د سوالي حکومت سوالي سوله

تبصره

په افغانستان کې له تېرو څلوېښتو کلونو راهیسې جګړې روانې دي. د هېواد په هره سیمه او دره کې د افغانانو کورونه په کنډوالو بدل شول، کلي یې په بمباریو کې ویجاړ شول، د بې ګناه او بې دفاع افغانانو هدیرې جوړې شوې، چې تر نن ورځې پورې په افغانستان کې د یرغلګرو د مرګونو عملیاتو او بمباریو په دوام هراړخیزه تباهي روانه ده.

په افغانستان کې د جګړې دوام د اسلاميت او افغانیت پر خلاف د یو شمېر بې ضمیرو، پردي-پالو او له خپل دین، مذهب، وطن او ولس سره د جفاکارو د کړنو او نظریاتو نتیجه ده. دوی د دې پر ځای چې له خپل دین، خاورې او ولس سره وفا وکړي، د یرغلګرو مقابله وکړي، وطن پلورونکو یرغلګرو ته یې د یرغل بلنه ورکړه.

بله بدبختي دا ده چې د یرغلګرو لخوا په هېواد کې جګړه په زور کې روانه او د هرې ورځې په تېرېدو سره جګړه  نور هم زور اخلي، خو امریکا او په کابل کې سوالي حکومت یې په کاذبو هڅو د سوال لیار نیولې ده.

 هیڅکله د سوال او کاذبو هڅو په زور د جګړې مخه نشي نیول کېدای. د امریکا او افغان سوالي حکومت لخوا د سولې په نوم کاذبې او سوالي هڅې اوس ټولې نړۍ ته څرګندې شوې دي.

غربی رسنیو ډنډوره کړې چې د سوالي حکومت یو شمېر غړو په سعودي عربستان کې له طالب استازو سره په دې غرض کتلي چې د راتلونکو پارلماني انتخاباتو پروړاندې خنډ واقع نه شي. یانې، طالب استازو ته یې د سوال ځولۍ غوړولې چې انتخابات له ناشونۍ سره مخ نه کړي.

د رویټرز خبري اژانس لیکلي چې افغان حکومت په سعودي عربستان کې د طالبانو له استازو سره د پارلماني انتخاباتو او طالب بندیانو د تبادلې په اړه خبرې کړې دي.

 طالبانو په وار وار د غربي رسنیو دا ډول تبلیغات رد کړي او دا یې د سوالي حکومت روانې سوالي او کاذبې هڅې بللې دي.

امریکا په افغانستان کې رښتیني جګړه پیل کړې، خو پخپله او په کابل کې په خپل لاس جوړ کړي سوالي حکومت یې د اندونیزیا او سعودي عربستان په شمول له زیاتو هېوادونو د سولې په تمه وړي کچولونه خالي راوړي دي.

په کابل کې له سوالي حکومت سره اندېښنه ده چې د ٢٠١٨ز کال د اکتوبر د میاشتې په شلمه پارلماني انتخابات کیږي، طالبان به د انتخاباتو پر مرکزونه بریدونه وکړي او انتخابات به ناشوني کړي.

د همدې غرض لپاره د کابل سوالي حکومت یو شمېر په کرایه اخستل شویو ملایانو ته کچکول ورترغاړې کړی او پاکستان ته یې لیږلي دي. د کابل حکومت هغه کرایه کښ ملایان پاکستان ته لېږلي چې پخپله یې د افغانستان په داخل کې افغانان پر کړنو، عمل او وینا باور نه لري؛ دوی به هم خالي کچکولونه راستنیږي.

 په هېواد کې د بهرنیانو لخوا جګړه په زورکې روانه ده او د کابل سوالي حکومت نورو هېوادونو ته په کرایه کښو ملایانو سوله په سوال غواړي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close