د داعش په ملاتړ حکومت خپل اوربند ختم کړ/ خالد روان

د پکتیکا پخواني والي عبدالکریم متین  د لومړي ځل له‌پاره د داعش له ډرامې څو میاشتې وروسته وویل، چې د ملي امنیت ځواکونو په پکتیکا کې دوه سوه زره ډالر وېشلي؛ څو د داعش په نامه وسله‌وال راپورته کړي. متین له دغه خبري کنفرانس وروسته له دندې گوښه شو او اوس د غزني برحاله والي دی.

درې کاله وړاندې د ولسي جرگې د هغه وخت مرستیال ظاهر قدیر د ملي یووالي حکومت تورن کړ، چې له داعش څخه ملاتړ کوي او په ننگرهار کې د حکومت له لوري داعشیان روزل کېږي، ځینې سیمې ورته په قصدي ډول پرېښودل کېږي او آن امریکايي الوتکو کې ځینو سیمو ته رسول کېږي.

قدیر په ښکاره وویل، چې په دې اړه کره شواهد هم لري؛ خو د قدیر کره شواهد ملت ته وړاندې نه شول او د گمرک په معامله کې یې ټول معلومات د امریکا سفارت ته وسپارل.

 که په کوم بل هېواد کې د حکومت کوم چارواکي داسې خبرې کړی وای؛ نو اوس به وختي د دار په تخته راځړول شوی وای؛ خو حکومت ځکه غوږونه کاڼه کړل، چې د کاسې لاندې نیم کاسه حتماً شته.

دوه میاشتې وړاندې د ملي امنیت پخواني رییس رحمت الله نبیل وویل، چې د ملي یووالي حکومت په لومړیو وختونو کې ترې غوښتل شوي وو، چې داعش ته پراخ تبلیغات وکړي او داعشیان د طالبانو په پرتله څو چنده غښتلي وښيي او د ملي امنیت ریاست په دغه برخه کې پراخ کار وکړ. خو ده ونه ویل چې د ملي امنیت څومره داعشیان وروزل او تر کومو ځایونو یې ورسول.

په ولسي جرگه کې د ننگرهار د خلکو استازي حضرت علي په ډاگه وویل، چې د ننگرهار ځینې چارواکي داعشیانو ته وسلې ورکوي، د دوی په موټرو کې مهمو ځایونو ته رسول کېږي او د ننگرهار په هوايي ډگر کې یې روزنه او تجهیز کېږي. له حضرت علي هېچا ونه پوښتل، چې دغه خبرې دې څومره سمې او کره دي؛ ځکه حکومت ډارېږي، چې ملت ته به باد بڼکه شي او په دې موضوع یوازې اورېدل کوي او له څېړنو تېرېږي.

د داعش د راپیداکېدو وروسته داسې خبرې لسگونه لوړ پوړو چارواکو کړي؛ خو حکومت هر ځل پرې چوپه خوله پاتې شوی. حکومت نه ملت ته ځواب ورکوي او نه په افغانستان کې مېشت امریکايي عسکر د خلکو اندېښنو ته ځواب وايي.

په ننگرهار کې د داعش او طالبانو په جگړه کې امریکايي او افغان هوايي ځواکونو په گډه داعشیانو د پرمختگ له‌پاره د طالبانو پر لیکو بمباري کړي. طالبان یې په لوی لاس داعشیانو ته کمزوري کړي او د طالبانو له ولکې یې ځینې سیمې ویستي دي. تېر ژمی په خوږیاڼیو کې د طالبانو او داعش په جگړه کې حکومت په رڼا ورځ داعشیانو ته وسلې ورکولې او د سیمې زرگونه کورنۍ یې کډه کولو ته اړې کړې.

د ننګرهار د خوږیاڼیو، پچیراگام، چپرهار، کوټ، بټي کوټ، اچین او نورو ولسوالیو له خلکو وپوښتئ، چې د طالبانو او داعشیانو ترمنځ هر ځل جگړه کې امریکا څوک بمبار کړي او څوک یې له سیمې ایستلي دي؟ په ننگرهار کې د طالبانو هغه خطونه له منځه یوړل شول، چې د داعشیانو د پرمختگ مخه یې نیوله. همدا دوه اوونۍ وړاندې په زاوه کې د طالبانو خط له منځه یوړل شو.

