د داعشيانو ليږدوونکي هليکوپترونه ولې له شرمه پرېنوتل؟!

ليکنه : مراد أنصار

د داعشيانو خروج ډيره دبدبه لرله ، په خپلو فلمونو کې به يې ځان داسې پياوړی انځوراوه  تا به ويل د نړۍ پر مخ له دوی سره د سيالۍ څوک نشته ، د هغو پهلوانانو په څير به د کمرو د دوربينونو په مخکې له تور هيبتي لباس او هيبتي نقابونو سره راڅرګنديدل چې په ډګر کې د زمري په څير ګرځي او څوک يې د مقابلې نه وي، ژبې يې د کپچه مارانو د نيښونو په څير ويستلې وې، نه يې د مسلمانانو اسلاف پريښودل او نه يې معاصرې علمي ، جهادي هستۍ  او خوځښتونه !

په ټولنيزو شبکو کې يې د خپلو حسابونو پر تندي ځانونه د سترو سترو لقبونو حقدار بلل او امتياز يې له ځان سره خوندي ساته، کوچنی او لوی يې خراساني ؤ ، له فکرونو ، ژبو او قلمونو څخه به يې د تکفير او ارتداد ټاپې د بي دوه پنځوس الوتکو د بمونو په څير په صادقو رجالو وريدلې ! تا به ويل چې د فرعوني امريکا بي دوه پنځوس فکري، لساني او قلمي الوتکې دي ، ريښتيا هم همداسې وې لکه بي دوه پنځوس الوتکې چې له لوړې ارتفاع څخه بمونه وروي دوی هم له عراق څخه په افغانستان او له اورګزو څخه په شام، يمن، سوماليا او نوره اسلامي او جهادي نړۍ د تکفير او ارتداد بمونه ورول !

د وياند هره خبره به يې اخطار او په مرګ ګواښل ؤ، ويل به يې يا موږ بې دليله ومنئ او يا ځانونو ته قبرونه وکيندئ، يو وخت مې دا خبره د پناه شوي مارژبي عدناني له خولې څخه د درنښت او وقار د يو ستر شخصيت او د طالبانو د شهيد ساروان د يو ليک په ځواب کې اوريدلې وه ما به فکر کاوه چې شايد د قبر کيندونکو ګراف به ډير لوړ او مارکيټ به يې ډير ګرم شي او کيدای شي د نړۍ د لويو شرکتونو تر منځ د قبر کيندنې د قراردادونو پر سر به يې تر منځ سخته سيالي پيل شي.

باقية باقية شعارونو به يې فضاء پر سر اخيستې وه !د فلمونو د نړۍ ريکارډ يې مات کړ، ځکه د نړۍ فلمونه زياتره تمثيلي وي، وحشتونه ، ظلمونه ، قتلونه، اورونه او بربادۍ پکې تمثيلي او غير حقيقي وي خو دوی به د خپلو فلمونو د جذاب کولو لپاره ټول وحشتونه ، ظلمونه ، قتلونه ، اورونه او بربادۍ په حقيقي ډول ترسره کولې ، انځورولې او وړاندې کولې. که کوم ريښتونی کافر به په لاس ورنغی د خپلو همسنګرو پروا يې هم نلرله ، فوراً به يې ذبحې ته چپه کړل ! د فلمونو قصابان يې هم زياتره هغه ناخبره ځوانان ؤ چې د غرب په کوڅو کې رالوی شوي ؤ  او په انګليسي به د انګليسانو په څير په درسته لهجه ګړيدلای شوای !

