د لمونځ مسایل (۲۸مه برخه) قرائت څه ته وايي ؟

لیکوال : م، نجم الرحمن (فضلي)

پوښتنه : قرئت څه ته وايي؟

ځواب : قرئت د قرآن کريم لوستلو ته وايي ([1]).

که بې اختياره په لمانځه کې د ستر ځاى ښکاره شي

پوښتنه : که بې اختياره په لمانځه کې د ستر ځای ښکاره شي نو حکم يې څه دی؟

ځواب : که د ستر ځای څلورمه برخه د سبحان ربی العظيم د دری وارې ويلو په اندازه ښکاره شي نو لمونځ يې مات شو او که له دې څخه کم وخت وو بيا يې لمونځ کيږي ([2]).

په لمانځه کې څومره قرائت ضروري دى ؟

پوښتنه : په لمانځه کې څومره قرئت (تلاوت) ضروري ده؟

ځواب : کم نه کم د يوه آيت لوستل فرض دي، د سورة فاتحې لوستل واجب دي، د فرضو په اولنيو دوو رکعتونو کې، د وترو، سنتو او د نفلو په ټولو رکعتونو کې له سورة فاتحې څخه وروسته د بل سورة يا د يوه لوی آيت يا د وړو دريو آيتونو لوستل واجب دي ([3]).

په نازک ټيکري کې لمونځ کول

پوښتنه : نن صبا ډير باريک (نازک) ټيکري رواج دي، په کومو کې چې د سر ويښتان بيخي ښکاره تر سترګو کيژي، د دا ډول ټيکري په سر کولو په وخت کې لمونځ صحي کيژي او که نه؟.

ځواب : که چيرته ښځه د همدا ډول نازک (باريک) ټيکري په سر کولو په وخت کې لمونځ کوي نو لمونځ يې نه کيژي ([4]).

په تياره کې لوڅ لغړ لمونځ کول

پوښتنه : په تياره کې لوڅ (لغړ) لمونځ کول څنګه دي؟

ځواب : که د اغوستلو لپاره جامه وي نو په تياره او رڼا دواړو کې لوڅ (لغړ) لمونځ کول روا نه دي ([5]).

آيا د سورت فاتحه لوستل په ټولو رکعتونو کې واجب دي

پوښتنه : د سورة فاتحې لوستل د هر قسم لمنځونو په ټولو رکعتونو کې واجب دي؟

ځواب : د فرض لمانځه له دريم او څلورم رکعت څخه پرته د هر فرض، واجب، سنت او نفل لمنځونو په ټولو رکعتونو کې يې لوستل واجب دي ([6]).

که يو چا د عورت څلورمه برخه قصدا لوڅه کړه

پوښتنه : که يو چا د ستر عورت څلورمه برخه قصدا لوڅه کړه نو حکم يې څه دی؟

ځواب : سمدستي يې لمونځ ماتيږي.

که د يو چا هيڅ نه وي زده

پوښتنه : که د يو چا يو آيت هم نه وي زده نو هغه به څه کوي؟

ځواب : هغه دې د قرئت په ځای سبحان الله يا الحمد لله لولي او زر تر زره دې قرآن کريم زده کړي، ځکه چې د فرض قرئت په اندازه د قرآن کريم يادول ورباندې فرض دي او د واجب قرئت په اندازه ورباندې د قرآن کريم يادول واجب دي او که ياد يې نکړي نو سخت ګنهګار دی ([7])

([1]) تعليم الاسلام، دريمه برخه : ٥٩.

([2]) تعليم الاسلام، دريمه برخه.

([3]) تعليم الاسلام، دريمه برخه : ٦٠.

([4]) فتاوى محموديه، ٥ : ٥٢١، بحواله : البحرالرائق، کتاب الصلوة، باب شروط الصلوة، ج : ١، ص : ٤٦٧، تبيين الحقائق، کتاب الصلوة، باب شروط الصلوة، ج : ١، ص : ٢٥٢.

([5]) تعليم الاسلام، دريمه برخه.

([6]) تعليم الاسلام، دريمه برخه : ٦٠.

([7]) تعليم الاسلام، دريمه برخه : ٦٠.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close