت بمبار له امله په شهادت ورسېدل خو کله چې دپنټاګون ویاند وپوښتل شو، په ډېر غرور یې وویل: دغه وګړي ځکه ووژل شول چې موږ ددوی وژل غوښتل
یعنې دطالبانو پلویان ؤل، یا یې طالبانو ته ځای ورکړی ؤ، یا له دې کلي زموږ په پوځیانو ډزې کېدلې …….
بسته کورنۍ یې له منځه وړي دي، داسې کورنۍ راته معلومي دي چې تنها همهغه وګړي یې ژوندي پاته دي چې دبمبار او چاپې په شپه له خپله کور بهر پاته شوي دي، یا ښار ته تللي دي، یا دکوم خپل او خپلوان کور کې یې شپه شوې ده او یا خارج کې مسافر دي

جورج بُش چې په نیویارک کې دتجارتي ودانیو په نړېدلو یې د اسلامي امارت نړؤلو او د تاریخ سازه افغانانو وژلو ته پلمه جوړه کړه؛ که څه هم په پیل کې یې دملا محمد عمر ‘رح’ په لاس قایم کړای شوی اسلامي نظام ونړاؤه خو په نړولو یې د امریکایانو بېخ هم وخوت.
۱۷ کاله وروسته یې اقتصاد مخ په ځوړ روان دی، خارجي سیاست یې دخپلمنځي دعوو او ناندریو ښکار دی، فلورېډا ایالت کې چې متحده ایالاتو ته د ملا د تیر حیثیت لري، د ریفرنډم تابیا نیولای کیږي او په نړیوال فورم د باؤر او اعتماد وړ ملګري هېوادونه یو ـ یو له لاسه ورکوي

په اوس کې امریکایي اتباع د نړۍ تر ټولو منفور اتباع پېژندل کیږي او د نړۍ په هر ګوټ کې امریکایی وګړو ته مرګ انتظارونه کوي؛ دا هر څه دبُش دهغو دعوو خلاف دي چې دجګړې په پیل کې یې کولې
۱۹۹۷م کال کې د امریکا ددفاع محکمې په یؤه تبصره کې ومنله چې د نړۍ په پېښو کې د امریکا دحکومت لاس وهنې د امریکایانو خلاف نفرتونه پاروي؛ همدا خبرې کټ مټ جیمي کارتر هم تر ریاست کولو وروسته کړي وې
کارتر ویلي ؤ: که تاسې شام او اردن ته ولاړ شئ، هلته به د امریکایانو پر وړاندې د کرکې توپانونه ووینئ. دا ځکه چې موږ په هغوی بې شمېره بمونه ورولي دي او ددغو سیمو بېګناه خلک مو په ډېره بې رحمۍ وژلي دي، هلته خلک موږ ته شیطانان وایي

که ۱۷ کاله وړاندې په نیویارک ښار کې د اسمانڅکو ودانیو نړونکي دتاریخ له پاڼو ورک دي؛ نو هغه اتلان دتاریخ له پاڼو نه شي ورکېدلای چې مغروره امریکا یې د نړولو په درشل درولې ده
تاریخ به دطالبانو بې سارې مېړانه هېره نه کړي، دطالبانو دمشرانو په سويو او لولپه وجودونو او دطالب مجاهدینو وفا او شجاعت په اړه اېښودل شوي بابونه به دتاریخ مهم بابونه وي

د دؤو ماڼیو په نړېدلو امریکا ونه نړېدله خو دماڼیو تر نړېدلو وروسته دصدر بُش احمقانه او متکبرانه پرېکړې امریکا نړېدلو ته نېږدې کړې ده
امریکا دهغه خړپړ افغان عجز او انکسار ونړؤله چې له ډېره مجبوریته یې په يؤه تنګه خونه کې ساه ورکړه خو دمتکبرو امریکایانو غرور ته مات نشو او په ډېر باؤر یې امریکایانو ته وویل: اوس موږ دمذاکراتو لپاره عذر ـ زارۍ درته کوو، که یې ونه منئ داسې وخت به راشي چې بیا به تاسو دمذاکرانو لپاره عذرونه کوئ او موږ به یې نه منو.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close