د مسکو له کنفرانس څخه د طالبانو لاسته راوړنې

لیکوال: عبد الله احمدي

مخکې له دې چې په انتخاب کړي عنوان خبره وکړم یو څو جملې د مسکو کنفرانس د مخالفینو په اړه کوم

مسکو کې بین الافغاني مذاکراتو چې د طالب، افغان سیاسیونو او احزابو د مشرانو تر منځ د فبروري په ۵ او ۶ تاریخ وشوې د کابل ادارې او د دې ادارې د مشر هغه لږ څه پاته حیثیت هم له منځه یووړ.

ټولو ته یې وښودله چې د ارام، سوکاله او اسلامي نظام پوښلي افغانستان د جوړېدلو په مخکې لوی خنډ اشغال، د کابل اداره او په ځانګړې توګه د دې ادارې ناکام، بې ځایه احساساتي، د واک او چوکۍ عاشق او پردیو ګټو ته ژمن رئیس محمد اشرف غني احمدزی دی.

یقینا د بین الافغاني ډیالوګ لومړی پړاوو افغانانو ته هیله بښوونکی وو.

د افغان مظلوم ملت دښمنانو په ټول توان سره هڅه وکړه چې د طالبانو ،  افغان سیاسیونو او احزابو د مشرانو تر منځ د ارام، سوکاله او له اشغالګرو څخه د خلاص افغانستان په مورد ناسته بې تأثره کړي خو و یې نشوای کړای یوازې ځانونه یې رسوا کړل چې د سولې مخالفين او مخه نیوونکي څوک دي؟

#د مسکو له کنفرانس څخه طالبانو لاندې لاسته راوړنې حاصلې کړې:

۱ ــ طالبان د اشغال د خاتمې، سر تاسري سولې او د یو ټول شموله اسلامي نظام لپاره له هر چا سره په هر ځای کې خبرو او مذاکراتو ته کېني او په دې لار کې هر ډول قربانۍ ته تیار دي.

۲ ــ د مسکو غونډه د طالبانو په ملاتړ او د دوی د دښمنانو په حق کې یو رسا کاري ګذار وو ځکه یې د شنډولو هڅې کولې.

۳ــ دې کنفرانس او مجلس د بهرنیو ځواکونو په ضد د طالبانو مقاومت او مبارزې ته د مشروعیت قوت نور هم ور زیات کړ.

۴ــ  د کابل ادارې او امریکایانو پخواني دوستان یې د هغوی په مخالفت او د ځان په ننګه و کارول.

۵ ـ د کابل اداره کاملاً منزوي او د سولې په مخالف جهت کې واقع شوه.

۶ ــ د کابل ادارې مشر هغه څرګندونې چې زه به د طالبانو په وړاندې سیمه ییزه او نړیواله اجماع جوړه کړم بابېزه  او تش خبرې شوې خو بالعکس نړیواله او سيمه ییزه اجماع د طالبانو په ملاتړ او ننګونه جوړه شوه.

۷ ــ نړیوالو او د سیمې هېوادونو ته یې و ښودله چې د افغانستان ناارامي د نړیوالو او د منطقې په زیان ده او د دې هیواد بې ثباتي د ټولې منطقې لپاره د نا ارامۍ اغاز ده.

۸ ــ دا یې ثابته کړه چې د سولې په مخکې یو بل لوی خنډ د کابل اداره هم ده.

۹ ــ که چېرته امریکا، نړیوال، د منطقې هیوادونه، افغان سیاسيون او د ګوندونو مشران د ریښتینې سولې او د څلوېښت کلن بحران خاتمه غواړي نو د دې لپاره لومړی ریښتینې اراده او نیت مهم دی، که چېرته اراده ریښتینې نه وي معضله د حل پر ځای نوره هم ډېروي چې بیا به یې ختمول اسانه کار نه وي.

۱۰ ــ د دښمن د رسنیو او مطبوعاتو د جعل، پروپاګند، یو طرفي او رزالت څخه يې ټول خبر کړل.

۱۱ ــ   د ملکي تلفاتو له زیاتېدلو يې ؛چې د بهرنیو ځواکونو په ړندو بمباریو او وحشي چاپو کې ور اوښتي دي، پرده پورته کړه.

۱۲ ـ  خپل جهاد، مبارزه او مقاومت یې مشروع او حق ثابت کړ او خپله داعیه او اهداف یې ټولو ته واضح کړل.

۱۳ـــ افغان سیاسیونو او د ګوندونو د مشرانو ملاتړ یې د ځان کړ او د دوی له شر څخه یې تر ډېره حده ځان بېغمه کړ او هم یې یو ډول حجت ورباندې قائم کړ.

