د ځینو هیوادو غلام ونومول شو، مګر اصلیت یې لا هم د تعصب پر بناء ونه پېژندل شو

نظرمحمد مطمئن

کله چې نوي راپیدا شول، ویل یې د بریتانویانو پروژه ده، او د انګلیس د ګټو لپاره کار کوي.‏

چې ځینې لږ سیمې او د کندهار ولایت یې ونیوی، په پراخه کچه دا خبره کیدله چې د پاکستان لخوا تمویل کیږي.‏

چې ځینې نور ولایتونه یې ونیول، پرمختګونه یې وکړل بیا یې ویل چې د امریکایانو پروژه ده، او د پاکستان لخوا پر مخ وړل کیږي.‏

دا ډول ویل کیدل چې د پخواني پاچا ظاهر شاه د راتلو لپاره کار کوي.‏

چې جلال اباد نیولو ته یې تیاری نیوی، ویل کیدل چې غواړي عرب مجاهدین د اسامه بن لادن په ګډون ونیسي او امریکا ته یې وسپاري.‏

عرب مجاهدین دومره ویریدلي وو، چې کله جلال اباد ونیول شو په هیڅ ډول یې پر طالبانو باور نه کاوو، هغوی ویره درلودله چې امریکا ته به ‏یې وسپاري.‏

چې کله یې کابل ونیوی، بیا یې ویل چې د واک انحصار غواړي او دا خلک په حکومت او حکومتداري نه پوهیږي.‏

کله چې يې شمال کې جګړې پېل کړي، دوی به ویل چې د اخلک تجزیه غواړي، په داسي حال کي چې د تجزیې مخنیوي یې کاوو.‏

کله چې ۹/۱۱ پېښه وشوه، پرته له ښاغلو، انجنیر حکمتیار، مولوي محمدي او مولوي خالص بابا نورو ډیرو یې د ځپلو او محوه کولو غوښتنه ‏وکړه.‏

کله چې یې نظام د امریکا د بمبارد په زور له منځه ولاړ، په یوه خوله ویل کیدل چې پنجابیان وو.‏

د امریکا سره پر افغانستان حمله کولو کې پاکستان، ایران، روسیې ، چین، ترکیې ، اماراتو او حتی سعودي عربستان او نورو د نړۍ ډیرو ‏هیوادونو مرسته وکړه.‏

پاکستان ډیری عرب مجاهدین او افغان طالبان ونیول او د پيسو په مقابل کې یې پر امریکایانو وپلورل او ګوانتانامو ته یوړل شول.‏

ایران بیا امریکا ته وویل د اړتیا په وخت کې د ایران هوایې قلمرو کارولي شي، تر څو پر طالبانو بمبارد وکړي.‏

روسیې په منځنۍ اسیا کې د امریکا له هوایې اډو سره هوکړه وکړه چې افغانستان ته نظامي تجهیزات او پوځي وسایل نقل کړي.‏

په هلمند کې پر دوی تور ولګیدی چې د بریتانویانو له پاره کار کوي.‏

کرار کرار جګړه اوږده شوه، امریکا او ناټو پوځیان ونه توانیدل چې دلته په سېمه کې خپلو اهدافو ته ورسیږي.‏

د جګړې په اوږدو کې وویل شول چې د ایران څخه وسلې اخلي او غلامان یې دي.‏

قطر کې د سیاسي دفتر د خلاصیدو او هلته میشت کیدو په وخت کې یې وویل چې د امریکا غلامان دي، او امریکا ورته په قطر کې دفتر منلی ‏دی.‏

کله چې یې په نړیوالو کانفرانسونو کې ګډون وکړ، ویل کیدل چې د پاکستان په وساطت د نورو غلامي کوي.‏

کله چې يې له چین سره اړیکې جوړې کړي ورته تورونه پري ورپوري شول.‏

او په وروستیو وختونو کې چې د دوی د سیاسي دفتر غړي وتوانېدل چې د روسانو انديښنو ته ځواب ووایې او د هغوی له شره په راتلونکې کې ‏ځان خلاص کړي، اوس نو بیا وایې چې د روسانو غلامان دي.‏

هغه لومړي خبره ناسمه وختله چې د بریتانویانو پروژه ده، دوېمه خبره چې د پاکستان غلامان دي، همدې پاکستان امریکا ته تسلیم کړل، ناسمه ‏وختله، درېمه خبره چې د امریکا پروژه ده او د پاچا ظاهرخان د بیا راوستلو او پاچا کیدو له پاره راغلي، هم ناسمه وختله.‏

داچې ویل به یې چې عرب مجاهدین د اسامه بن لادن په ګډون به يې امریکا ته تسلیم کړي، داهم صحیح نه شوه، عمل کې یې هر څه ثابت کړل.‏

د واک انحصار یې درلود، موږ هم پرې په هغه وخت کې نقد کړی، مګر هیواد یې له تجزیې وژغوری.‏

