د ښاغلي حکمتیار معاون کابل ته رسیدلی

کابل ټکی کام ۲۷ زمری ۱۳۹۴

راپور فرید احمد

د ګلبدین حکمتیار په مشرۍ د حزب اسلامي معاون ددې تنظیم د استازي په حیث کابل ته راغلی دی وايي؛ که افغان حکومت د دوی شرطونه ومني له تروریستي ډلو په تېره داعش سره به مبارزه وکړي.

محمد عظیم آبرومند رسنیو ته ویلي چې د سولې لپاره کابل ته راغلی او که چیرته د حکمتیار شرطونه د حکومت له خوا ومنل شي؛ په افغانستان کې به له ټولو تروریستي ډلو په تېره داعش سره مبارزه وکړي:

«داعش یوه خطرناکه پدیده ده چې یوه ډله یې له طالبانو جلا شوې ده او اوس سره یوځای شوي دي. موږ یې په هماغه اندازه خطرناکه بولو چې که د سولې له خبرو ابزاري استفاده وشي دا ډله به ډېره مخته لاړه شي.»

څه وخت مخکې د ګلبدین لخوا داعش یو اسلامي پاڅون وبلل شو او ابوبکر البغدادي یې د خپل امیر په حیث منلی و. خو چې دهغوی لخوا ورته څه اهمیت ورنکړل شو نو پخوا ته ورته سمدلاسه یې مخالفت شروع کړ.

محمد اعظم ابرومند وایي:

«دا د حکومت کار دی چې څه ډول کولای شي؛ د سولې خبرې اداره کړي موږ هم د همدې لپاره راغلي یو چې له حکومت سره خبرې وکړو. غواړم ووایم چې موږ هم د داعش په څېر له هرې یوې تروریستي ډلې سره چې خلک وژني مبارزه کوو

د حزب اسلامي دا استازی په هېواد کې د امنیت ټینګښت؛ د ډيموکراسۍ په چوکاټ کې د قانون واکمني او له افغانستان څخه د بهرنیو پوځیانو وتل هغه شرطونه وړاندې کوي چې په خبره یې د حکومت له مشرانو سره به یې مطرح کړي.

ښاغلی آبرومند همداراز وايي چې پاکستان د افغانستان په وړاندې ځینې ګټي لري او که چیرته د حکومت مشران د سولې خبرو ته لیواله دي دا بهیر باید سم اداره کړي که نه نو سوله به دغه هیواد ته یو ارمان پاتې شي.
د ولسمشر ویاند ظفر هاشمي وایي چې دولت له ټولو هغه ډلو سره سوله کوي چې وسله پر ځمکه ږدي.


د ګلبدین حکمتیار په مشرۍ د حزب اسلامي دا استازی په داسې حال کې کابل ته سفر کوي چې څه موده مخکې  له داعش نه د حکمتیار بیعت ددوی په پاڼه خپور شو.

د حزب اسلامي ډلې په دیارلس کالو کې ددوی په سروې تقریباً ۲۲۰۰۰ امریکایان وژلي دي خو اوس دوی په افغانستان کې له جهادي ډلو سره د مبارزې خبرې کوي.

څه موده وړاندې د حکمتیار یو ماشوم زوی په یوه رادیویي مرکې کې ویلی و چې ځکه حکومت ته نشي ورتلای چې هلته اسلامي نظام ندی پلي او له انتخاباتو څخه مخکې له دوی سره شوې وعدې ندي پوره شوي.

خو سیاسي کارپوهان وايي چې حکمتیار یو بدبخت انسان دی او همېشه د پردیو په لمسون کار کوي او همدا شان همېشه یې د خپلو ګټو د ترلاسه کولو لپاره له زور او نفاقه کار اخیستی او حکومت باید له هغه سره په خبرو کې احتیاط وکړي.

ګلبدین همېشه دعوه کړې چې په افغانستان کې روان مقاومت ده په لاره اچولی دی او چې څومره جنګونه روان دي په اصل حقیقت کې دده له خوا رهبري کېږي خو اوس بیا وایې که چېرې سوله سمه رهبري نشي نو طالبان او داعش به په افغانستان کې خنډونه پیدا کړي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close