د وخت د فرعون په امر.. د فرعون پر پلونو

نسیم څپاند

روانه اوونۍ، د هغه څو کلن ننګرهاري ماشوم انځور په ټولنیزو رسنیو کې کښته پورته کېده چې، د حکومت په خپله اصطلاح، ”ځانګړو مېړنیو ځواکونو“ پر چپه سترګه ویشتلی و.

د ننګرهار د روداتو ولسوالۍ کې په چاپه کې شهید شوی ماشوم – د عقرب اوله، ۱۳۹۷. انځور: فېسبوک

دا کیسه د روانې عقرب میاشتې د اول تاریخ په شپه وشوه. د ننګرهار د روداتو ولسوالۍ سره په یوه نږدې سیمه کې د یوه کور وګړي په خپل کور کې په خواږه خوب ویده وو. کله چې شاوخوا دوولس بجې شوې، له نامعلوم لوري یې د کور پر کوڅه ځانګړي ځواکونه ورمرش شول، او ډزې یې پیل کړې.

د ملي امنیت د ځانګړو ځواکونو اړوند یو ګروپ همدې کور ته تر ننوتلو وروسته سیده په خونو ننوتل. له ورننوتلو سره سم یې د ماشوم پلار او د هغه د کورنۍ ۱۳ نور وګړي په سر او سینه وویشتل – کله چې یې ولید چې په کور کې یو ژوندی نارینه لا هم پاتې دی، (همدا ماشوم)، پر هغه یې هم د ټوپک شپېلۍ ورواړوله او پر سر یې وویشت – هماغه کار چې فرعون به کاوه؛ د فرعون عسکرو د فرعون په امر د موسی علیه السلام د پیدا کېدو له ویرې د بني اسراییلو نارینه ماشومان حلالول او ښځینه ماشومان یې پرېښودل. دې عسکرو هم د یوه بل موسی د راپیدا کېدو له ویرې هغه پر سر وویشت. تقبلهم الله.

د ځانګړو ځواکونو دا فرعوني کړنې لومړۍ نه دي. تر دې څو ورځې وړاندې یې هم د لغمان د الینګار ولسوالۍ په نورلام سیمه کې د لږ ترلږه یوولسو کلیوالو په ګډون یو بل لس کلن ماشوم هم وژلی و.

ځانګړي ځواکونه دا ډول عملیات ټول په شپه کې کوي – دې عملیاتو ته تلونکي عسکر خپل اسلامیت او افغانیت په قرارګاه کې پرېږدي، په نیمه شپه کې د بهرنیانو په قومانده د یوه مسلمان او خپل ورور پر کور ورننوځي، نارینه یې د ښځو په مخ کې ووژني او د سهار په وخت کې لوړې غړۍ له سیمې ووځي.

د ټرمپ امر:

دا عملیات د تېر ۲۰۱۷ز کال له سپټمبر میاشت راهیسې یو ځل بیا تر هغه وروسته ډېر شول کله چې د امریکا سرزوري ولسمشر، د خپلو جګړه-خوښو جنرالانو په هڅونه، د افغانستان لپاره خپله سټراټيژي اعلان کړه.

د دې سټراټيژۍ له مخې، افغانستان ته څلور زره نور امریکايي عسکر راولېږل شول، د افغان دولتي عسکرو روزنه چټکه شوه، بمبارونه او چاپې زیاتې شوې او پر طالبانو له هرې ممکنې لارې فشارونه راوړل شول.

 د دې ټولې سټراټيژۍ موخه دا وه چې طالبان د زور او فشار له لارې له کابل سره خبرو ته کښېنوي – هغه ارمان چې امریکا یو کال وروسته هم یو اینچ ورنږدې نه شوه، او نه به یې دا ارمان پوره شي.

د طالبانو د مشرانو د له منځه وړلو لپاره پر طالبانو بمبارونه او شپنۍ چاپې زیاتې شوې. د طالب مشرانو د له منځه وړلو ماموریت امریکايي استخبارات او سي آی اې پر مخ وړي، خو د عملیاتو سیمې ته تلونکي عسکر ټول د افغان دولت ځانګړي ځواکونه وي – کله ناکله د لارښوونې لپاره امریکايي ځواکونه هم ورسره وي –

په تېره جولای میاشت کې، امریکایۍ پولیټیکو مجلې په خپل یوه راپور کې ویلي و چې د طالبانو د مشرانو د له منځه وړلو دې پروګرام ته د ANSOF نوم ورکول شوی دی.

یوه امریکايي افسر د نوم نه ښودلو په شرط پولیټیکو ته ویلي و چې سي آی اې په هدفي لیست کې شامل کسان د خپلو افغان ملګرو په لاس وژني او نیسي. د نوموړي په خبره، ”د سي آی اې افغان ملګري د برید، وژلو او بندي کولو دنده ترسره کوي، خو امریکايي رینجر ځواکونه هم ورسره وي“.

که څه هم دا عملیات د طالبانو د مشرانو د وژلو لپاره پر لار اچول شوي، خو پایلې یې هر وخت هماغه وي کومې چې موږ په تېرو اوونیو کې ولیدلې او د لیکنې په پیل کې اشاره ورته وشوه.

د دولت دفاع وزارت په شپنیو چاپو کې وژل شوي کسان، که څه هم ټول د ننګرهار د وروستۍ پيښې په څېر ملکي وګړي وي، تر عملیاتو څو ساعته وروسته ترهګر وبولي.

رسنۍ او د بشري حقوقو ادارې هم پر دې ډول عملیاتو تل چوپې پاتې شوې او هیڅکله یې دې عملیاتو ته د نیوکې ګوته نه ده نیولې.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close