د محمد حنیف اتمر استعفاء

واحد فقیري 

د افغانستان د ملي امنیت د مشاور محمد حنیف اتمر ناببره استعفاء واقعا حیرانونکې ده. داسي ښکاري چي جمهورریس اشرف غني د هغه د استعفاء د منلو لپاره مخکي له مخکي تیاری نیولی وو، ځکه سمدستي ئې د هغه پر ځای ۳۵ کلن حمد الله محب وټاکی. او د اتمر استعفا‌ء ئې هم پرته له ځنده ومنله. ویل کېږي چي د افغانستان په سیاست کي دایمي یارانه او وفا نسته. د اشرف غني او اتمر داستان د دې خبري ښه ثبوت دئ.

اتمر پخپله استعفا‌ء کي ویلي دي چي د ملي وحدت او ملي اجماع د ساتلو، د سولي او امنیت د ټینګښت، د انتخاباتو، د سیاسي مدیریت، د ښې حکومتوالۍ، او د منطقوي او بین المللي روابطو په برخه کي د حکومت د مشرتابه له سیاست سره ئې جدي د نظر اختلاف پیدا کړی وو. څرنګه چي د هغوی اختلافات دونه ژور سوي ول چي موافقې ته نه سوای سره رسېدل، نو لهذا استعفاء ئې وکړه. لدې مواردو څخه داسي ښکاري چي اشرف غني او اتمر پر ټولو مهمو مسایلو باندي د نظر اختلاف سره لاره.

د ارګ اوازې دغه راز وايي چي اشرف غني د غزني د نسبي سقوط، د اختر په ورځ کي پر ارګ باندي راکټي حمله، د عسکرو د تلفاتو، او د ایران، پاکستان، او روسیې سره د روابطو په برخه کي هم له اتمر څخه خورا زیات خپه سوی وو.

واقعیت دا دئ چي حنیف اتمر په خپله وظیفه کي سخت ناکامه وو، ځکه پدې څلور نیم کاله کي په ملک کي امنیت ورځ په ورځ خرابېدئ. قومي، فرقوي، او سیاسي اختلافات پراخېدل، او د ګاونډیانو سره روابط هم سخت خراب سوي دي. د کندوز، فراه، او غزني سقوط د اتمر د وظیفوي ناکامۍ ښه دلایل دي. د طالبانو دوامداره پرمختګ بله ستره ناکامي ده. بلخوا، د پاکستان او ایران سره اړیکي تر پخوا زیاتي بحراني سوي دي.

د اختلاف بل عمده ټکی د مسکو را روانه غونډه هم وه. فقط څو ورځي مخکي حنیف اتمر په افغانستان کي د روسیې د سفیر سره وکتل. اتمر د روسیې سفیر ته ویلي ول چي افغانستان د سولي په تړاو د مسکو د کوښښونو څخه مشکور دئ،‌ او له مسکو څخه غواړي چي پر طالبانو باندي فشار واچوي چي د کابل له رژیم سره خبري وکړي. د روسیې سره د اتمر نژدېوالی پخوانۍ سابقه لري، او ښايي د اتمر همدې اوسني موقف د امریکا سفارت سخت په قهر کړی وي. ځکه امریکایان د روسیې سره د اتمر پخوانیو اړیکو ته شک په سترګه ګوري.

د امریکا سره د ټکر بله موضوع د جوزجان رسوايي هم وه. په جوزجان کي غني او اتمر په ګډه د داعش د جنګیالیو د نجات لپاره د افغانستان د پوځي امکاناتو څخه ملي ضد استفاده وکړه. هغوی د داعش تروریسټان د طالبانو له محاصرې څخه وژغورل،‌ او هغوی ئې لکه نازولي مېلمانه په هوتلونو کي خوندي کړل. وروسته ئې همدې تروریسټانو ته عفوه هم وکړه. د داعش سره د اتمر همدې خواخوږۍ د امریکايي جنرالانو قهر او غضب راوپاروی. ځکه هغوی په خپلو سترګو ولیدل چي څرنګه غني او اتمر د داعش د نجات لپاره کوښښ کوي، حال دا چي کله افغان عسکر محاصره وي، هغوی اصلا ری هم نه وهي. امریکايي مطبوعاتو لیکي ول چي کله واشنګټن د داعش او غني – اتمر په روابطو خبر سو، په سپینه ماڼۍ کي عالي رتبه مامورین لکه ځناوران خښمېدل.

بله خبره دا هم ده چي ښايي اتمر احساس کړی وي چي د اشرف غني بېړۍ پر دوبېدو ده، نو لهذا د هغه د مستقبل لپاره به بهتره دا وي چي د ارګ له لیونتوب څخه ځان ګوښه کړي، او د خپل آینده غم خوري.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close