د کورنیو چارو سرپرست، او د دفاع چارسمبالی وزیر بلخ ولایت ته تللي

کابل ټکی کام(جمعه، ۲۴کب، ۱۳۹۷ل):

افغان امنیتي چارواکي وايي چې د دفاع سرپرست وزیر اسدالله خالد او د کورنیو چارو چارسمبالی وزیر معسود اندرابي بلخ ولایت ته تللي چې هلته ددې ولایت له پخواني والي عطا محمد نور اوله نوروسیاسي مشرانو سره خبرې وکړي.

دفاع وزارت په یوه ټویټ کې لیکلي چې امنیتي وزیران او د غوڅ ملاتړ ځواکونو یو سلاکار د نوي امنیې قومندان مبارکي او د بلخ له سیاسي مشرانو سره د خبرو لپاره دغه ولایت ته تللي.

تېره ورځ په بلخ کې د نوي امنیې قومندان د معرفي کېدو مخالفت وشو او د مزار شریف ښار مرکز کې امنیه قومندانۍ ته شاوخوا د پولیسو ځانګړو ځواکونو او د عطامحمد نور او د پخواني امنیه قومندان د ملاتړو ترمنځ وسله واله نښته وشوه.

د بلخ د روغتون چارواکو ویلي چې په دې پېښه کې د ۱۰ پولیسو په ګډون ۱۸ کسان ټپیان شوي دي.

د ۲۰۹ شاهین قل اردو ویاند حنیف رضايي نن (جمعه د کب ۲۴/مارچ ۱۵)  رسنیوته ویلي، امنیتي چارواکي به په بلخ کې د ستونزې هوارۍ لپاره له مشرانو په ځانګړې توګه له ښاغلي نور سره وګوري.

د بلخ د والي ویاند منیر فرهاد هم د امنیتي چاراکو ورتلل تایید کړي او زیاته کړې یې ده چې ددې سفر موخه د رامنځته شویو ستونزو حل دی.

د دفاع سرپرست وزیر تېره ورځ له رسنیو سره په مرکه کې ویلي و چې بلخ کې رامنځ ته شوې ستونزه د ‘ ناسم پوهېدو’ له کبله رامنځته شوې وه او ټینګار یې وکړ چې ناقانونه کار نه دی ترسره شوی.

هغه وویل چې د بلخ له پخواني والي سره یې خبرې کړي او په دې تړاو به نورې خبرې هم وکړي او د هغه مشورې به هم واوري.

امنیتي چارواکو تېره ورځ وویل چې په بلخ کې د امنیتي وضعیت خرابېدو له کبله یې ددې ولایت لپاره عبدالرقیب مبارز د محمد اکرم سامع پرځای نوی امنیې قومندان وګماره.

د بلخ ولایت لپاره د امنیې نوی قومندان تېره ورځ د بلخ امنیه قومندانۍ شاوخوا کې له څو ساعته نښتو وروسته بلاخره د کورنیو چارو وزارت د پولیسو ځانګړو ځواکونو سره یو ځای خپل دفتر ته ورسېد او رسماً یې خپله دنده پیل کړه.

له خپرو شویو تصویرونو ښکاري چې جنرال عبدالرقیب مبارز د ځانګړو ځواکونو په شتون کې د امنیه قوماندان پر څوکۍ ناست دی.

ښاغلي مبارز له طلوع نیوز خبري شبکې سره خبرو کې ویلي:

”د کورنیو چارو وزارت ځانګړو ځواکونو هغه سیمه چې مقاومت پکې کېده تصفیه او تالاشي کړه او له هغو کسانو یې وسله واخیسته چې مقاومت یې کاوه. دوی به د قانون منګولو ته وسپارو. هېچا ته اجازه نه ورکوو، چې د نظام، دولت او مرکزي حکومت پر ضد بغاوت وکړي. ”

نوموړی زیاتوي:

”ټولو مشرانو ته درناوی کوو، خو هر څوک چې د نظام او حکومت پر ضد جګړه کوي، موږ به یې مقابل کې درېږو. ”

د افغانستان د کورنیو چارو وزارت وايي تر اوسه ۲۵ نامسوله وسله وال نیول شوي دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close