د نړۍ پای (۶۹مه برخه) – د ياجوج ماجوج را وتل –

عربی لیکنه : دکتور محمد العریفی

ژباړه :  م، نجم الرحمن فضلي

ضروري خبره

ياجوج ماجوج ([1]) د بني آدم دوه غټې شريرې قبيلې يا قومونه دي لکه د نبي کريم   صلی الله علیه وسلم  په يوه حديث سره چې ثابت شوي:

د آدم په اولاده کې دي او انسانان دي، دا خلک د ذوالقرنين په زمانه کې د يوه فساد خپره وونکي قوم په څير مخته راغلل، د هغوی ګاونډيانو له ذوالقرنين څخه وغوښتل چې د دوی او د ياجوج ماجوج تر مينځ دې ديوال جوړ کړي تر څو چې دوی د هغوی له شر او ضرر څخه خلاص شي: او ذوالقرنين همدا ديوال جوړ کړ.

نبي کريم   صلی الله علیه وسلم  خبر ورکړی چې په آخره زمانه کې به د حضرت عيسی  علیه السلام له نزول وروسته ياجوج ماجوج د خلکو لوري ته راووزي او په زمکه کې به خپاره (تيت) شي، هغوی به حضرت عيسی  علیه السلام او د هغه مؤمن ملګري د بيت المقدس په غره کې محاصره کړي او مؤمنان به له سختو مشکلاتو سره مخ کړي!

په دې وخت کې به الله تعالی په ياجوج ماجوج باندې يو چينجی مسلط شي کوم به چې د هغوی غاړې خوري، په همدې سره به هغوی ټول يو ځای هلاک کړی شي او الله تعالی به عيسی  علیه السلام او د هغه ملګري د ياجوج ماجوج له شر څخه بچ وساتي، لاندې د هغوی واقعات په تفصيل سره بيانيږي:

په ياجوج ماجوج باندې د جوړ شوي ديوال قيصه

الله تعالی په خپل مقدس کتاب قرآن مجيد کې د يوه نيک بادشاه ذوالقرنين قيصه بيان کړې او فرمايي:

 ثُمَّ  اَتۡبَعَ  سَبَبًا ﴿۹۲﴾ حَتّٰۤی  اِذَا بَلَغَ  بَیۡنَ السَّدَّیۡنِ وَجَدَ مِنۡ دُوۡنِہِمَا قَوۡمًا ۙ لَّا یَکَادُوۡنَ یَفۡقَہُوۡنَ قَوۡلًا ﴿۹۳﴾ قَالُوۡا یٰذَاالۡقَرۡنَیۡنِ  اِنَّ یَاۡجُوۡجَ وَ مَاۡجُوۡجَ مُفۡسِدُوۡنَ فِی الۡاَرۡضِ فَہَلۡ نَجۡعَلُ لَکَ خَرۡجًا عَلٰۤی اَنۡ  تَجۡعَلَ بَیۡنَنَا وَ  بَیۡنَہُمۡ  سَدًّا ﴿۹۴﴾ قَالَ مَا مَکَّنِّیۡ فِیۡہِ رَبِّیۡ خَیۡرٌ فَاَعِیۡنُوۡنِیۡ بِقُوَّۃٍ  اَجۡعَلۡ بَیۡنَکُمۡ وَ بَیۡنَہُمۡ  رَدۡمًا ﴿ۙ۹۵﴾ اٰتُوۡنِیۡ زُبَرَ الۡحَدِیۡدِ ؕ حَتّٰۤی  اِذَا سَاوٰی بَیۡنَ الصَّدَفَیۡنِ قَالَ انۡفُخُوۡا ؕ حَتّٰۤی  اِذَا جَعَلَہٗ  نَارًا ۙ قَالَ اٰتُوۡنِیۡۤ  اُفۡرِغۡ عَلَیۡہِ قِطۡرًا ﴿ؕ۹۶﴾ فَمَا اسۡطَاعُوۡۤا اَنۡ یَّظۡہَرُوۡہُ  وَ مَا اسۡتَطَاعُوۡا  لَہٗ  نَقۡبًا ﴿۹۷﴾  ([2]).

ژباړه:

بيا ونيوله ده بله لياره او تيار يې کړ نور اسباب تر هغې پورې چې ورسيد مينځ د دوو غرونو ته نو وې موند را وړاندې د دغو دواړو (غرونو) داسې قوم چې نه ؤ نږدې (اکثر د دوی) چې وپوهيږي په خبره (د ذوالقرنين) باندې ؛ وويل دغو (ترجمانانو) اې ذوالقرنينه ! بيشکه چې ياجوج ماجوج فساد کونکي دي په زمکه کې پس آيا حکم کوې ته چې مقرر کړو تا ته څه خرج محصول په دې شرط چې جوړ کړې ته په مينځ زمونږ او په مينځ د دوی کې يو ديوال ؛ وويل ذوالقرنين هغه چې اقتدار راکړی دی ما ته په هغه شي کې رب زما خير ډير غوره دی (له ورکړې د ستاسې نه چې محصول دی) پس مرسته وکړی تاسې له ما سره په زيار زما کې ټول په انساني قوت او عمل نه په مال سره چې جوړ کړم په مينځ د ستاسې او په مينځ د دوی کې يو پلن او محکم ديوال ؛ راوړۍ تاسې ما ته تختې د اوسپنې؛ تر هغه پورې يې ايښودلې چې برابرې شوې دا تختې په مينځ د دوو څوکو د غرونو نو وويل (ذوالقرنين) چې پوکړئ !؛ (په دغو سکرو چې اچول شوي دي په مينځ د تختو د اوسپنې نو پو يې کړل) تر څو چې يې وګرځوله دغه (اوسپنه) اور وويل (ذوالقرنين) راوړئ ما ته چې توی يې کړم په دې ديوال ويلي شوي مس ؛ پس ونه کړای شول دوی چې وخيږي په هغه (او ښکاره شي پرې له جهته د لوړ والي او ښويوالي) او ونه کړای شول دوی دغه (غره) لره سوری کول (له جهته د سختوالي او پلنوالي).

