د وطن مینه – احمد شاه بابا

احمد شاه بابا

ستا د عشق له وینو ډک شول ځیګرونه

ستا په لاره کې بایلي زلمي سرونه

تا ته راشمه زړګی زما فارغ شي

بې له تا مې اندېښنې د زړه مارونه

که هر څو مې د دنیا ملکونه ډېر شي

زما به هېر نه شي دا ستا ښکلي باغونه

د ډېلي تخت هېرومه چې را یاد کړم

زما د ښکلې پښتونخوا د غرو سرونه

د رقیب د ژوند متاع به تار په تار کړم

چې په تورو پښتانه کا ګزارونه

د فرید او د حمید دور به بیا شي

چې زه وکاندم پر هر لوري تاختونه

که تمامه دنیا یو خوا ته بل خوا یې

زما خوښ دي ستا خالي تش ډګرونه

احمد شاه به دغه ستا قدر هېر نه کا

که ونیسي د تمام جهان ملکونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close