۱۴ ــ هغه ګنګوسې یې لرې کړې چې د دښمن رسنیو خلکو ته ابلاغ کولې چې یو له هغو خبرو څخه د شیر محمد عباس ستانکزي د خبرو تحریف وو چې اردو اړوند یې کړې وې.

۱۵ــ خپل مظلومیت او ۱۷ کلن مقاومت یې قانوني او په ټولو ومانه.

۱۶ــ د امریکا تجاوز او یرغل یې تجاوز او یرغل ثابت کړ چې د دې مجلس اکثره ګډونوالو هم د امریکا ننګه کوله او طالب یې ترهګر او تروریست باله.

۱۷  ــ د کابل ادارې او د مشر هغه پاته محبوبیت او حیثیت یې هم ور څخه واخیست.

۱۸ــ نظام به کاملاً د اسلام مبارک دین د ارشاداتو او اصولو په رڼا کې جوړیږي او پیروي به یې کیږي، چې د طالبانو د مقاومت له مهمو اهدافو څخه یو دا هم دی.

۱۹ــ داسې نظام او حکومت به را منځته کیږي چې د افغانستان ټول اتباع پکې برخه او ګډون ولري او د ټولو پرګنو حقوق په کې محفوظ او رعایت شوي وي.

۲۰ــ د اشغال تر چتر لاندې د ډیموکراسۍ او سیکولرېزم په پایو جوړ شوی او ولاړ نظام کې به کامل اصلاحات او تغیرات راځي.

۲۱ــ د غونډې ټولو ګډونوالو د طالبانو د داعیې، مبارزې، اهدافو او غوښتنو ننګه، ملاتړ او ستاینه وکړه، هغه څه چې طالبانو له امریکایانو غوښتل دوی هم ور سره تایید او د همکارۍ ډاډ يې ور کړ.

۲۲ ــ د مجلس ټولو ګډونوالو د امریکایي فوځیانو له شتون سره مخالفت وښود او د بهرنیو فوځیانو د خروج ټینګه غوښتنه یې وکړه. چې د سولې په وړاندې همدا لوی خنډ دی.

۲۳ ــ په ګډه سره د یو اسلامي، مقتدر، مرکزي ټولشموله افغاني نظام او حکومت لپاره چې  ټولو افغانانو ته د کار، تعلیم، امنیت، پرمختګ او هوسایۍ زمینه برابره کړي صادقانه هلې ځلې او کوششونه کول هغه څه وو چې د غونډې ګډونوالو پرې هوکړه او موافقه وکړه.

۲۴ــ د مسکو غونډې ثابته کړه چې پنځه نوي سلنه افغانان د اشغال خاتمه غواړي او د ټولو شته ناخوالو مور اشغال او د پردیو هجومانه شتون دی.

۲۵ ــ دا راز دا وړ غونډې به دوام لري تر څو اشغال ته د پای تکی ایښودل شوی نه وي چې دویم پړاوو به یې په قطر کې کیږي.

۲۶  ــ د طالبانو د فتر رسمي کېدل، د تور لېست ختمول او د بندیانو ازادول هغه څه دي چې د افغان امریکایي جګړې په له منځه وړلو او یو ارام، سوکاله او ټول شموله اسلامي افغاني نظام راتګ کې مهم رول لري باید د جګړې ښکیل اړخ چې امریکا ده د طالبانو دفتر په رسمیت وپېژني بندیان ازاد کړي او هم د تور لیست خبره نوره ختمه کړي.

۲۷ ــ د مسکو غونډې دا هم روښانه کړل چې افغانان یو بل زغملی شي که چېرته پرېښودل شي.

لویه لاسته راوړنه د طالبانو لپاره دا شوه چې دوی د دې اوږدې جګړې له پیل څخه مخکې ویلي وو چې راځۍ پېښه شوې ستونزه د خبرو او ډیالوګ له لارې حل کړو خو مقابل جانب نه منله او په زور یې ګوته وهله.

دطالبانو لپاره بل مهم څه چې د یادولو وړ دي هغه دا دي چې هغو کسانو چې څو کاله مخکې له امریکایانو سره د طالبانو په ضد جنګیدل، طالب یې د سیمي اوهیواد لپاره خطر باله نن ورځ هغوی هم په دې پوی شول چې طالب یو واقیعت او ماته ور کول ناشونی کار دی بلکې د هیواد او منطقې لپاره خطر د امریکایي ځواکونو اشغال او ناروا شتون دی.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close