د اهل علمو د يوه راجح قول مطابق هغه يو نيک بادشاه وو، نبي نه وو، هغه ته ذوالقرنين له دې امله ويل کيږي چې هغه د مشرق او مغرب سفر کړی او هغو ځايونو ته رسيدلی چيرته چې د شيطان د ښکرونو په مينځ کې د لمر را ختل (طلوع) او لويدل (غروب) کيږي، ذوالقرنين (سکندر مقدوني) نه دی بلکه له هغه پرته بل څوک دی، ځکه چې سکندر کافر وو او د هغه زمانه له ذوالقرنين څخه له دوه زره کلونو يو څه زياته وروسته وه (والله اعلم):

الله تعالی د هغه قيصه په قرآن کريم کې بيان کړې او فرمايلي يې دي چې هغه په ټوله زمکه باندې سفر کړی، مونږ دلته يواځې د هغو آياتونو مطلب ذکر کوو د کومو تعلق چې د ذوالقرنين او ياجوج ماجوج له قيصې سره دی.

 ثُمَّ  اَتۡبَعَ  سَبَبًا بيا وښودله ده (بله) لياره او تيار يې کړ نور اسباب، يعنې هغه د مشرق او مغرب په يوه بله لار ولاړ کومه چې د دغو لوړو غرونو په شمالي لوري کې ده.

 حَتّٰۤی  اِذَا بَلَغَ  بَیۡنَ السَّدَّیۡنِ  تر دې چې هغه يوه داسې ځای ته ورسيد کوم چې د ترکو په زمکه کې د آرمينيا او ازربائجان له سرحد سره نږدې واقع دی:

(السدان) معنا يې ده دوه غرونه، د هغوی په مينځ کې خالي ځای دی، له کوم څخه چې ياجوج ماجوج را وځي، هغوی د ترکو په علاقه کې فساد کوي، فصلونه او نسلونه تباه کوي ([3]).

کله چې ترکو له ذوالقرنين سره قوت وليد نو دوی ته اندازه وشوه چې دا بادشاه صاحب د اختيار او صلاحيت دی، هغوی ور څخه وغوښتل چې د دوی او د ياجوج او ماجوج تر مينځ د لارې بندولو لپاره يو ديوال ودروي تر څو چې ياجوج ماجوج پر دوی حمله ونکړي، د دغه کار لپاره ترکو بادشاه ته د مالي عوض خبره هم وکړه، ليکن دغه نيک بادشاه پرته له کومې معاوضې يواځې د خير په بنياد او له الله تعالی څخه د اجر او ثواب لپاره د دغه ديوال د جوړولو فيصله وکړه او هغه دې نتيجې ته ورسيد چې د دې مسئلې آسان حل دا دی چې د دواړو غرونو په مينځ کې تيريدونکې لار په يوه مضبوظ (کلک) ديوال سره بنده کړی شي او ترکو ته يې وويل چې د افرادو په قوت له ده سره مرسته وکړي:

 فَاَعِیۡنُوۡنِیۡ بِقُوَّۃٍ  اَجۡعَلۡ بَیۡنَکُمۡ وَ بَیۡنَہُمۡ  رَدۡمًا  پس مرسته وکړئ تاسې له ما سره په زيار زما کې ټول (په انساني قوت او عمل سره نه په مال) سره چې جوړ کړم په مينځ دستاسې او په مينځ د دوی کې يو پلن او محکم ديوال:

پادشاه د اوسپنې غټې غټې ټوټې د دواړو غرونو په مينځ کې په ترتيب سره کيښودې او بيا يې وويل  انۡفُخُوۡا  پو کړئ : (په دغو سکرو چې اچول شوي دي په مينځ د تختو د اوسپنې نو پو يې کړل)  حَتّٰۤی  اِذَا جَعَلَہٗ  نَارًا  تر څو چې يې وګرځوله دغه اوسپنه اور  قَالَ اٰتُوۡنِیۡۤ  اُفۡرِغۡ عَلَیۡہِ قِطۡرًا  وويل (ذوالقرنين) راوړئ ما ته چې تو يې کړم په دې ديوال ويلي شوي مس، په دې سره د اوسپنې ټوټې په ډير مضبوط شکل کې له يوې بلې سره پيوند شوې او د يوه سخت غره په څير جوړې شوې.

د دغه ديوال د لوړ والي له امله د ياجوج ماجوج لپاره په هغه باندې پورته ختل ممکن نه دي، د ديوال د مضبوطوالي او پلنوالي له امله په هغه کې سوری کول هم هغوی ته ممکن نه دي، د دغه مضبوط او محکم ديوال په ذريعه ذوالقرنين د ياجوج ماجوج لار بنده کړه.

[1]  – کومه خبره چې د ياجوج ماجوج په باره کې مشهوره ده او ځينو غير معتمدو کتابونو هم د هغې ذکر کړی چې په هغوی کې ځينې ډير واړه او ځينې ډير لوی دي تر دې چې په هغوی کې به يو کس خپل غوږ ځانته پر زمکه وغوړوي او بل غوږ به له خپل ټول بدن څخه را تاو کړي، دا او دېته ورته نورې خبرې ټولې يې کوم اصل نلري.

[2]  – الکهف، آية : ۹۲- الی ۹۷.

[3]  – تفسير ابن کثير، الکهف ۱۸: ۹۲- ۹۳.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close