د مشرانو جرګه به پر امنيتي وضعیت وير وکړي خو …

تبصره

مشرانو جرګې په هېواد کې د امنيتي وضعیت په خرابوالي اندېښنه ښوولې، ويلي یې دي چې په ١٤ ولاياتو کې د وسله والو مخالفينو پر خلاف عمليات دوام لري خو بيا هم په ځینو ولاياتو کې امنيتي وضعه مخ په خرابېدو ده. مشرانو جرګې د امنيتي وضعې پر خرابوالي د اندېښنې په ښوولو سره دا هم ويلي دي که د مخالفو وسله والو بريدونه په همدې ډول دوام وکړي، امکان لري د هېواد امنيتي وضعیت تر دې نور هم خراب شي.

دا اندېښنه يواځې د مشرانو جرګې نه ده. تېره ورځ چې د امريکا د دفاع وزير جېمز مټېس کابل ته په ناڅاپې سفر راغلى او له اشرف غني سره یې ليدنه وکړه، د غني او مټيس په ليدنه کې هم د افغانستان په روانو ناامنيو اندېښنه وښوول شوه چې د پسرلي په راتلو سره به طالبان د تېر په څېر یو ځل بيا خپل بريدونه زيات کړي.

د مشرانو جرګې د اندېښنې وړ موضوع په دې وروستيو کې د ارزګان او فراه ولايتونو مخ په خرابېدونکي امنيتي وضعه ده. د مشرانو جرګې د يو شمېر غړو په وينا، که په خپل وخت سره  يادو ولاياتو ته اکمالات ونه شي او يا پکې عمليات پیل نشي، طالبان د ارزګان او فراه ولايتونو پر دروازو ورننوتونکي دي.

تراوسه لا طالبانو د خپلو عملياتو د زياتوالي او يا د پسرلي د موسمي عملياتو د پیل اعلان نه دي کړى؛ روان عمليات یې د عادي عملياتو برخه ده. خو که طالبانو په داخلي او بهرنيو پوځونود بريدونه په زياتوالي د پسرلي دعملياتو اعلان وکړ، د مشرانو جرګه به په هېواد کې د امنيتي وضعې په لا خرابوالي وير وکړي.

لا خو طالبانو د پسرلي عمليات نه دي اعلان کړي او د مشرانو جرګه وار له مخه د اندېښنو په ښوولو وير کوي. دا چې د ارزګان او فراه ولايتونو امنيتي وضعه ورځ تر ورځ خرابېږي، دا د هغو ولايتونو د امنيتي پوځونو بايللې روحيه ده. که طالبانو د پسرلي عمليات پیل کړل، بيا به د مشرانو جرګه د ولاياتو په سقوط اندېښنه نه وکړي، بلکې په وير به لاس پورې کړي.

دفاع وزرات سر له اوسه منلې ده چې طالبان د پسرلي په رابره کېدا خپل جګړه ييز تاکيتکونه بدلوي. وايي اوس خو پرمختللې وسلې هم لري، که یې مخه ونه نيول شي، د فراه ولايت د انار درې ولسوالۍ په څېر به نورې ولسوالۍ هم ونيسي.

دا مهال د ١٤ ولاياتو له جملې په ارزګان او فراه ولاياتو کې سختې جګړې روانې دي، چې د خاص ارزګان ولسوالي د طالبانو لخوا محاصره ده. دفاع وزارت د خپلو عملياتو اعلان کړی دى، وايي په هغو سيمو کې جګړه روانه ده کومې سيمې چې وسله والو طالبانو دمخه له حکومته نيولې او اوس یې د عملياتو په دوام ترې راګرځوي. خو د ملي اردو او پوليسو په بايللې روحيه فکر نه کوو چې له طالبانو نيولې سيمې بېرته ونيسي، بلکې امکان لري چې د مشرانو جرګه به د حکومتي ځواکونو د نورو سيمو له لاسه په ورکولو هم وير وکړي؛ خو که طالبانو پسرلني عمليات پیل کړل.

اشرف غني که د امريکا په ډاډ په افغانستان کې پر طالبانو غږ کوي چې د سولې له فرصته دې ګټه واخلي، هغه ډاډ هم نور له منځه تلونکی دی. سپينه ماڼۍ پخپله په دومره ستونزو کې راګيره ده چې د اختلافاتو له امله یې د بهرنيو چارو وزير ریکس ټيلرسن هم له دندې ګوښه کړل شو.

د مشرانو جرګه به د خپل برخليک په اړه هغه وخت وير وکړي چې امريکايي چارواکي په خپلو کې سره اخته شي، او د مجاهدينو د حکومت په څېر موجوده حکومت کورنيو اختلافاتو او خپلمنځي جګړو ته پرېږدي، چې نښې یې سر له اوسه ليدل کېږي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close