د تورخم جنګ په تور زخم بدلیدی شي

ډاکټر آصف

د پاکستان حکومت په دې بهانه د تورخم په صفري نکته کې د دروازې د نصبولو اقدام وکړ چې ګوندې دغه حکومت حق لري چې د ترهګرۍ د مخنیوي په خاطر دغه ډول مؤثر ضبط او نسق رامینځته کړي، او د افغانستان حکومت په دې بهانه چې ګوندې پاکستان ولې په صفري نکته کې دروازه نصبوي دواړو د جنګ جګړې لپاره زمینه برابره کړه او د هوش پر ځای یې له جوش نه کار واخیست او بالآخره د جګړې اور یې بل کړ، پاکستان دا فکر نه کوي چې که دا کار د ترهګرۍ د مخنیوي له امله کوې نو ترهګر خو هیڅکله د پاسپورت یا ویزې او یا هم د تورخم له لارې تګ راتګ نه کوي، د افغانستان او پاکستان تر مینځ داسې ډیری لارې شته چې هغوی ورباندې تګ راتګ وکړای شي، او د افغانستان حکومت هم که د جنګ جګړې بهانه نه جوړولی نو بیا ولې د چمن په پوله یې د ورته دروازې په اړه غبرګون قدری هم نه دی ښودلی، همدا راز همدا اوس د پکتیکا سره په پرته پوله کې پاکستاني ځواکونه ورته دروازه جوړوي خو هیڅ حکومتی چارواکی پری غوږ هم نه ګروي، همدا راز پخوا د ګوشتې په ولسوالۍ کې هم ورته دروازه جوړه شوې وه چې یوه نیمه ورځ جګړه هم پرې وشوه او د یوه سرتیری په وژل کیدو ټوله لوبه پای ته ورسیده خو تر ننه د ملت په سترګو کې خاورې واچول شوي او د ګوشتې د تاسیساتو په اړه حکومت ملت ته سم حال نه وایي چې بالآخره هلته څه وشول او قضیه څه ډول پای ته ورسیده.

د تورخم لوبه به هم بالآخره همدغه ډول پای ومومي هم به دروازه جوړه شي او هم به حکومتونه خپل کار وکړي او د ملت په سترګو کې به خاوری واچوي خو متاسفانه چې د غریبو خلکو بچي به د دغه اور د جنګ خاشاک وګرځي او بس.

حکومتونو ته د حکومتونو په حیث هیڅکله نه ښایي چی په هغه اقدام لاس پوري کړي چي هغه د ملتونو او ولسونو تر منځ د اړیکو د خرابۍ سبب شي، او سبا همدغه حکومتونه بیرته یو بل ته په استقبال کی په غاړو کې د ګلانو غاړګۍ اچوي خو ملت یې یو او بل ته په مورچل کې کینولی وي بلکې حکومتونو ته په کار دي چې د ولسونو او ملتونو تر منځ د ورورګلوۍ ، مینې او محبت فضا رامینځته کړي، نه د کرکې او نفرت فضا.

په تیره بیا د تورخم پوله د یوه داسې ملت او ولس په منځ کې موقعیت لري چې ټول د یوه نیکه اولاد دي ټول یو خیل یو قام او د یوه کلتور او یوه دین پیروان دي خو د پخوانیو حکومتونو د ورته غلطو اقداماتو په وجه په فرضي ډول بیل کړای شوي دي چې هیڅکله د بیلیدو نه دي، د سلو کلونو راهیسې دغه قام د تورخم په لار تګ راتګ لري چې په تیرو سلو کلونو کې په دغه ځای د دروازې نصبولو ته اړتیا نه ده پیدا شوي نو اوس کومه وحی رانازله شوې ده چې دغلته دروازه لګول کیږي. خو معلومیږی چې د پردې تر شا بل څه روان دي او هغه دا چې دغه ستر ملت باید ذلیل کړای شي ځکه چې یواځې په نیم کیدو باندی کار نه کیږي.

د پخوانیو حکومتونو د غلطو اقداماتو په وجه دومره شوي دي چې دغه لوی پښتون ملت او ولس یې په مینځ نیم کړای شو خو د تورخم فعلي ناورین به دغه دوه بیل شوي ملتونه په دښمنۍ واړوي، نو ځکه مو دواړو حکومتونو ته توصیه داده چې که دغه دوه نیم شوي ملتونه مو د کرکې او نفرت او دښمنۍ ښکار کړل نو پوه شئ چې تاسې به هم په همغه اور کې وسوزئ چې د دغه نیم شوي ملت د سوځولو لپاره مو بل کړی دی.

ولسونو او ملتونو ته په کار دي چي خپل اتحاد او اتفاق مینه او محبت او ورورګلوي د پخوا په شان ټینګه وساتي او نوره یی هم ټینګه کړي او پرینږدي چې غلیم د دوی تر مینځ د نفاق شقاق او دښمنۍ تخم وشیندي.

دغه ولس د یوې پیړۍ راهیسې نیم کړای شوی دی خو اوس توطیه داده چی راتلونکی یوه پیړۍ باید د دی غیور ملت په ټکولو تیره شي او ورپسې دریمه پیړۍ کې باید دغه باتور ولس د ځمکې له مخ نه ورک کړای شي، چې دا یو خیال دی او محال او جنون.

که د تورخم جنګ دوام پیدا کړی نو دواړه حکومتونه دی په دې پوه شي چې دوی د ملت په ټټر داسې تور زخم جوړ کړ چې رغیدل به یی بیا له امکان نه وتلي وي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close