غورځنګ
له کومه وخته چې امريکا پر افغانستان باندې يرغل کړی دی او په افغانستان کې يې د طالبانو نظام ړنګ کړی، له هماغه وخته بيا تر ننه پورې افغانستان او ګاونډي ملکونه بلکې ټوله اسيا داسې ناقراره ده چې هېڅ امن اوثبات پکې نشته، او د دغسې سیمې حيثيت داسې شوی لکه په يوه کوهي کې چې مرداره پرته وي نو د هغه کوهي اوبه څوک نه څښي او تر ډېره وخته بلکې تر هغه وخته بد بوی کوي تر کومه چې دغه مرداره نه وي ورڅخه پورته شوې نو په سيمه کې د امریکا موجوديت هم همدې مردارې ته ورته دی.
شنونکي په دې باور دي چې که چېرته له سيمې څخه امريکايي پوځيان ووځي او يا دامريکا لاس له دغې سيمې څخه مکمل غوڅ شي نو ايله به د دغې سيمې خلک د ارام ساه واخلي او د ژوند په خوند به پوه شي، نو ځکه خو بايد ووايو چې امریکايي عسکر زمونږ په سيمه کې داسې حيثيت لري لکه په کوهي کې چې مرداره پرته وي.
تر ټولو لومړی خو به په سیمه کې د امریکايي عسکرو په وتلو او د امریکا د لاس تر لنډېدلو وروسته د نشه يي توکو توليدات او قاچاق بلکل ختم او يا هم صفري نقطې ته راښکته شي، ځکه که فکر وکړو او تېر ته ځير شو نو وبه وينو چې په افغانستان او سيمه کې له هغه وخته وروسته د نشه يي توکو په زياته پيمانه او کچه توليد او قاچاق زيات شوی دی له کومه وخته چې امريکايانو يرغل او حمله کړې ده.
نو د امريکايانو په وتلو سره به دغه ناروغي له افغانستان او شا او خوا ګاونډ څخه ورکه شي.
همداشان په افغانستان او خوا او شا کې به په يوه او بل نامه خپل منځي مرګونه ورک او ختم شي، يعنې دا چې امريکاپر افغانستان باندې له کومه وخته حمله کړې ده نو له هماغه وخته بيا تر ننه پورې دسيمې خلک ټول سره په خپل منځ کې په جنګ اخته دي، يعنې څوک د امريکا په امر ترهګر ګرځول شوي دي او څوک بيا چې د امريکا غلامي مني او له دوی څخه پيسې اخلي؛ هغه بيا وطن ساتونکي نومول کېږي او تر ټولو مهمه ده چې د مذهب په نامه چې په اسلامي سیمو کې کوم جنګونه تر سره کېږي؛ دا يې بيا تر ټولو خطرناکه دسيسه او توطئه ده. لکه داعش چې خپل ځان په حقه بولي او نور ټول مسلمانان په باطله لار روان بولي، په داسې حال کې چې داعشيان د امريکايي ګټو د تضمين لپاره جنګېږي.
دغه شان د ژبې په نامه چې په سيمه کې کوم تعصبات روان دي او لا هم زور اخلي؛ نېغ په نېغه د امریکا په رهبرۍ تر سره کېږي. چې دغه ډول تعصبات يو ملت او يا هم يو هېواد بيا په څو برخو باندې وېشي او که ونه وېشل شي نو بيا د تعصب پر بنياد د بې اتفاقۍ داسې تخم پکې وشيندل شي چې بيا يې ورکول او له منځه وړل پېړۍ پېړۍ وخت نيسي.
نو ځکه شنونکي باور لري چې له سيمې څخه د امریکايي ځواکونو وتل به د دې سیمې د ثبات او امن د ټينګښت په معنا وي.
په دې وروستيو کې امريکا هم د سیمې نزاکتونه درک کړي دي او د افغانستان د جنګ په اړه يې خپله پاليسي ۱۸۰ درجې تغير کړې ده او دا ورته معلومه شوې ده چې د افغانستان کشاله د جنګ او زور له لارې حل نه لري بلکې کېدی شي د خبرو اترو او مذاکراتو له لارې د حل لار ورته وموندل شي.
خو د خليلزاد ننۍ خبره چې ( که مذاکرات ناکام هم شي، نو ټرمپ به لا ژر خپل عسکر له افغانستان څخه وباسي. چې د خليلزاد د دې خبرې تر شاه د امریکا او ټرمپ وارخطايي له ورايه ښکاري.
