روسيه او امريکا د يوې تورې دوه مخونه

له افغانستانه چې روسان ووتل تر څه وخته کمونستي رژيم ځوړند پاتې و، که يې هر څو د پايښت هلې ځلې وکړې، خو امريکا ورپسې د افغان مجاهدينو پر اوږه ايښى ټوپک تر هغې ډزاوه چې با لاخره د وروستي کمونست (‌ډاکټر نجيب) حکومت نسکور شو. يواځې د نجيب د حکومت په نسکوريدا په افغانستان کې جګړه پای ته ونه رسيده، بلکې جګړې نورې خواوې هم وزيږولې او په هيواد کې له روسانو او کمونستانو وروسته جګړو کې زياته مرګ ژوبله او تباهي رامنځ ته شوه.

د کمونستي رژيم له نسکوريدا وروسته په افغانستان کې داخلي يعنې د واک پر سر جګړه وه، چې د کابل–چهارآسياب تر منځ جګړه کې له ٤٠٠٠٠ زيات کابل ښاريان شهيدان او نور يې د هېواد بيلابيلو برخو ته په کډو کولو اړ شول. هغه وخت امريکا د دې هر څه ننداره کوله او دې ته يې زمينه برابروله چې افغانان د مجاهدينو په بريا او خپلو کړو دعاوو پښيمانه کړي، هغه وخت امريکا په افغانستان کې سوله نه غوښته، که يې سوله غوښتې وای، نن ورځ به په افغانستان کې د امريکا او ناټو پوځونو حضور نه درلود.

امريکا د طالبانو د نظام له نسکوريدا وروسته يواځې په يرغل اکتفا نه کوي، بلکې د سولې په نوم او هغه هم د خپلې خوښې سوله، چې د امريکا له پلان سره سم ټولې ګټې يې پکې خوندې وي، غوښتنه کوي. په مسکو کې چې کومه غونډه وشوه، امريکا يې ځکه مخالفت وکړ چې ګټې يې پکې خوندي نه وې. امريکايي چارواکي په افغانستان کې هغه ډول سوله غواړي کومه چې سي.آى.اې پلان کړې ده.

امريکا په افغانستان کې د افغانانو په رايه او خوښه سوله هيڅ وخت نه غواړي او نه غواړي افغانان په بشپړه توګه واکمن واوسي. امريکا په افغانستان کې د طالبانو د نظام (شريعت) مخالفت په دې کوي، چې بيا امريکا ته پکې د خپلې خوښې د څيرو د بدلولو را بدلولو ځای نه پاتې کيږي؛ ځکه خو نه غواړي طالبان په افغانستان کې واکمن شي.

امريکا په افغانستان کې د طالبانو غوښتونکې ده، خو د اسلامي او خپلواکه افغانستان په توګه نه، بلکې طالبان د افغانستان په موجوده حکومت کې ضم کول غواړي، معنی دا چې طالبان د موجوده حکومت يوه برخه شي. د مخه يې په خپلو پلويانو يا غرب نظرو خلکو باندې حکومت کاوه او اوس غواړي پر خپلو پلويانو او طالبانو دواړو حکومت وکړي او د خپلې خوښې اشخاص په افغانستان کې واکمن کړي.

امريکا چې مخکې يې په اندونيزيا او سعودي عربستان کې د افغانستان په اړه د خپلې خوښې غونډې جوړولې، د نورو هيوادونو علماء يې ورته رابلل، په هغې کې د افغانانو د استازيتوب مسئله نه وه، اوس چې په روسيه کې د افغانستان د مسئلې په اړه غونډه وشوه، وايي د مسکو ناسته د افغان حکومت استازيتوب نه شې کولاى.

په مسکو کې غونډې ته د کوربه هيواد د بهرنيو چارو وزير سرګي لاوروف ويلي: روسیه داسې یو موټی افغانستان غواړي چې هر وګړی پکې خوشال واوسي. روسيې په افغانستان کې نه د حکومت او نه د طالبانو د استازيتوب وينا کړې، چې امريکا يې مخالفت کوي.

امريکا د مسکو له غونډې سره ځکه مخالفت وښود چې سرګي لاوروف په افغانستان کې د امريکا دائمې حضور ته اشاره وکړه او د جګړې له دوام سره يې مخالفت وکړ، نوموړي وويل: نه غواړي افغانستان د جګړې ډګر شي. دا وينا يواځې د سرګي لاوروف وينا نه، بلکې له هغه وړاندې په وار وار افغانانو کړې، چې غواړي نور خپل هيواد د پرديو له سيالي خلاص او نور بايد افغانستان د جګړې ډګر نه وي.

د افغانانو لپاره روسيه او امريکا دواړه يو دي، د مخه روسانو پر افغانستان يرغل کړى و او اوس پرې امريکا کړی. امريکا په افغانستان کې د خپل دائمي پوځې حضور لپاره جګړې ته دوام ورکوي او روسيه بيا په افغانستان کې د امريکا له لوري راپيدا شوې نوې جګړې مارې ډلې «داعش» له ويرې د جګړې پای غواړي.

همدا لامل دی چې روسيه په افغانستان کې د خپلې خوښې او امريکا د خپلې خوښې سوله غواړي. د افغانانو لپاره رويسه او امريکا د يوې تورې دوه مخونه دي. روسېې د مخه هيواد کنډواله او افغانان شهيدان کړل او امريکا هغه عمل اوس کوي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close