د امریکا او ناټو حملې ورک نه کړل بلکې قوي یې کړل، د ایران سره یې دوستې د عربو هیوادونو د ناځواني له کبله وشوه، چین سره یې اړیکې ‏د امریکا، اروپا او هند د ناسمو تګلارو او تعصب له کبله، له روسانو سره یې اړیکې د امریکا له غرور او په نړۍ باندي د حکومت کولو خوب ‏لیدو له امله ده.‏

که همدا دوی کومه ورځ له امریکا سره د افغان ستونزې د حل په موخه مخامخ خبره کوي، بیا به ویل کیږي چې د امریکا غلامان دي.‏

بل لورته د یادو ګردو هیوادونو غلامان په ښکاره هغوی ته کار کوي، او په غلامي یې افتخار کوي.‏

کومه ورځ به وي چې طالب په سم ډول وپېژنو.‏

هغوی چې له روسانو ، هند، فرانسې او ایران څخه یې د دوی پر ضد وسلې او نظامي تجهیزات غوښتل، کولاب کې يې اډې درلودلي. ښاغلي ‏دي.‏

هغوی چې له امریکانو یې د بمبارد او غټو بمونو اورولو غوښتنه کوله، دلته یې د امریکا او ناټو پوځیان ومنل، اډې یې ورکړي، هغوی ښاغلي ‏دي.‏

هغوی چې د امریکا په زور پر افغان ولس حکومت کوي، ښاغليٍ دي.‏

هغوی چې د پيسو مقابل کې د هرچا غلامي کوی، ښاغلي دي.‏

هغوی چې د پردیو ګټو لپاره خپل ولسونه وژني ښاغلي دي.‏

مګر ددې لپاره چې د روسانو، ایران، چین اوهند له شره په راتلونکې کې ځان وساتي ، د امریکا په مقابل کې د نورو هیوادونو سیاسي ملاتړ تر ‏لاسه کړي، هغوی بیا غلامان دي؟ ‏

وایې د زورور اوبه مخ په لوړه خیږي، همدا وجه ده چې غلام ازاد او ازاد ته غلام ویل کیږي.‏

هو که د امریکا زور ته تسلیم شوې وای، د امریکا او ناټو غلامي یې منلي وای، او اوس هم د امریکا ناسمو تګلارو ته سمې ووایې، بیا به همدا ‏خلک (التبه افغانان) چې وایې غلامان دي، وبه وایې چې دوی ډیر ښه او ازاد خلک دي. مګر کله به هم امریکا او نړۍ طالب په هغه حیثیت ونه ‏مني، کوم چې يې په افغان ولس کې لري. ‏

موږ ولیدل، حزب اسلامي له پوره انعطاف څخه کار واخیست، مګر افغان حکومت د هوکړې په پلې کولو کې ناکام ، امریکا او نړیوالو هم د ‏هوکړې د عملي کولو لپاره وړ قدمونه وانه خیستل.‏

که نړیوال او افغان حکومت د سولې په شعار ورکولو کې صادق وي، موږ په کلکه ورڅخه غواړو چې د ښاغلي حکمتیار صاحب نوم له ‏تورلسټ څخه وایستل شي، د حزب اسلامي سره دا ژمنه چې ۴۰۰ بندیان به یې خوشي کیږي، ډیر ژر عملي او بندیان خوشي شي، دا ډول د ‏حزب اسلامي سره هغه ژمنه چې د شمشتو مهاجرو ته به ځانګړي سېمه ورکول کیږي، همدا سېمه په نښه شي.‏

داچې حکومت او نور اړخونه وایې چې د ښاغلي حکمتیار له تورلسټ څخه د نوم ایستلو مخالفت روسیه او فرانسه کوی، مګر هر وخت افغان ‏چارواکو ویلي چې موږ خپلواک یو، په کار ده چې ۴۰۰ بندیان خوشي کړي، او د مهاجرو لپاره سېمه او ځمکه ورکړي، او د حکمتیار صاحب ‏راتګ کابل ته زمینه مساعده کړي. که داکار هم ونه کړي، بیا نو ښکاري چې هیڅ ډول ازادي نه لري، او دسولې خبرې له افغان حکومت سره ‏کول یواځي د وخت ضیاع ده. او د طالبانو هغه ادعاء ته لا زیات صدق ورکوي چې هغوی وايې چې افغان حکومت په ځینو مسایلو کې د افغان ‏کشالي اړوند مسایلو باندي د بحث او عملي کیدو صلاحیت نه لري.‏

که د حزب اسلامي سره هغه شرایط چې افغان حکومت یې په ښکاره د صلاحیت ادعاء کوي هغه هم عملي نه شي، په راتلونکې کې به د سولې ‏پر خبرو یو ډیر بد ګوزار او ناوړه اغیز وکړي.‏

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close