رفیع الله جانه! وینه دې همداسې نه پاتې کېږي!/ خالد روان

الله جل جلاله ظالم حکومتونه نه پرېږدي او د داسې مظلومانو په لاسونو یې له منځه وړي، چې انسان یې هېڅ فکر نه شي کولی. د نړۍ په تاریخ کې لویې ـ لویې امپراتورۍ تېرې شوي، خو اوس یې یوه هم نه ده پاتې او ټولې له منځه تللي دي. همداسې له فرعون نه واخله تر اوسنیو فرعونیانو پورې د ظالمو خلکو حکومتونه پاتې شوي نه دي. د نړۍ د تاریخ وحشي او قاتلین په ډېر بد مرگ مړه شوي او د اخېرت حسابي خو یې له الله جل جلاله سره ده.

د امریکا د یرغل وروسته له امریکا سره جهاد یوازې یو خیال کېدای شوای. امریکایانو د ظلمونو، بمباریو، وحشتونو، چاپو، وژنو او بندي کولو څخه خلک په تنگ شول او د نړۍ یوې مجهزې ډلې«امریکا+ناټو» ته یې غېږه ورکړه او ننني حالت د امریکا او د ناټو د ماتې او د طالبانو د بریا نښې ښکاره کېږي.

تش لاس طالبان او په الوتکو، جېټونو، هیلکپوټرو، بې‌پېلوټه، ټانگونو او زغره‌والو موټرو مجهزو عسکرو سره جهاد یوازې د الله جل جلاله په نصرت ترسره شو. گنې هغه طالبان چې په نړۍ کې یې هېڅ د امن ځای نه لرلو؛ خو اوس د نړۍ بېلابېلو هېوادونو ته سفرونه کوي او په قطر کې دفتر هم لري. نړیوال د افغان حکومت په پرتله پر طالبانو ډېر باور کوي او په لویو مسئلو کې ورسره حتماً خبره شریکوي.

د افغان حکومت او امریکایانو ظلمونه لا ختم شوي نه دي. په خوست او پکتیا کې د کمپاین عسکر، په غزني کې پاڅون‌وال، په پکتیکا کې د عزیزالله پاتې شوني، په سویلي ولایتونو کې د جبار قهرمان زامن«سنگوریان» او د رازق لغړیان، په شمالي ولایتونو کې د دوستم ملېشې، په مرکزي ولایتونو کې د شمال ټلوالې ملېشې او په ننگرهار کې د صفر ۱ قطعه هغه ډلې دي، چې هر ساعت جنگي جنایتونه کوي او ټول ملکیان په نښه کوي. د عامو خلکو کورونه لوټي، وسایلو ته یې اورونه اچوي او د کورنۍ بشپړ غړي له منځه وړي.

تېره ورځ د جلال اباد ښار د عربانو په سیمه کې د صفر۱ قطعې وینه زبېښونکو ځناورو یو حافظ، یو محصل او امام بیا شهید کړ. د ننگرهار ولایت مقام په ډېرې سپین‌سترگۍ قاري رفیع الله عرب د طالبانو د جلال اباد ښار مسوول کس بللی دی. شهید رفیع الله لومړی د کورنۍ د غړیو په مخ کې په ډزو وېشتل شوی او هغه وخت ورته د روغتون د وړلو اجازه ورکړل شوې، چې د نوموړي وروستۍ سلگۍ وې.

رفیع الله مې له نږدې پېژانده. د امامت په اجوره یې ژوند روان کړی و او د واده یې لا کلونه پوره شوي نه وو.

د ننگرهار له ځايي چارواکو څو پوښتنې…

۱: رفیع الله عرب د جلال اباد اوسېدونکی و. همدلته اوسېده، نو ستاسې استخباراتي کارکوونکو ولې په دومره ځنډ خبر درکړ، چې شهید رفیع الله د جلال اباد ښار د طالبانو مسوول دی؟

۲: د طالبانو د ښار مسوول به بیا په ښار کې ژوند غوره کړي. هغه خو یوازې چریکي عملیاتو ته راځي او بېرته د سترگو په رپ کې د غرونو لمنو ته پناه وړي.

۳: ایا د رفیع الله په باب داسې معلومات درسره شته، چې اوس یې رسنیو ته وښيئ او نوموړی مجرم ثابت کړئ؟ نه داسې معلومات به هېڅکله پیدا نه کړئ او نه به یې خلکو ته د نمونې په ډول وښيئ.

ان شاء الله د رفیع الله په شان د زرگونو ځوانانو وینې به رنگ راوړي او دغه گوډاگی نظام به هم د ډاکټر نجیب د نظام په برخلیک اخته کېږي او اوسني مسوولین به یې د ښار په بېلابېلو واټونو کې ځوړند سرونه راځړېډلي پراته وي او زموږ د دې دنیا حسابي به موږ ورسره په خپله کړي وي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close