د مسکو ناسته، د طالبانو بریا او د افغان حکومت ستره ماتې/ خالد روان

سوله ډېره مهمه ده او له سولې مهم د امریکایانو وتل هم دي. ښکېلې خواوې باید نور فکر وکړي او د امریکایانو وتلو ته یوه معقوله لاره وګوري. په افغانستان کې یوه ورځ جگړه د لسګونه افغانانو ژوند اخلي او د دې اتلس کلنې جګړې ټول بار د افغانانو پر اوږو پروت دی. امریکا دې هم خپله ماتې ومني او په ښکاره دې اعتراف وکړي چې موږ په افغانستان کې ماتې خوړلې او موږ چې له کومو شعارونو سره راغلي وو هغه ټول دروغ وو. موږ افغانانو ته بغیر له مرګ، وژنې، چاپې او ویر نور هېڅ ورنه کړل او د هر شعار خلاف مو ګام پورته کړ.

له بده مرغه افغان حکومت په تېرو اتلسو کلونو کې په بهرنۍ پالیسۍ کې صفر و/ دی. د دې ناسمې پالیسۍ له امله موږ په سیمه او نړۍ کې هره ورځ نوي دُښمنان پیدا کوو، خو حکومت پرې غوږونه کاڼه کړي دي. د امریکا په افراطۍ دوستۍ کې حکومت هره ورځ خپل حیثیت بایلي او ورو ـ ورو ترې د امریکا دُښمنان واټن نیسي.

خو طالبان بیا داسې نه دي. طالبان هره ورځ په خپلو پالیسو کې بدلون راولي. د سیمه‌ییزو او نړیوالو اعتبار ترلاسه کوي. نړیوال یې په دې قانع کړي چې د دوی داعیه یوازې تر افغانستان محدوده ده. طالبان له نړۍ سره اړیکې غواړي. افغانان باید د یوه خپلواک ملت په توګه په دغه جغرافیه کې ژوند وکړي. د افغانستان له جیو پولیټیک او ستراتېژیک موقعیت څخه سیمه‌ییز هېوادونه باید ګټه واخلي. پانګه‌وال باید په افغانستان کې پانګونه وکړي. افغان ځوانان د اروپا، ایران او پاکستان پر ځای باید په خپلو هېوادونو کې خولې تویې کړي او خپل هېواد پر پښو ودروي.

د مسکو ناستې ته هیله‌مندي ډېره وه او له ناستې وروسته دغه هیله‌مندي نوره هم ډېره شوه. طالبانو د نړیوالو رسنیو له لارې خپل پیغام ټولو ته ووایه. هغه پیغام چې طالبانو څو کاله د خپلو ویاندویانو او رسنیو له لارې نړۍ ته ورکاوه، خو د مسکو ناسته کې دغه پیغام ډېر څرګند او پرېکنده وو. د طالبانو په اړه شکونه او بدګمانۍ په سیمه کې پای ته رسېدونکي دي او دغه حقیقت به ډېر ژر راښکاره شي.

امریکا دېره هڅه وکړه چې د مسکو ناسته پیکه کړي، خو په دغه چاره کې ناکام شول. افغان حکومت هم ورته هڅه وکړه، خو په ټولنیزو رسنیو کې د مسکو ناستې هره شېبه تازه پرېکړې او خبرې خپرېدې او نږدې ټول خلک ترې خبر شول.

افغان حکومت باید د یوه لوړپوړي پلاوي سره په دغه ناسته کې ګډون کړی وای. د طالبانو نظریات یې مخامخ اورېدلی وای او خپل نظریات یې هم ورسره شریک کړی وای. خو د بهرنیو چارو وزارت نننۍ اعلامیه ډېره مایوسونکې وه. د بهرنیو چارو وزارت اعلامیه داسې وه، لکه بادار چې لیکلي وي او غلام ټکي پر ټکي ژباړلي وي.

د طالبانو دغه ټینګار او دریځ سم دی، چې د سولې خبرې د حکومت پر ځای له امریکایانو سره کوي. دغه جګړه اشرف غني نه ده پیل کړې، بلکې امریکا پیل کړه او امریکا باید دغه جګړې ته د پای ټکی کېږدي. افغان حکومت هسې چټي په دغه جګړه کې ځان ښکېل کړ او لا هم د دې جګړې د ګټلو شعارونه ورکوي.

د یوه مسلمان افغان ملت په حیث موږ هم د ارام او سوکاله ژوند حق لرو. موږ باید د نورو ملتونو په څېر خپلواک اووسو. نورو ته باید په خپلو چارو کې د لاسوهنې حق ورنه کړو او نه د نورو په چارو کې لاسوهنه وکړو. موږ هم حق لرو چې هېواد مو پرمختګ وکړي. خلک مو ارام ژوند ولري او رسنیو کې د جګړو پر ځای د امن، پرمختګ، بیارغونې او نویو اختراعاتو خبرونه واورو، ویې لولو او ویې ګورو.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close