د دوی څيړنې او تجربې د نظامي تخنيک په پرتله د وژلو د طريقو په برخه کې زياتې وې، زما په فکر دوی د دې لپاره د څيړنو يو ستر مرکز لاره او د نړۍ له بيلابيلو برخو څخه يې د وژلو تکړه او ماهر قصابان راجمع کړي ؤ او  د وژلو د طريقو په برخه کې يې سترې لاسته راوړنې هم درلودې، د وژلو د طريقو ټول سابقني ريکارډونه يې مات کړل او له ليننيانو او جورج بوشيانو څخه يې د وژلو په برخه کې د نړيوالې اتلولۍ جام وګاټه ! د لينن د زامنو او د بش د کورنۍ د مرورتوب وجه له داعشيانو څخه همدا وه ، خو تور اوباما او هيلري کلنټن بيا د بوش په دغه ماته چې د امريکا د جمهوري غوښتونکو يوه پياوړې کورنۍ ده ډير خوښ معلوميدل ځکه يې سخت نازول او طالبان به هم چې کله ورسره په جنګ شول نو دوی به هڅه کوله چې د خپلو بمونو په زور داعشيان له څمليدو وژغوري او زوړ شيطان ليونی ټرمپ بيا په لومړي سر کې داعشيانو ته غوريده خو په پټه د ده هم ورسره مينه وه او هغه وخت به دغه مينې زور ترې وکړ او ترې ښکاره به شوه چې کله به طالبانو د دغه تورې بلا په تور مخ خپلې د حق درنې څپيړې راخلاصې کړې.

هوکې ! ريښتيا چې د ځمکې پر مخ هر څه پناه کيدونکي دي او يوازې الله به باقي وي، نن مې هغه مغرور داعشيان د سر په سترګو وليدل چې د جوزجان په ولايت کې هغه چاته ځوړند سرونه لاس په سلامي ولاړ ؤ څوک چې د نړۍ پر مخ تر ټولو زيات ذليل بلل کيږي، هم مسلمانان ترې زړه توري دي او هم يې اوس صليب په ملګرتيا شرميږي. څه موده له مخه مې له يو چا څخه واوريدل ويل يې په الله قسم ټرمپ خو په بروکسل کې د ناټو په سرمشريزه کې د سپينې ماڼۍ د يو نوکر په څير هم د ګډ حکومت دې دواړو شريکانو ته ونه کتل،دوی ډيرې زارۍ ورته وکړې چې لږ راسره څنګ ته شه، په دوه لويو الوتکو کې له پريمانه درباريانو سره له ډير لرې ځايه ستا د لمنې نيولو ته راغلي يو، هر څه ستا په پښو کې غورځوو، وايي هغه ډير ترې مرور ؤ ورته ويل يې زه مو وشرمولم ، ناټو مو وشرموله، زما ستراتيژي ستاسو له لاسه په شرمو وشرميدله، زه مو د يوې ټنګې کړم، هغه مياشتې مياشتې مشورې، هغه زما غرور او هغه اخطارونه تاسې په ځمکه وويشتل ، زه چې ژوندی يم نه به بيا درسره څنګ ته شم او نه به ستاسې په ( Yes  او Good-Good ) خطا شم .

د جوزجان د تسليم شوو داعشيانو بخت دا ؤ چې هليکوپترونه له شرمه ونه غورځيدل، زما يقين دی که له اول څخه هليکوپترونه پوه شوي وای چې په تاسې کې تسليم شوي داعشيان راوړو، داسې پښې به يې خرلې وای چې د چا پلار به هم له ځمکې څخه نه وای پورته کړي او که په لاره کې هم په دې پوه شوي وای چې داعشيان پکې سپاره دي له شرمه به غورځيدلي وای خو ظالم ګيلم جم هم په چل ول کې له چا کم نه دي، داعشيان يې داسې جوړ کړي ؤ تا به ويل د امر صاحب مسعود رفيقان دي او مشر ته يې پکول ور په سر کړی ؤ او دا کيدای شي روسي يا هندي هليکوپتر ؤ ، دوی لا له پخوا څخه له امر صاحب سره هم ډيره مينه لرله ځکه چې کله به دوی د روسانو له لوري د سابقني جهاد په دوران کې د سالنګ په کرښه راليږل کيدل، د آمر صاحب به خوله له خندا ورته ډکه وه ، ډير ښه روغبړ به يې ورسره کاوه او دې ته به يې پريښودل چې د کارمل زامنو ته ځان ورسوي او که دا هليکوپتر پوه شوي هم وي، په زړه به يې تيږه ايښې وي ، سترګې به يې ښکته اچولې وي داسې فکر به يې کړی وي چې موږ تاسو نه وينو، په موږ باندې د حنيف اتمر او ستانکزي چې دواړه زموږ د جوړوونکو ډير نيږدې رفيقان دي خاطر ګران دی او تاسو خو د هغوی نازولي ياست ، شرم به وزغمو خو تاسو به روغ ورسوو.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close