د ګونګې سولې په سيورې کې د ژبه ورې جګړې انديښنه

يو شمير رسنيو خبر ورکړی، چې په قطر کې د طالبانو ځينې استازو له امريکايي چارواکو سره منلې ده، چې له افغانستان څخه د امريکايي پوځونو په استلو سوله کوي، خو تر اوسه پورې نه په قطر کې د طالبانو سياسي دفتر او نه د افغانستان لپاره امريکايي استازي زلمي خليلزاد د بحث پايله ښکاره کړې ده.

په کابل کې امريکايي پخواني سفير او د افغانستان لپاره نوي ځانګړي استازي زلمي خللزاد په خپله پخوانۍ سفارتي دوره کې هم هڅې کولې چې طالبان سولې ته کښينوي، خو په افغانستان کې د بهرنيو شتون د زلمي خليلزاد ټولې هڅې بې نتيجې کړې. اوس چې زلمي خلیلزاد د امريکا لخوا په افغانستان کې د ځانګړي استازي په توګه په افغانستان کې د سعودي عربستان په شمول د سيمې د پنځو هیوادونو له مشرانو سره ليدنې وکړې، دا نتيجه ترې په لاس راغله، چې سعودي به د افغانستان په سوله کې مرستې ته وهڅول شي.

د الجزيرې تلويزيون، چې وخت ناوخت د طالب مشرانو په اړه ګونګ راپورونه خپروي، ويلي: د امریکا یو شپږ کسیز پلاوي له طالب استازو سره په مخامخ خبرو کې منلې ده چې له افغانستان څخه د خپلو ځواکونو د ویستلو په اړه يې خبرې او بحث کړى، خو د الجزيرې تلويزيون انګلسي څانګې خپور کړې راپور ګونګ ساتلی او د مقابل لوري (طالب مشرانو) نظر يې له پوښتنې وروسته نه دى څرګندکړی.

امريکا که د طالبانو لومړي شرط ته غاړه کيږدي، ورسره د امريکايي او بهرنيو پوځونو د وتلوپر مهالويش خبرې وکړي، بيا هم په افغانسان کې به د سولې څرک ونه ليدل شي، امريکا هيڅ وخت او په هيڅ صورت سره له افغانستانه خپل پوځونه په بشپړه توګه نه باسي، که د طالب مشرانو سره پرې بحث هم شوى وي، دومره پوځ به په افغانستان کې ساتي چې سياسي او د هیواد ټولنيز واک به د امريکا د پوځ  په واک کې پاتې وي .

امريکايي پوځونه له عراقه هم وتلي دي، خودومره پوځ يې په عراق کې پاتې دى چې  هر اړخيز واک یې په عراق کې مو جود دي او هغه څه چې په عراق کې تير شول او لا روان دي، دا د امريکا د کړونو پايلې دي، همدا ډول به په افغانستان کې د ګونګې سولې تر سيورې لاندې ژبه وره جګړه، لکه د عراق په پنځو لويو ښارونو کې چې يې ولس په اور کې وسوځاوه، په افغانستان کې به هم توره او ژبه وره جګړه روانه وي.

د بلې خوا طالبانو په خپله خبرپاڼه کې منلې چې په قطرکې يې د شيرمحمدعباس ستانکزي په مشرۍ مولوي عبدالسلام حنفي، شهاب الدین دلاور، قاري دین محمد حنیف، محمد سهیل شاهین او محمد زاهد احمدزي له زلمي خلیلزاد سره د اکتوبر په ١٢ نيټه کتلي او ويلي يې دي، چې خبرې به يې دوام ولري.

امريکا که هرڅو په غرور سره پر افغانستان يرغل وکړ، خو بيا يې هم د تسليمۍ سر د افغانانوپه پښو کې کيښود، هغه وشول، څه چې طالبانو ويل، هغو به ويل چې له امريکا سره خبري کوي، خو له بې واکه افغان حکومت سره نه .

طالب مشران بايد د امريکا سره په خبرو کې د تيرو ١٧ کالو جګړه او په افغانستان کې د انساني ناورين علاوه پيښېدونکې هر اړخيزه تباهي هم په نظر کي ونيسي او هغه څه هم ياد وساتي، چې د کمونستي رژيم له زواله وروسته هيواد ورسره مخ شو. طالبان به په افغانستان کې دوه ګونې سوله (امريکا- طالبان) وکړي، خو پيښيدونکې درې ګونې احتمالي جګړه هم شونې ده، چې بيا به هم افغان ولس، بهرني پوځونه او په واک کې پاتې اداره سره نښتې وي .

طالب مشران بايد ګونګه سوله ونکړي، چې افغان ولس د عراق په څير پر ژبه وره جګړه واړوي او مرکز کابل له ولاياتو او څلورو زونونوسره جداکړي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close