د کفر په تيارو کې د اسلام خپرېدونکې روښنايي

لومړۍ برخه

د ختيځ پوهانو (مستشرقينو، د تعصبي او دروغجنو ليکنو، دروغجنو صليبي پروپاګندو او تبليغاتو، د بې علمه او جاهلو تش په نامه پوهانو او علماؤو له امله نامسلمان، سيکولر او ماډرن تش په نامه مسلمان پوهان ټول په دې نظر دي، چې اسلام د تورې په زور خپور شوی دی.

خو تاريخي او اوسني حقائق بلکل د دې خلاف دي، اسلام د خپل حقاني او فطري پيغام او پاکۍ په سبب او برکت خپور شوی دی.

په قرآن کريم کې الله ج په څرګنده فرمايلي دي:

(لا إكراه في الدين قد تبين الرشد من الغي فمن يكفر بالطاغوت ويؤمن بالله بعد استمسك بالعروة الوثقى لا انفصام لها والله سميع عليم)البقرة   256

ژباړه: ( د دين په چارو کې څه زور او مجبورول نشته، سمه خبره له غلطو مفکورو څخه جلا کړای شوې ده، اوس چې څوک له کوم طاغوت نه منکر شي او په الله ج باندې ايمان راوړي، هغه يوه داسې کلکه اسره ونيوله، چې هيڅکله ماتېدونکې نه ده او الله ج ؛ چې کلکه هغه خپله اسره نيولې؛ د هر څه اورېدونکی او پر هر څه پوهېدونکی دی.)

او همدارنګه الله ج بل ځای فرمايي: ( وقل الحق من ربكم فمن شاء  فليؤمن ومن شاء فليكفر إنا أعتدنا للظلمين نارا أحاط بهم سرادقها وإن يستغيثوا يغاثوا بماء كالمهل يشوى الوجوه بئس الشراب وساءت مرتفقا) الكهف 29

ژباړه: په ډاګه ووايه! چې دغه حق دی، ستاسې د رب له لوري، اوس که د چا زړه غواړي ودې مني او که د چا زړه غواړي منکر دې شي، موږ د انکار کوونکو ظالمانو لپاره داسې يو اور تيار کړی دی، چې د هغه پردو هغوی ايسار کړي دي، هلته که هغوی اوبه وغواړي نو پداسې اوبو سره به د هغو غوښتنه وپالل شي، چې د تېلو د ځوښا غوندې به وي او د هغو مخونه به وريت کړي، ډېر ناکاره څښاک او ډېر ناوړه استوګنځای.

بل ځای بيا هم الله ج فرمايي: (وإن أحد من المشركين استجارك فأجره حتى يسمع كلم الله ثم أبلغه مأمنه وذلك بأنهم قوم لايعلمون) التوبة 6

ژباړه: او که له مشرکانو نه کوم څوک په پناه غوښتلو تا ته راشي، څو چې د الله ج کلام واوري، نو هغه ته پناه ورکړه! تر دې پورې چې د الله ج کلام واوري، بيا هغه د هغه د امن تر ځايه ورسوه! دا د دې لپاره بايد وشي، چې دوی علم نه لري.

د رسول الله صلی الله علیه وسلم په سيرت او مبارک ژوند کې هم هيڅ داسې پېښه نه ده شوې، چې چا ته ويل شوي وي، چې د تورې په زور اسلام قبول کړئ!.

د خیبر په غزا کې کله چې نبي عليه السلام حضرت علي رضی الله عنه ته بيرغ ورکولو، نو دا يې هم ورته وفرمايل: که ستا په لاس الله ج يو سړي ته هدايت وکړي، نو دا ستا لپاره له سرو اوښانو څخه غوره ده، او همدارنګه رسول الله صلی الله عليه وسلم ورته وفرمايل: لومړی هغو اسلام ته راوبوله!

کله چې نبي عليه السلام حضرت ابو موسی الاشعري او حضرت معاذ بن جبل رضی الله عنهم يمن ته استول، نو ورته ويې فرمايل: نرمي کوئ! سختي مه کوئ! خلک خوشالوئ! کرکه او نفرت مه پيدا کوئ!.

د مکې مکرمې د فتحې په وخت کې هيڅ کافران د اسلام راوړلو ته مجبور نه کړای شول، بلکې ټول پخپله خوښه مسلمانان شول، صفوان بن آميړ د اسلام راوړلو لپاره دوه مياشتې وخت وغوښتلو، رسول الله ص ورته څلور مياشتې وخت ورکړ.

په امريکا، اروپا او نورو نامسلمانو هېوادونو کې چې اوس اوس په لکونو خلک ايمان راوړي، آيا چا پرې جبر کړی؟  کوم مسلمان فاتح پرې بريد کړی؟ يا بل کوم زور او فشار پرې استعمال شوی؟

په اندونيزيا او ماليزيا باندې کوم مسلمان فاتح حمله او بريد کړی دی؟ د قفقاز مسلمانان کومې تورې او جنرال مسلمانان کړي دي؟ مغل او تاتاريان چې په خپل وخت کې لو ځواک او سوپر پاور وو چا مسلمانان کړل؟ افريقايي بربري قوم چا د اسلام لمنې ته راوستلو؟

په توره خاورې، هېوادونه او ملکونه فتح کېږي خو زړونه په توره نه فتح کېږي.

که په توره کېدای نو افغانان به د فرنګي، روسيې او امريکايي استعمار او يرغل په وخت کې تول کافران شوي او د پرديو په دين شوي به وای.

په اوسني وخت کې چې په نړۍ کې د صليب واکمني ده، د هغوی سره ټول مادي طاقت، رسنۍ، تبليغات، پوځي ځواکونه او پرېمانه مال او دولت شته، او هر ډول کوښښ کوي، چې د اسلام مخه ونيسي، خو په ټوله نړۍ کې د نوي مسلمان شويو کسانو شمېر د نورو ټولو مذهبونو په نسبت زيات دی، کوم کار او فعاليت چې د نورو مذهبونو او اديانو لپاره کېږي، که د هغې څوومه برخه د اسلام لپاره وشي، کوم زور او قوت چې د اسلام په خلاف استعمالېږي، که د هغې څومه برخه د اسلام په ګټه استعمال شي، نو دا بلکل يقيني او باوري خبره ده، چې نور ټول مذاهب او اديان به ختم او اسلام به يوازېنی دين پاتې شي.

د اسلام په خلاف اوس په ټوله نړۍ کې له هر ډول زور او ځواک څخه کار اخيستل کېږي، خو ورځ په ورځ د مسلمانانو شمېر او تعداد ورسره زياتېږي، خپله د صليبيانو په کورونو او هېوادونو کې د اسلام رڼا په تېزۍ سره خپرېږي.

نور بيا…

 

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close