د ټرمپ ادارې د خاشقجي د وژنې په تړاو د CIA وروستی راپور ناسم بللی

(کابل ټکی کام، ۱۳۹۷، لړم ۲۷)

تېره ورځ واشنګټن پوسټ ورځپاڼې د امريکا د مرکزي استخباراتو «سي ای اې» د سرچينو په حواله ليکلي و چې جمال خاشقجي د سعودي ولي عهد محمد بن سلمان په امر وژل شوی دی.

خو پرون ماښام ناوخته د امريکا د بهرنيو چارو وزارت ويلي، چې دوی د خاشقجي د وژنې په اړه وروستۍ پايلې ته نه دي رسېدلي چې سعودي چارواکي په ياده پېښه کې لاس لري که نه؟ وايي د هغه د وژل کېدو په اړه د CIA وروستی راپور ناسم دی.

د امریکا د بهرنيو چارو وزارت ويلي، چې دوی ژمن دي څو د خاشقجي په وژنه کې ککړ کسان قانون وسپاري او په دې اړه ځينې سوالونه شته چې لا هم بې ځوابه پاتې دي.

دا په داسې حال کې ده، چې د امريکا د ماليې وزارت د خاشقجي د وژنې سره په تړاو لرلو د بن سلمان د نږدې سلاکار سعود القحطاني او په استنبول کې د سعودي قونسل جنرال محمد العتیبي په شمول پر ۱۷ تنو سعودي مشرانو بنديزونه لګولي دي.

سعودی خبريال جمال خاشقجي د روان کال اکتوبر مياشتې په دوهمه نيټه په ترکيه کې د سعودي په کونسلګرۍ کې وژل شوی چې لا يې هم د وژنې په قضيه څېړنې روانې دي، جسد يې لادرکه دی او خپلې کورنۍ ته نه دی سپارل شوی.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close