پرون په لغمان کې د طالبانو او داعشیانو ترمنځ خونړۍ جگړه پیل شوې وه؛ خو امریکايانو یوازې پر طالبانو بمباري وکړه؛ خو د طالبانو کلک مقاومت وکړ او سیمه یې له دغو فتنه‌گرو پاکه کړه.

حکومت دې نور د ملت په سترگو کې خاورې نه اچوي، بلکې په ښکاره دې ووايي، چې داعش د دوی او امریکا گډه پروژه ده او د امریکایانو له وتلو وروسته غواړي د دوی پرمټ افغانستان نویمو کلونو ته وروگرځوي؛ خو د طالبانو په موجودیت کې به امریکا دغه ارمان واشنگټن ته یوسي. دا ملت ړوند نه دی. د داعش راډیو له تېرو څلورو کلونو راهیسې په ننګرهار کې فعاله ده؛ خو د طالبانو راډیو په دویمه ورځ په غزني کې له منځه وړل کېږي.

لاندې د طالبانو اعلامیه هم کټ مټ لوستلی شئ!

په لغمان د داعشي فتنې جرړه وخته او ټول افراد يې ووژل شول

له څه مودې راهیسي د داعش په نامه فتنه ګر د لغمان ولایت الینګار ولسوالۍ د ګندګل درې سیمې ته را استول شوي وو چې ځانته په سیمه کې ځاله جوړه کړي.

د معلوماتو په اساس دغه فتنه اچونکي عناصر د جوړیګۍ ماسور، اسکین کندا او ګنده ګل لوی کلي سیمه کې ځای پرځای شوو او دلته يې د ولسو په ځورولو پيل کړي وو.

وروسته له هغه چې د اسلامي امارت د مجاهدینو لخوا څو ځلې دعوت ورکړل شو چې له شرارت څخه را وګرځي او د خلکو له ځورولو او اختطافونو لاس په سر شي، هغوی په کرارتو دعوت رد کړ او خپلې فتنې اچونی ته يې دوام ورکړ.

وړمه ورځ د اسلامي امارت د مجاهدینو لخوا هم پرې پراخ عملیات پيل شول چې نن ورځ ټوله سیمه له دغه شریرو عناصرو پاکه شوه.

د لوړو غرونو څوکې، لاندې آوارې د جوړیګۍ ماسور، اسکین کندا او ګنده ګل لوی کلي ټول يې له شتون څخه پاک شول، لسګونه وژل شوي افراد يې په سیمه کې پراته دي، د احتمالي ژوندي پاتو پسې يې هم د مجاهدینو لخوا تصفیوي عملیات روان دي. له داعشي اختطافګرو سره په جګړه کې ایله یو مجاهد شهید شوی.

بلې خوا تیره ورځ چې کله د اسلامي امارت مجاهدینو په دغو داعشیانو عملیات پیل کړل نو يې د حمایت لپاره امریکايي الوتکي سیمې ته را ورسیدې او د مجاهدینو په جنګي کمربند باندې يې بمبارونه پيل کړل چې له امله يې ۴ تنه مجاهدین د شهادت لوړ مقام ته ورسیدل.

د امریکايي حمایت او بمبار سره سره مجاهدینو د داعشي فتنه اچونکو په ضد خپلو عملیاتو ته دوام ورکړ او د لغمان ولایت یاده سیمه يې د هغوی له کرغیړن وجود څخه پاکه کړه.

د ننګرهار ولایت په ځینو شرقي ولسوالیو کې هم چې کله د اسلامي امارت مجاهدینو د داعش په نامه اختطافګرو په خلاف پریکنده عملیات پيل کړي، امریکايي الوتکی د داعشیانو حمایت ته را رسیدلي او نه پریږدې چې مجاهدین د داعش په نامه فتنې جرړې وباسي.

ذبیح الله مجاهد د اسلامي امارت ویندوی

۷/۱۰/۱۴۳۹هـ ق

۳۱/۳/۱۳۹۷هـ ش ــ 2018/6/21م

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close