د طالبانو کامیابه ډېپلوماسي

جواد څارگر

سره ددې چې د طالبانو زیات تمرکز په وسله واله مبارزه دی، مګر په دې وروستیو کې په ډېپلوماتیک ډګر کې خورا فعال بریښي، او دوسله وال مقاومت ترڅنګ، په ډېپلوماتیک ډګر کې هم خورا ښه ځلېدلي .

طالبانو ته آن له پیله په کار وو، چې د وسله وال مقاومت ترڅنګ یې ډیپلوماتیکې هلې ـ ځلې ګړندۍ کړې وای، ممکن همدغسې یې کړي وي؛ خو دا چې نړۍ له امریکا وېره درلودله، او یا تر یوه حده د طالبانو جامد سیاست و نړۍ له طالبانو لېرې پاته وه(البته د امارت دواکمنۍ پر مهال) او طالبان یې محض د امریکا له عینکو مطالعه کول، ځکه یې پر ضد نړۍ یو قطب شوه.

اوس چې په افغانستان کې د غرب او امریکا ناوړه اهداف، دسیمي دولتونو ته څرګند شول؛ دوی مجبور دي چې د سیمې فعاله پوځي او نظامي قوتونو ته لاس وغځوي او دګډ دښمن پر وړاندې متحد شي.

دمګړۍ طالبان ددې سبمې یو مطرح پوځي قوت دی، پنځلس کاله یې په کمو ـ تومو پوځي وسایلو د زبرځواک مقابله وکړه، لسګونه الوتکې یې ورته نسکورې کړې، سلګونه شوبلې یې ورته تس ـ نس کړې، زرګونه پوځیان یې ورته مړه او شل ـ شوټ کړل، ان په استخباراتي مراکزو کې یې چاؤدنې ورته وکړې او د افغانستان مځکه یې ورته سور تنور ګرځولې.

دا دطالبانو کامیابه ډېپلوماسي ده چې نړۍ یې بیا ځل دوه قطبه کړه او امریکایان یې تر یو څه حده تنها او یواځې کړل.

امریکایان چې دنړۍ بدماشۍ ته یې مټې بډ وهلې وې، دطالبانو دکامیابي ډېپلوماسۍ له برکته، نن نږدې دوستان له لاسه ورکوي.

د نظامي بریا ترڅنګ دا د طالبانو ستره سیاسي بریا ده چې د نړۍ ابر قوتونه یې په پلوۍ غږ پورته کوي، حقوق یې مني او د تورلیست څخه دویستلو غوښتنې یې کوي. یو وخت داسې هم و چې امریکایانو به ویل او نړۍ به منله، اما اوس نړۍ طالبان د امریکا له عینکو نه ویني، بلکې نېغ په نېغه طالبان ویني ـ څاري او همغسې برخورد ورسره کوي.

ځینې خولې چې د طالبانو پر ضد ناوړه تبلیغات کوي او د همدې لپاره ګومارل شوي، موږ ترې یو څو پوښتنې کوو:

که دګران هیواد څخه دغربي او امریکایي اشغال دخاتمې او دهیواد د استقلال په پار، له روسانو سره تعامل جُرم وي؛ دطالبانو دپرځولو لپاره د امریکایانو سر بکَف غلامي دکوم قانون له مخې جواز لري؟

که دروسانو سره تعامل دملي ارزښتونو ضد وي، دنظارشوری له طالبانو چېرې وتښتېده او همدغه روس ته کډه شوي افراد، همدا نن ستاسې په دولت کې کلیدي پوستونه نلري؟

که دروس سره تعامل له شرعي پلوه مردود وي؛ دلطف له مخې ‘هاتوا برهانکم ان کنتم صادقین’. او که نه د ملي ارزښتونو پر ضد وي او نه دشرعي اوامرو پر ضد، بیا مو غوغا ولې جوړه کړې؟

پوهېږو چې تاسې ته دهیواد تر ګټو خپلې ګټې معتبرې دي او غواړۍ تل ددې ولس په احساساتو او سرنوشت لوبې وکړئ.

همدا تاسې به نعرې وهلې؛ طالب چېری دی چې سوله ورسره وکړو، منت ورته وکړو، عذر یې وکړو او د وطن د ابادۍ لپاره سره یو شو.

نن چې طالب ښکاره دی، او نړۍ پیدا کړ، تعامل یې ورسره شروع کړ، د طالب ځواک، سیاسي بصیرت او پوځي قوت او قیادت ته سلامي شول؛ تاسې یې پر خلاف نعرې پورته کړې چې هلۍ غلام شو، هلۍ وطن یې په سور کافر خرڅ کړ او……..

اصلاً ددې هیواد دبدمرغۍ سبب همدا تاسې یاست او نه غواړئ چې هیوادوال مو سوکاله او خوشاله ژوند ولري، غواړئ تل مکارانه سیاست وکړئ، ولس وغولوئ، تر څو ستاسې شخصي ګټې دتل لپاره خوندي پاته شي، خیر که د ولس په غاړو کې د اشغال طوق پروت وي.

د سوکاله، خپلواک او اسلامي افغانستان په هیله

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close